ސާފްގެ ނައިބު ރައީސް ކަމަށް އަލީ އުމަރު

ސާކް ގައުމުތަކުގެ ފުޓްބޯޅަ ޖަމިއްޔާ (ސާފް)ގެ ނައިބު ރައީސްކަމަށް، ފުޓްބޯޅަ އެސޯސިއޭޝަން އޮފް މޯލްޑިވްސްގެ ނައިބު ރައީސް އަލީ އުމަރު ހަމަޖައްސައިފިއެވެ.

ސާފްގެ ނައިބު ރައީސްގެ މަގާމަށް ދެ މީހަކު ހޮވަންޖެހެއެވެ. މި ދެ މަގާމަށް ކުރިމަތިލާފައިވަނީވެސް ވަނީ އެންމެ ދެ ބޭފުޅުންނެވެ. އެއީ އަލީ އުމަރާއި ނޭޕާލްގެ ފުޓްބޯޅަ އެސސިއޭޝަންގެ ފަރާތުން ނަރަސިން ޖޯޝީއެވެ. މިހެންވެ މިއަދު ބާއްވާ ސާފްގެ އެކްސްކޯ މީޓިންގގައި އޮންނާނީ މި ދެބޭފުންނަށް ރުހުން އޮތްތޯ ބެލުން އެކަންޏެވެ.

ސާފަށް ދެ ނައިބު ރައީސުންނާއި އެކްސްކޯ މެމްބަރަކާއި އަންހެން މެމްބަރަކުވެސް އިންތިޚާބުކުރަންޖެހެއެވެ. ސާފްގެ ރައީސަކީ ބަންގްލަދޭޝްގެ ޣާޒީ ސަލާހުއްދީނެވެ. ހަތަރު އަހަރު ދުވަހަށް އޭނާ އަލުން ރައީސް ކަމަށް ހޮވީ 2021 ވަނަ އަހަރުގެ ސާފް ޗެމްޕިއަންޝިޕްގެ ތެރޭގައި ދިވެހިރާއްޖޭގައި ބޭއްވި ޖަލްސާގައެވެ.

ސާފްގެ ފަރާތުން އޭއެފްސީ އެކްސްކޯގައި ތަމްސީލުކުރާނެ މެމްބަރަކު ހަމަޖެއްސުންވެސް މިއަދުގެ ބައްދަލުވުމުގައި އޮންނާނެއެވެ. މި މަގާމަށް ވާދަކުރަނީ އިންޑިޔާގެ ޝާޖީ ޕްރަބާކަރަން އެކަންޏެވެ. ކުރިން މި މަގާމުގައި ހުރީ ސްރީލަންކާގެ ފުޓްބޯޅަ ފެޑަރޭޝަނުގެ ކުރީގެ ރައީސް ޖަސްވަރު އުމަރެވެ.

ރާއްޖޭގެ ފަރާތުން ނައިބު ރައީސްކަމަށް ކުރިމަތިލާފައިވާ އަލީ އުމަރަކީ ދިވެހިރާއްޖެ އުފެއްދި އެންމެ މޮޅު އެއް ފުޓްބޯޅަ ކުޅުންތެރިޔާއެވެ. އޭނާ ވަނީ ވެލެންސިއާއާއި ނިއުރޭޑިއަންޓުގައި ވަރަށް ގިނަ ކާމިޔާބީތަކެއް ހޯދައި، ގައުމީ ފުޓްބޯޅަ ޓީމުވެސް ގިނަ އަހަރުތަކެއްގައި ތަމްސީލުކޮށްފައެވެ.