އެމެރިކާގައި ޓްރަމްޕް ސަރުކާރުން ހިންގަމުންދާ ހަރުކަށި އިމިގްރޭޝަން އޮޕަރޭޝަންތަކާ ދެކޮޅަށް އެތައް ހާސް ބަޔަކު ނިކުމެ މުޒާހަރާކޮށްފި

އެމެރިކާގެ މިނިއަޕޮލިސްގައި ޓްރަމްޕް ސަރުކާރުން ހިންގަމުންދާ ހަރުކަށި އިމިގްރޭޝަން އޮޕަރޭޝަންތަކާ ދެކޮޅަށް، ގަދަ ފިނީ ގައި އެތައް ހާސް ބަޔަކު ނިކުމެ ހުކުރު ދުވަހު މުޒާހަރާކޮށްފި އެވެ.

އިމިގްރޭޝަން ގާނޫނާ ޚިލާފުވި ކަމަށް ތުހުމަތު ކޮށް ފަސް އަހަރުގެ ކުޑަކުއްޖަކު ހައްޔަރުކުރުމާ ގުޅިގެން އުފެދުނު ބޮޑު ނުރުހުމުގައި، އެ ސިޓީގެ ގިނަ ވިޔަފާރިތަކެއް ބަންދުކޮށް، މި އިހުތިޖާޖުގައި ވަނީ ބައިވެރިވެފަ އެވެ.

މިނެސޯޓާގައި ފެޑަރަލް އިމިގްރޭޝަން އިދާރާ އިން ހަފުތާތަކެއް ވަންދެން ހިންގަމުންދާ އޮޕަރޭޝަނާ ދެކޮޅު ހެދުމުގެ ގޮތުން، ގިނަ އަދަދެއްގެ ރެސްޓޯރެންޓްތަކާއި، މުނިފޫހިފިލުވާ ތަންތަނުގެ އިތުރުން އެކި ވިޔަފާރިތައް ވަނީ އެއް ދުވަހުގެ މުއްދަތަށް ހުއްޓާލާފަ އެވެ.

ބައްޕަ ހައްޔަރުކުރަން އުޅުނު އިމިގްރޭޝަން އޮޕަރޭޝަންގެ ތެރެއިން، ފަސް އަހަރުގެ ލިއަމް ކޮނޭޖޯ ރާމޯސް ބިރުން ހުއްޓާ އޮފިސަރުން އޭނާ ހިފަހައްޓައިގެން ތިބި މަންޒަރު ފެންނަ ފޮޓޯތަކާއެކު އާންމުންގެ ރުޅިވެރިކަން ވަނީ އިންތިހާއަށް އިތުރުވެފަ އެވެ. މި އޮޕަރޭޝަންގެ ތެރޭގައި އޮފިސަރެއްގެ ބަޑީގެ ހަމަލާއެއްގައި އެމެރިކާގެ ރައްޔިތަކު މަރުވެފައިވާކަން ވެސް ފާހަގަކުރެވެ އެވެ.

ރާމޯސް ކިޔަވަމުންދިޔަ ކޮލަމްބިއާ ހައިޓްސް ޕަބްލިކް ސްކޫލްގެ ސުޕްރިންޓެންޑެންޓް ޒީނާ ސްޓެންވިކް ވިދާޅުވި ގޮތުގައި، ހިމާޔަތަށް އެދިފައިވާ ރާމޯސް އާއި އޭނާގެ ބައްޕަ އެޑްރިއަން ކޮނޭޖޯ އޭރިއަސް ހައްޔަރުކުރީ އަންގާރަ ދުވަހު އެމީހުން ދިރިއުޅޭ ގޭގެ ދޮރުމަތިންނެވެ. އަދި ގޭގެ އެތެރޭގައި ތިބި މީހުން ބޭރަށް ނެރުމަށްޓަކައި، އޮފިސަރުން އެ ކުޑަކުއްޖާ "އެންގަނޑެއްގެ" ގޮތުގައި ބޭނުންކުރި ކަމަށް ވެސް އޭނާ ތުހުމަތުކުރެއްވި އެވެ.

މުޒާހަރާގެ ބައިވެރިއަކު ބުނިގޮތުގައި، ހައްގުތަކަށްޓަކައި މަސައްކަތް ނުކޮށްފިނަމަ އަނިޔާވެރިކަން ކުރި ހޯދާނެ އެވެ. ބައެއް މީހުން ވަނީ ހައްޔަރުކުރި ކުއްޖާގެ އުމުރަށް އިޝާރާތްކޮށް، ކުޑަކުދިންނާ މެދު މިފަދަ އިހާނެތިކޮށް އަމަލުކުރާތީ ކަންބޮޑުވުން ފާޅުކޮށްފަ އެވެ.

ރައީސް ޑޮނަލްޑް ޓްރަމްޕްގެ ސަރުކާރުން ގަވާއިދާ ހިލާފަށް އުޅޭ މީހުން ގައުމުން ބޭރުކުރުމަށް ހިންގާ ކެމްޕޭންގެ ދަށުން، އެތައް ހާސް އިމިގްރޭޝަން (އައިސް) އެޖެންޓުންނެއް މިނިއަޕޮލިސް އަށް ވަނީ ފޮނުވާފަ އެވެ.

ބުރާސްފަތި ދުވަހު މިނިއަޕޮލިސް އަށް ކުރެއްވި ޒިޔާރަތެއްގައި ނައިބު ރައީސް ޖޭޑީ ވޭންސް ވަނީ ރާމޯސް ބަންދުގައި ހުރިކަން ކަށަވަރުކޮށްދެއްވާފަ އެވެ. ނަމަވެސް، އޭނާ ވިދާޅުވީ އެ ކުއްޖާގެ ބައްޕަ އޮފިސަރުންނަށް ފިލަން މަސައްކަތް ކުރުމުން، ކުއްޖާގެ ސަލާމަތަށްޓަކައި އޭނާ ބެލުމުގެ ދަށަށް ގެންދަން ޖެހުނީ ކަމަށެވެ. 

އދ. ގެ ހިއުމަން ރައިޓްސް ޗީފް ވޮލްކާރް ޓާރކް ވަނީ އެމެރިކާގެ ކަމާބެހޭ ފަރާތްތަކުން ހިޖުރަކުރާ މީހުންނާއި ރެފިއުޖީންނާ މެދު އަމަލުކުރާ އިހާނެތި ގޮތްތައް ހުއްޓާލުމަށް ގޮވާލައްވާފަ އެވެ.

ކުއްޖާގެ ބައްޕަ މިހާރު ހުރީ ޓެކްސަަސްގެ މަރުކަޒެއްގައި ބަންދު ކޮށްފަ އެވެ. ނަމަވެސް، 18 އަހަރުން ދަށުގެ ކުދިން ތިބޭ ތަންތަނުގެ މައުލޫމާތު އާންމު ނުކުރާތީ، އެ ކުޑަކުއްޖާ މިހާރު ހުރީ ކޮންތަނެއްގައި ކަމެއް ސާފެއް ނުވެ އެވެ.