އެކްސްޓްރާ އޯޑިނަރީ ކޮންގްރެސްއެއް ބާއްވަން ކްލަބްތަކުން ނޫޅޭ: ބައްސާމް

ފުޓުބޯޅަ އެސޯސިއޭޝަން އޮފް މޯލްޑިވްސްގެ އެކްސްޓްރާ އޯޑިނަރީ ކޮންގްރެސްއެއް ބާއްވަން ކްލަބްތަކުން ނޫޅޭ ކަމަށް އެ އެސޯސިއޭޝަންގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

އެފްއޭއެމްގެ އަސާސީ ގަވައިދު ބުނާގޮތުން އެފްއޭއެމްގެ ފުރިހަމަ މެމްބަރ ކްލަބްތަކުގެ ތެރެއިން 50 އިންސައްތައަށް ވުރެ ގިނަ ކްލަބްތަކުން އެކްސްޓްރާ އޯޑިނަރީ ކޮންގްރެސްއެއް ބާއްވަން ކޮންމެ ވަގުތަކު ވެސް އެދެވޭނެއެވެ. އަދި އެކްސްޓްރާ އޯޑިނަރީ ކޮންގްރެސް ބާއްވަން އެދޭތާ 14 ދުވަސް ތެރޭގައި އެކްސްޓްރާ އޯޑިނަރީ ކޮންގްރެސްއެއް ބޭއްވުމަކީ މަޖުބޫރު ކަމެކެވެ.

އެގޮތުން އެފްއޭއެމްގެ އެކްސްޓްރާ އޯޑިނަރީ ކޮންގްރެސްއެއް ބޭއްވުމަށް އެދި މި ފެބްރުއަރީ މަހުގެ 10 ވަނަ ދުވަހު ވިކްޓްރީ ސްޕޯޓްސް ކްލަބުން 15 ކްލަބެއްގެ ސޮޔާއެކު ހުށަހެޅި ނަމަވެސް އަސާސީ ގަވައިދުގައިވާ ގޮތުގެ މަތިން 14 ދުވަސް ތެރޭގައި އެކްސްޓްރާ އޯޑިނަރީ ކޮންގްރެސް އެފްއޭއެމުން ބާއްވާފައެއް ނުވެއެވެ. އެކްސްޓްރާ އޯޑިނަރީ ކޮންގްރެސް ބާއްވަން އެފްއޭއެމްއަށް ވިކްޓްރީން ހުށަހެޅި ސިޓީގެ ޖަވާބުގައި އެފްއޭއެމްއިން ބުނީ، ސިޓީގައި ސޮއިކުރި 15 ކްލަބްގެ ތެރެއިން ދެ ކްލަބަކަށް ސޮއިކުރުމުގެ އިހުތިޔާރު ލިބިގެންނުވާ ކަމަށެވެ.

ފުރަތަމަ ޑިވިޝަނުގެ ފަސް ކްލަބެއް ކަމަށްވާ މާޒިޔާ، ގްރީންސްޓްރީޓްސް، ދަ ގްރާންޑޭ، ޔުނައިޓެޑް ވިކްޓްރީ އަދި ކްލަބް އީގަލްސްގެ އޮފިޝަލުންނާ އެކު ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ބައްސާމް ވިދާޅުވީ، ކްލަބްތަކުގެ ހުށަހެޅުމުގައި ގާނޫނީ އަދަދު ހަމަނުވާ ކަމަށާއި، އެދިފައިވާ ކަމަކީ ވެސް އެފްއޭއެމް އަށް ކުރެވޭނެ ކަމެއް ނޫން ކަމަށެވެ.

ވިކްޓްރީން ހުށަހެޅި ސިޓީގައި ސޮއިކޮށްފައިވާ ކްލަބްތަކުން އެދިފައިވަނީ އަސާސީ ގަވާއިދު އިސްލާހުކޮށް އިންތިހާބެއް ބޭއްވުމަށްޓަކައި ނޯމަލައިޒޭޝަން ކޮމިޓީއަކާ ތަން ހަވާލުކުރުމެވެ. ނަމަވެސް ބައްސާމް ވިދާޅުވީ އެއީ ފީފާ އަށް ވެސް ވަކި ހާލަތެއްގައި ކުރެވެން އޮންނަ ކަމެއް ކަމަށާއި، ނަމަވެސް އެފްއޭއެމްގެ އަސާސީ ގަވާއިދާ އެއްގޮތަށް ހުށަހަޅައިފި ނަމަ އެކްސްޓްރާ އޯޑިނަރީ ކޮންގްރެސް ބާއްވާނެ ކަމަށެވެ.

މީގެއިތުރުން ބައްސާމް ވިދާޅުވީ، ކްލަބްތަކުން ބޭނުންވަނީ ޖޫން މަހު ފެށޭ ފުޓްބޯޅަ ސީޒަނަށް ތައްޔާރުވާން ކަމަށާއި، ފުޓްބޯޅަ އާއިލާ އޮތީ ވަރަށް ބަދަހިކޮށް ކަމަށެވެ. އަދި އެ ކްލަބްތައް ބޭނުންވަނީ ފުޓްބޯޅަ ކުރިއެރުވުމަށް އެފްއޭއެމުގެ ލީޑާޝިޕަށް އެއްބާރުލުން ދޭން ކަމަށް ވެސް ބައްސާމް ވަނީ ވިދާޅުވެފައެވެ.

އެފްއޭއެމުން ބުނީ، ސިޓީގައި ސޮއިކުރުމުގެ އިހުތިޔާރު ލިބިގެންވާ 12 ކްލަބުގެ ތެރެއިން ހަތަރު ކްލަބަކުން އެފްއޭއެމްގެ މެނޭޖްމަންޓް ބަދަލު ކުރުމަށް ކަމަށް ބުނެ، ވަކި ބައެއްގެ ލާބަ އާއި މަންފާއަށްޓަކައި ގާނޫނާއި ހިލާފް އެންމެހައި މަސައްކަތްތަކުގައި ބައިވެރިނުވާނެ ކަމަށާއި، އެފަދަ އެއްވެސް ކަމެއްގެ އެ ކްލަބުތަކުގެ ބައިވެރިވުމެއް ނޯންނާނެކަމުގެ ފުރިހަމަ ޔަގީންކަން ސިޓީއަކުން އަރުވާފައިވާ ކަމަށެވެ.

އެގޮތުން އެފްއޭއެމުން ބުނީ، އެފްއޭއެމްގެ އެކްސްޓްރާ އޯޑިނަރީ ކޮންގްރެސް ބޭއްވުމަށް ބޭނުންވާ ގާނޫނީ އަދަދު ހަމަނުވާ ކަމަށާއި، ކްލަބްތަކުން ހުށަހަޅާފައިވާ ސިޓީ އާއި ވިކްޓްރީން ހުށަހެޅި ސިޓީ ފީފާއާ ހިއްސާ ކޮށްފައިވާ ކަމަށެވެ.

ނަމަވެސް ސޮއި އަނބުރާ ނެގި ކްލަބްތައް މިއަދާ ހަމައަށް ވެސް އެފްއޭއެމުން ހާމަކޮށްފައެއް ނުވެއެވެ.