އެމެރިކާ އަށް ކުރިމަތިވި ވަރުގަދަ ފިނީ ގެ ތޫފާނަކާ ގުޅިގެން 8,000 އަށްވުރެ ގިނަ ފްލައިޓް ކެންސަލްކޮށްފި

އެމެރިކާގެ ބޮޑު ސަރަހައްދަކަށް ކުރިމަތިވެފައިވާ ނުރައްކާތެރި ފިނި ތޫފާނާ ގުޅިގެން، މި ހަފުތާ ބަންދުގައި އޮޕަރޭޓް ކުރަން ހަމަޖެހިފައިވާ 8,000 އަށްވުރެ ގިނަ ފްލައިޓް ކެންސަލްކޮށްފި އެވެ. މި ތޫފާނުގެ ސަބަބުން ބޯކޮށް ސްނޯ ފޭބުމާއި، ޓެކްސަސް އިން ފެށިގެން ނޯތު ކެރޮލައިނާއާ ހަމައަށް ބޮޑެތި ގެއްލުންތަކެއް ލިބިދާނެ ފަދަ ގަނޑުފެނުގެ އަސަރު ކުރާނެ ކަމަށް ވަނީ ލަފާކޮށްފަ އެވެ.

ފްލައިޓްތަކުގެ ތަފާސްހިސާބު ބަލަހައްޓާ 'ފްލައިޓް އެވެއަރ' ވެބްސައިޓުން ހާމަކުރި ގޮތުގައި، ހޮނިހިރު ދުވަހު އެކަނިވެސް 3,400 އަށްވުރެ ގިނަ ފްލައިޓް ލަސްވެ ނުވަތަ ކެންސަލްވެފައިވެ އެވެ. އަދި އާދިއްތަ ދުވަހު 5,000 އަށްވުރެ ގިނަ ފްލައިޓް ވަނީ ކެންސަލްކޮށްފަ އެވެ.

ނިއު މެކްސިކޯ އިން ފެށިގެން ނިއު އިންގްލެންޑާ ހަމައަށް ގާތްގަނޑަކަށް 140 މިލިއަން މީހުންނަށް މި ތޫފާނުގެ އިންޒާރު ނެރެފައިވެ އެވެ. މޫސުމާ ބެހޭ މާހިރުން ވިދާޅުވާ ގޮތުގައި، މި ތޫފާނުގެ ސަބަބުން ލިބޭ ގެއްލުންތައް، ޚާއްޞަކޮށް ގަނޑުފެން ފައިބާ ސަރަހައްދުތަކުގައި، ބާރުގަދަ 'ހަރިކޭން' އެއްގެ ގެއްލުންތަކާ އެއްވަރުވުން އެކަށީގެންވެ އެވެ.

މޫސުމާ ބެހޭ މާހިރެއް ކަމަށްވާ ޖޭކޮބް އެޝާމަން ރޮއިޓާސް ނިއުސް އެޖެންސީ އަށް މައުލޫމާތު ދެއްވަމުން ވިދާޅުވީ، މިއީ މި ސީޒަނުގައި މިހާތަނަށް ކުރިމަތިވި އެންމެ ބާރުގަދަ އަދި އެންމެ ފުޅާ ސަރަހައްދަކަށް އަސަރުކުރާނެ ތޫފާނެވެ. ޑޭކޯޓާސް އަދި މިނެސޯޓާ ފަދަ ސަރަހައްދުތަކުގައި ފިނިމިން މައިނަސް 45 ޑިގްރީ ސެލްސިއަސް އަށް ވުރެ ދަށަށް ގޮސްފައިވާއިރު، އެކަށީގެންވާ ރައްކާތެރި ހެދުން ނާޅައި ބޭރުގައި އުޅުމަކީ ވަރަށް އަވަހަށް ހަށިގަނޑުގެ ފިނިމިން ދަށްވެ، ފުރާނައަށް ނުރައްކާވެދާނެ ކަމެއް ކަމަށް އޭނާ އިންޒާރު ދެއްވިއެވެ.

ލޫސިއާނާ، މިސިސިޕީ އަދި ޓެނެސީ ފަދަ ސްޓޭޓްތަކަށް މި ތޫފާނުގެ އަސަރު އެންމެ ބޮޑަށް ކުރާނެ ކަމަށް ބެލެވެ އެވެ. މި ސަރަހައްދުތަކުގައި ބޯކޮށް ގަނޑުފެން ފޭބުމުގެ ސަބަބުން ގަސްގަހާގެއްސަށާއި، ކަރަންޓުލައިންތަކަށާއި މަގުތަކަށް ބޮޑެތި ގެއްލުންތަކެއް ލިބުމުގެ ބިރު ވަނީ ހީވެފަ އެވެ.

އެމެރިކާގެ 12 އަށްވުރެ ގިނަ ސްޓޭޓެއްގެ ގަވަރުނަރުން ވަނީ ކުއްލި ނުރައްކަލުގެ ހާލަތު އިއުލާނު ކުރައްވައި، ރައްޔިތުން ގޭގައި ތިބުމަށް އިލްތިމާސް ކުރައްވާފަ އެވެ. ޓެކްސަސްގެ ގަވަރުނަރު ގްރެގް އެބޮޓް ވަނީ މަގުތަކުގެ ރައްކާތެރިކަމަށް ފިޔަވަޅު އަޅަމުންދާ ކަމަށާއި، ވީވަރަކުން ބޭރަށް ނުނިކުމެ ގޭގައި ތިބުމަށް އެދިވަޑައިގެންފަ އެވެ. ކަރަންޓު ފޯރުކޮށްދޭ ކުންފުނިތަކުން ވެސް ދަނީ ކަރަންޓު މެދުކެނޑިދާނެ ހާލަތަކަށް ތައްޔާރުވަމުންނެވެ.

ރައީސް ޑޮނަލްޑް ޓްރަމްޕް ސޯޝަލް މީޑިއާ މެދުވެރިކޮށް ވިދާޅުވި ގޮތުގައި، ސަރުކާރުން ދަނީ ސްޓޭޓްތަކުގެ އިސްވެރިންނާ ގުޅިގެން މަސައްކަތް ކުރަމުންނެވެ. އަދި ފެޑެރަލް އިމަޖެންސީ މެނޭޖްމަންޓް އެޖެންސީ އޮތީ މި ހާލަތަށް އިޖާބަ ދިނުމަށް ފުރިހަމަ އަށް ތައްޔާރުވެގެން ކަމަށް އޭނާ ވިދާޅުވި އެވެ.

މި ތޫފާނަކީ ދާދި ފަހުން މަގާމާ ހަވާލުވެވަޑައިގެންނެވި ނިއު ޔޯކްގެ މޭޔަރު ޒޮހްރާން މަމްދާނީ އަށް ކުރިމަތިވާނެ ފުރަތަމަ ބޮޑު އިމްތިހާނެވެ. އޭނާ ވިދާޅުވި ގޮތުގައި، އާދިއްތަ ދުވަހު ވެހޭނެ ކަމަށް ބެލެވޭ ބޯ ސްނޯއާ ކުރިމަތިލުމަށް ސިޓީގެ ކަމާ ބެހޭ މުވައްޒަފުން ވަނީ "ގައުމުގެ އެންމެ ބޮޑު ސްނޯއާ ދެކޮޅަށް މަސައްކަތްކުރާ ފައުޖަށް" ބަދަލުވެ، ފުރިހަމައަށް ތައްޔާރުވެފަ އެވެ.