ވިކްޓްރީން އެދުނު ގޮތަށް އެކްސްޓްރާ އޯޑިނަރީ ކޮންގްރެސް ނުބޭއްވޭނެ: އެފްއޭއެމް

ވިކްޓްރީ ސްޕޯޓްސް ކްލަބުން އެދުނު ގޮތަށް އެކްސްޓްރާ އޯޑިނަރީ ކޮންގްރެސް ނުބޭއްވޭނެކަމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފިއެވެ.

އެފްއޭއެމްއިން ހުކުރު ދުވަހު ނެރުނު ބަޔާނެއްގައި ބުނީ، 10 ފެބްރުއަރީ 2019 ވަނަ ދުވަހު ވިކްޓްރީން އެ އެސޯސިއޭޝަނަށް ހުށަހަޅާފައިވާ، ހާއްސަ އާންމު ޖަލްސާ ބޭއްވުމާއި އެފްއޭއެމްގެ ހިންގާ ކޮމެޓީގެ އިތުބާރު ނެތްކަމުގެ ވޯޓު ނެގުމުގެ މައްސަލައާ ބެހޭގޮތުންނާއި، އެފްއޭއެމް އާއި އެ އިދާރާގެ ލީޑާޝިޕްއަށް އަމާޒުކޮށް ހިންގަމުންދާ ކަންކަމާ ގުޅިގެން ފުޓުބޯޅައިގެ މައި އިދާރާ ފީފާގެ ލަފަޔާއެކު އެ ޖަލްސާ ނުބާއްވަން ނިންމާފައިވާ ކަމަށެވެ.

އެފްއޭއެމުން ބުނީ، ވިކްޓްރީން ހުށަހަޅާފައިވާ މައްސަލައާ ގުޅިގެން ހާއްސަ އާންމު ޖަލްސާއެއް ބޭއްވުމަށް އެދުނު ނަމަވެސް، އެފްއޭއެމްގެ އަހަރީ އާންމު ޖަލްސާއެއް ބޭއްވުމަށް މިހާރުވެސް އިއުލާންކޮށްފައިވުމާއެކު، އަހަރީ އާންމު ޖަލްސާއަކީ އެއްވެސް މެމްބަރު ކްލަބަކުން ހިޔާލެއް ފާޅުކުރަން ބޭނުންނަމަ އެކަން ކުރުމުގެ ފުރުސަތު ލިބިދެވޭނެ ޖަލްސާއެއް ކަމަށް ފީފާއިން ދެކޭ ކަމަށާއި، އޭގެ ކުރިން ހާއްސަ އާންމު ޖަލްސާއެއް ބޭއްވުމުގެ މަގްސަދެއް ނެތްކަމަށް އެފްއޭއެމުންވެސް ދެކޭ ކަމަށެވެ.

އެގޮތުން ފީފާގެ އިރުޝާދާއެކު ހާއްސަ އާންމު ޖަލްސާ ނުބާއްވައި، 25 މާޗު 2019 ވަނަ ދުވަހު އެފްއޭއެމްގެ އަހަރީ އާންމު ޖަލްސާ ބޭއްވުމަށް ނިންމާފައިވާ ކަމަށްވެސް އެ އެސޯސިއޭޝަނުން ވަނީ ބުނެފައެވެ.

މީގެއިތުރުން ވިކްޓްރީން ނޯމަލައިޒޭޝަން ކޮމެޓީއެއް އެކުލަވާލުމަށް އެދުނު ނަމަވެސް، އެ ކަމަކީ ހަމައެކަނި ފީފާގެ އިހްތިސާސްގެ ތެރޭގައި ހިމެނޭ ކަމެއްކަން ފީފާއިން އަންގާފައިވާ ކަމަށާއި، ވިކްޓްރީން އެދުނު ކަމަކީ ފީފާ އާއި އެފްއޭއެމްގެ ގަވައިދުތަކާ ފުށުއަރާ އެދުމަކަށްވާތީ އެކަންވެސް ކޮށްދެވެން ނެތް ކަމަށް އެފްއޭއެމުން ވަނީ ބުނެފައެވެ.

ފީފާގެ ގަވައިދުތަކަށް ހަވާލާދީ އެންމެހައި ކަންކަން މިނިވަންކަމާއި މުސްތަގިއްލުކަމާއެކު ކުރަމުންގެންދިޔުމަށް ފީފާއިން ނަސޭހަތްތެރިވެފައިވާ ކަމަށްވެސް އެފްއޭއެމުން ވަނީ ބުނެފައެވެ.

އަދި އެފްއޭއެމްގެ މަސްލަހަތު ހިމެނޭ ކަންކަމުގެ ތެރެއަށް އިތުރު ފަރާތްތައް ވަނުމާއި، ވަކިން ހާއްސަކޮށް އެފްއޭއެމްގެ މެމްބަރު ކްލަބްތަކާއި، އެފްއޭއެމް އާއި ފުޓުބޯޅައިގެ މަސްލަހަތު ހިމެނޭ ފަރާތްތަކާއެކު ދިވެހި ރާއްޖޭގެ ކުޅިވަރާ ބެހޭ ވަޒީރު އަހުމަދު މަހުލޫފު މުއާމަލާތްކޮށް އަމަލުކުރަށްވަމުން ގެންދަވާ ގޮތަށް ރިޔާއަތްކޮށް، އެކަން ނުހުއްޓުވައިފިނަމަ ދިވެހިރާއްޖޭގެ މައްސަލަ ފީފާގެ ކަމާބެހޭ ކޮމެޓީތަކަށް ހުށަހަޅާނެކަމާއި، އެކަމުގެ ސަބަބުން ދިވެހިރާއްޖެ ސަސްޕެންޑުކުރަން ޖެހިދާނެ ކަމުގެ އިންޒާރުވެސް ފީފާއިންވަނީ ދީފައިކަމަށް އެފްއޭއެމް ވަނީ ބުނެފައެވެ.

އެފްއޭއެމުން ބުނީ، މިނިސްޓަރު މަހުލޫފް އެއްވެސް ކަމެއްގައި ރަސްމީކޮށް އެ އިދާރާއާ މަޝްވަރާކޮށްފައިނުވާ ކަމަށާއި، ގަވައިދުތަކުގެ އިންތަކާއި މިންތަކުގެ ބޭރުން ކުރަމުންދާ އެންމެހައި ކަންތައް ހުއްޓާލުމަށް އެދޭ ކަމަށެވެ. އަދި ކަންކަމުގައި އެފްއޭއެމްގެ އެއްވެސް މެމްބަރު ކްލަބަކުން އެ ކަންކަމުގައި ބައިވެރިނުވުމަށްވެސް އެ އިދާރާއިން ވަނީ އިލްތިމާސްކޮށްފައެވެ.