ހާލަތާއި ގުޅިގެން ފަސްކުރި އެފްއޭއެމްގެ ކޮންގްރެސް މި މަހު ބާއްވަނީ

ކޮރޯނާވައިރަސް (ކޮވިޑް-19) އާ ގުޅިގެން ފަސްކުރި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބީ ކޮންގްރެސް މި ޖޫން މަހުގެ ތެރޭގައި ބޭއްވުމުގެ ފެހި ސިގްނަލް ލިބިފައިވާ ކަމަށާއި ކޮންގްރެސް މި މަހުގެ ތެރޭގައި ބޭއްވޭނެ ކަމުގެ ވަރަށް ބޮޑު އުންމީދެއް އެބައޮތް ކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

އެފްއޭއެމްގެ އިންތިޚާބީ ކޮންގްރެސް ބޭއްވުމަށް އެންމެ ފުރަތަމަ މަސައްކަތްކޮށްފައި ވަނީ މާޗު މަހުގެ 20 ވަނަ ދުވަހުގެރޭއެވެ. އެކަމަކު އެ ކޮންގްރެސް ނުބޭއްވުނީ ކޮވިޑް-19ން ރައްކާތެރިވުމުގެ ފިޔަވަޅެއްގެ ގޮތުން، ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާން ކޮށްފައި އޮތުމުންނެވެ.

އަސާސީ ގަވާއިދުގައި ބަޔާން ކޮށްފައިވާ އިންތިޚާބު ބާއްވަން ޖެހޭ ތާރީޚުގެ ނުވަ މަސް ދުވަސް ކުރިން އެފްއޭއެމްގެ އިންތިޚާބު ބޭއްވުމަށް އެ އިދާރާގެ ހިންގާ ކޮމިޓީން ނިންމާފައި ވަނީ ފެބްރުއަރީ މަހުގެ ހަތަރުވަނަ ދުވަހުއެވެ.

ރާއްޖެޓީވީގެ ކުޅިވަރު ފައިލް ޕްރޮގްރާމްގައި ވާހަކަ ދައްކަވަމުން ބައްސާމް ވިދާޅުވީ ކޮންގްރެސް ބާއްވާނީ ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ލިބެން ޖެހޭ ހުރިހާ ހުއްދަތަކާއެކު ރައްކާތެރިކަމުގެ ފިޔަވަޅުތައް ވެސް އަޅައިގެން ކަމާ ބެހޭ ފަރާތްތަކުގެ އެންގުމާއި އެއްގޮތަށް ކަމަށެވެ.

އެފްއޭއެމްގެ މަގާމުތަކަށް ކުރިމަތިލަން ހުޅުވާލި މުއްދަތު ހަމަވިއިރު ރައީސްގެ މަގާމަށް ބައްސާމް ފިޔަވައި އިތުރު ފަރާތަކުން ކުރިމަތިލާފައިނުވާއިރު، އެފްއޭއެމްގެ ރައީސް ކަމަށް އެހެން ފަރާތަކުން ކުރިމަތިލާފައި ނުވަނީ ކީއްވެތޯ ކުރެވުނު ސުވާލަކަށް ޖަވާބު ދެއްވަމުން ބައްސާމް ވިދާޅުވީ އެފްއޭއެމްގެ އިންތިޚާބު ކޮންމެ ހަތަރު އަހަރަކުން އޮންނާނެކަން އެއީ ކުޅިވަރުގައި އުޅޭ ކޮންމެ މީހަކަށް ވެސް އިނގޭނެ ކަމެއް ކަމަށާއި، އެހެން ކަމުން މަގާމުތަކަށް ކުރިމަތިލާނެ ފަރާތްތަކެއް ނެތީ އެކަމަށް ތައްޔާރުވެފައިވާ ބަޔަކު ނެތުމުން ކަމަށެވެ.

ބައްސާމަށް ތާއީދުކުރާކަން ފުރަތަމަ ޑިވިޝަނުގެ ގިނަ ކްލަބުތަކުން މީގެ ކުރިން ވަނީ ހާމަކޮށްފައެވެ. އޭގެ ތެރޭގައި މާޒިޔާ ސްޕޯޓްސް އެންޑް ރެކްރިއޭޝަނާއި، ޓީސީ ސްޕޯޓްސް ކްލަބާއި، ދަ ގްރާންޑޭ ސްޕޯޓްސް ކްލަބާއި، ޔުނައިޓެޑް ވިކްޓަރީ އާއި، ކްލަބު ގްރީން ސްޓްރީޓްސް އަދި ކްލަބު އީގަލްސް ހިމެނޭއިރު، ދެވަނަ ޑިވިޝަނުން ކްލަބު ވެލެންސިއާ އާއި ކްލަބު ޕީކޭ އާއި ޖޭޖޭ ސްޕޯޓްސް ކްލަބުވެސް ހިމެނެއެބެ.

އެފްއޭއެމްގެ އިންތިޚާބުގައި ރައީސް ކަމަށް ކުރިމަތިލާ ކެންޑިޑޭޓް، ހިންގާ ކޮމިޓީގެ އެހެން މަގާމުތަކަށް މެމްބަރުން ނޮމިނޭޓްކުރާއިރު، ވޯޓަށް އަހާނީ ޓީމެއްގެ ގޮތުގައެވެ. އެފްއޭއެމްގެ ސީނިއާ ނައިބު ރައީސްގެ މަގާމަށް ބައްސާމް ހުށަހަޅާފައިވަނީ މިހާރުގެ ޑެޕިއުޓީ ޖެނެރަލް ސެކްރެޓަރީ އަދި ގައުމީ ޓީމުގެ ކުރީގެ ފޯވާޑް އަލީ އުމަރެވެ. ނައިބު ރައީސަކަށް ހުށަހެޅުއްވީ މިހާރުގެ ހިންގާ ކޮމިޓީ މެމްބަރު އަދި މާޒިޔާގެ ސީއީއޯ ހުސެއިން ޝާފިއު (ކޮއްކީ) ގެ ނަމެވެ.

ހިންގާ ކޮމިޓީގެ އާންމު މެމްބަރުންގެ މަގާމުތަކަށް ހުށަހެޅުއްވީ މިހާރުގެ ސީނިއާ ނައިބު ރައީސް އަހުމަދު ޝަކީބް (ޑޮކް) އާއި، ކުރީގެ ސްޕޯޓްސް ކޮމިޝަނަރު އަހުމަދު ނަޝީދު (ޑޭވް) އާއި، މިހާރުގެ ހިންގާ ކޮމިޓީ މެމްބަރު އަދި އީގަލްސްގެ ޖެނެރަލް ސެކްރެޓަރީ މުފާވިޒް ހާޝިމް (މުފާ) އާއި، ގްރީން ސްޓްރީޓްސްގެ ރައީސް މުއާވިޔަތު ހަލީލާއި، އެފްއޭއެމްގެ ސީނިއާ މުވައްޒަފެއް ކަމަށްވާ އައިމިނަތު ޝާނީޒް (ޝާނީ) ގެ އިތުރުން މުހައްމަދު ޝިފާއުގެ ނަމެވެ.