ސާފްގެ އެކްސްޓްރާ އޯޑިނަރީ ކޮންގްރެސް ބާއްވަައިފި

ސައުތު އޭޝިއަން ފުޓުބޯޅަ ފެޑެރޭޝަން (ސާފް)ގެ އެކްސްޓްރާ އޯޑިނަރީ ކޮންގްރެސް ބާއްވައިފި އެވެ. 

ތައިލެންޑުގެ ވެރި ރަށް ބެންކޮކުގައި ސާފްގެ އެކްސްޓްރާ އޯޑިނަރީ ކޮންގްރެސް ބާއްވާފައި ވަނީ ހޯމަ ދުވަހު އެވެ. އެ ކޮންގްރެސްގައި ވަނީ ސާފްގެ އިންތިޚާބު ތަކާއި، އެ ފެޑެރޭޝަންގެ މިނިވަން ކޮމެޓީ ތަކުގެ މުއްދަތު އައު ކުރުމަށް ނިންމައިފަ އެވެ. 

ކޮންގްރެސްގައި ވަނީ ސާފްގެ ޑިސިޕްލިނަރީ ކޮމެޓީ އާއި، އެތިކްސް ކޮމެޓީ އާއި، އިސްތިއުނާފް ކޮމެޓީ އަދި އިންތިޚާބީ ކޮމެޓީގެ މުއްދަތު އައު ކުރުމަށް ފާސް ކޮށްފަ އެވެ. އަދި ސާފްގެ ޤަވާއިދާއި، ކޮންގްރެސްގެ ސްޓޭންޑިން އޯޑަރަކަށް ބަދަލު ތަކެއް ގެނައުމަށް ވެސް ވަނީ ނިންމައިފަ އެވެ. މި ކޮންގްރެސް ބާއްވާފައި ވަނީ އޭޝިއަން ފުޓުބޯޅަ ކޮންފެޑެރޭޝަން (އޭއެފްސީ) އިން ފަހުން ނެރުނު ގައިޑްލައިންތަކާ އެއްގޮތްވާ ގޮތުގެ މަތިންނެވެ. 

ކޮންގްރެސް ފެއްޓެވުމުގެ ގޮތުން ދެއްކެވި ވާހަކައިގައި ސާފްގެ ރައީސް ކާޒީ މުޙައްމަދު ޞަލާޙުއްދީން ވިދާޅުވީ، އެ ނިމުން ތަކުގެ ސަބަބުން ފެޑެރޭޝަންގެ ހިންގުމުގެ އޮނިގަނޑު ވަރުގަދަ ވާނެ ކަމަށެވެ. އަދި ހަމަހަމަކަން ދެމެހެއްޓުމާއި، މުބާރާތް ތަކާއި، އިންތިޚާބީ މަރުޙަލާގެ ހަމަހަމަކަން ކަށަވަރު ކުރެވޭނެ ކަމަށް ވެސް ވިދާޅުވި އެވެ. 

މީގެ އިތުރުން އޭނާ ވަނީ ދެކުނު އޭޝިއާގެ ފުޓުބޯޅަ ކުރިއަށް ގެންގޮސް، ކުރިއަރުވައި، ހަމަޖެހިގެން ނިންމުންތައް ނިންމައި އަދި ބައިވެރިވެ ޚިޔާލު ހާމަ ކުރެއްވުމަށް ކޮންގްރެސްގައި ބައިވެރިވި މެމްބަރުންނަށް ގޮވާލައްވައިފަ އެވެ. 

ކޮންގްރެސްގައި ކާޒީ މުޙައްމަދު ޞަލާޙުއްދީން ވަނީ، ސަރަހައްދުގައި ފުޓުބޯޅަ ތަރައްޤީ ކުރުމަށް ދުނިޔޭގެ ފުޓުބޯޅައިގެ މައި އިދާރާ (ފީފާ) އާއި އޭއެފްސީ އިން ދެމުން އަންނަ އެހީތެރިކަން ފާހަގަ ކުރައްވައި، އެކަމަށް ޝުކުރު އަދާ ކުރައްވައިފަ އެވެ. އަދި ތައިލެންޑުގައި ކުރިއަށް ދިޔަ ސާފް ފުޓްސަލް ޗެމްޕިއަންޝިޕް ކުރިއަށް ގެންދިޔުމުގައި ތައިލެންޑުގެ ފުޓުބޯޅަ އެސޯސިއޭޝަން އިން ދިން އެހީތެރިކަމަށް ޚާއްސަ ޝުުކުރެއް އަދާ ކުރެއްވި އެވެ. 

މި ކޮންގްރެސްގައި ދެކުނު އޭޝިއާގެ ފުޓުބޯޅަ ފެޑެރޭޝަންގެ މެމްބަރު ހަތް އެސޯސިއޭޝަން އިން ވެސް ވަނީ ބައިވެރިވެފަ އެވެ.