އެކްސްޓްރާ އޯޑިނަރީ ކޮންގްރެސްއެއް ބާއްވާވަރަށް ސޮއި ހަމަނުވޭ: އެފްއޭއެމް

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ އެކްސްޓްރާ އޯޑިނަރީ ކޮންގްރެސްއެއް ބާއްވަން ވިކްޓްރީ ސްޕޯޓްސް ކްލަބުން ހުށަހެޅި ސިޓީގައި ސޮއި ހަމަނުވާ ކަމަށް އެފްއޭއެމްއިން ބުނެފިއެވެ.

އެފްއޭއެމުން ނެރުނު ބަޔާނެއްގައި ބުނީ، 10 ފެބްރުއަރީ 2019 ވީ އާދީއްތަ ދުވަހު އެފްއޭއެމްގެ އެކްސްޓްރާ އޯޑިނަރީ ކޮންގްރެސްއެއް ބާއްވަން ވިކްޓްރީން ހުށަހަޅާފައިވާ ކަމަށާއި، އެ ސިޓީގައި ސޮއިކޮށްފައިވަނީ 15 ކްލަބަކުން ކަމަށެވެ.

ނަމަވެސް އެ 15 ކްލަބްގެ ތެރެއިން ނިއުރޭޑިއަންޓް ސްޕޯޓްސް ކްލަބް މިވަގުތު ސަސްޕެންޑުކުރެވިފައި އޮތުމުން އެ ކްލަބަށް ސޮއިކުރުމުގެ އިހުތިޔާރު ލިބިގެން ނުވާ ކަމަށެވެ. އަދި ފޯކައިދޫ ފުޓުބޯޅަ ކްލަބް އަދި ކްލަބް ރޮކް ސްޓްރީޓްއަކީ އެފްއޭއެމްގެ މެމްބާޝިޕް ކްލަބަށް ނުވުމުން، އެ ދެ ކްލަބަށް ވެސް ސޮއިކުރުމުގެ އިހުތިޔާރު ލިބިގެންނުވާ ކަމަށް އެފްއޭއެމުން ބުނެއެވެ.

އެފްއޭއެމުން ބުނީ، ސިޓީގައި ސޮއިކުރުމުގެ އިހުތިޔާރު ލިބިގެންވާ 12 ކްލަބުގެ ތެރެއިން ހަތަރު ކްލަބަކުން އެފްއޭއެމްގެ މެނޭޖްމަންޓް ބަދަލު ކުރުމަށް ކަމަށްބުނެ ވަކި ބައެއްގެ ލާބަ އާއި މަންފާއަށްޓަކައި ގާނޫނާއި ހިލާފް އެންމެހައި މަސައްކަތްތަކުގައި ބައިވެރިނުވާނެ ކަމަށާއި، އެފަދަ އެއްވެސް ކަމެއްގެ އެ ކްލަބުތަކުގެ ބައިވެރިވުމެއް ނޯންނާނެކަމުގެ ފުރިހަމަ ޔަގީންކަން ސިޓީއަކުން އަރުވާފައިވާ ކަމަށެވެ.

މީގެއިތުރުން އެފްއޭއެމުން ބުނީ، އެ ހަތަރު ކްލަބުން އެފްއޭއެމްއަށް ފޮނުވި ސިޓީގައި ގާނޫނާއި ހިލާފު އެއްވެސް ކަމެއްގައި އެ ކްލަބްތަކުގެ ކުޅުންތެރިންނާއި، ސަޕޯޓަރުން ބައިވެރިނުވުމަށް ވަނީ އެދިފައި ކަމަށެވެ.

އެގޮތުން އެފްއޭއެމުން ބުނީ، އެފްއޭއެމްގެ އެކްސްޓްރާ އޯޑިނަރީ ކޮންގްރެސް ބޭއްވުމަށް ބޭނުންވާ ގާނޫނީ އަދަދު ހަމަނުވާ ކަމަށާއި، ކްލަބްތަކުން ހުށަހަޅާފައިވާ ސިޓީ އާއި ވިކްޓްރީން ހުށަހެޅި ސިޓީ ފީފާއާ ހިއްސާކޮށްފައިވާ ކަމަށެވެ.

އެފްއޭއެމްގެ އެކްސްޓްރާ އޯޑިނަރީ ކޮންގްރެސްއެއް ބޭއްވުމަށް 12 ކްލަބެއްގެ ސޮއި ބޭނުންވާއިރު، އެފްއޭއެމްއިން ބުނާގޮތުން ސޮއިކުރުމުގެ ހައިސިއްޔަތު ނެތް ކްލަބްތަކާއި، ސޮއިތައް އަނބުރާ ނެގި ކްލަބްތަކާއެކު، ކޮންގްރެސް ބޭއްވުމަށް މިހާރު ވިކްޓްރީއަށް ލިބިފައިވަނީ އެންމެ 8 ކްލަބުގެ ސޮއެވެ.

ފާހަގަ ކޮށްލަން ޖެހޭ ކަމަކީ އެކްސްޓްރާ އޯޑިނަރީ ކޮންގްރެސް ބޭއްވުމަށް ސޮއިކުރުމުގެ ހައިސިއްޔަތު ނެތް ކްލަބްތަކުގެ ނަންތައް އެފްއޭއެމްއިން އާންމުކޮށްފައިވާއިރު، ސޮއި އަނބުރާ ގެންދިޔަ ހަތަރު ކްލަބެއް އެ ކްލަބުން ހާމަކޮށްފައެއް ނުވެއެވެ.