ޗައިނާ އާ އެކު ވިޔަފާރީގެ އެއްބަސްވުމެއް ގާއިމުކޮށްފި ނަމަ ކެނެޑާ އިން އެމެރިކާ އަށް އެތެރެކުރާ މުދަލުން ސަތޭކަ އިންސައްތަ ޑިއުޓީ ނަގާނެ ކަމުގެ އިންޒާރު ޓްރަމްޕް ދެއްވައިފި
24 ޖެނުއަރީ 2026 | ހޮނިހިރު 18:442025 ވަނަ އަހަރުގެ ޖެނުއަރީ މަހު ރަސްމީކޮށް މަގާމާ ހަވާލުވެވަޑައިގަތުމުގެ ކުރިންވެސް ޓްރަމްޕް ގެންދެވީ ކެނެޑާގެ މުދަލުން ބޮޑު ޓެކްސްއެއް ނަގާނެ ކަމުގެ އިންޒާރު ދެއްވަމުންނެވެ. އަދި ކެނެޑާއަކީ އެމެރިކާގެ 51 ވަނަ ސްޓޭޓަށް ވުމަށް ބޭނުންފުޅުވާ ކަމަށްވެސް އެކި ފަހަރުމަތިން އޭނާ ވަނީ ވިދާޅުވެފަ.
އެމެރިކާގެ ރައީސް ޑޮނަލްޑް ޓްރަމްޕާއި ކެނެޑާގެ ބޮޑުވަޒީރު މާކް ކާނީ. | އޭއެފްޕީ
ކެނެޑާގެ ބޮޑުވަޒީރު މާކް ކާނީ ޗައިނާއާއެކު ވިޔަފާރީގެ އެއްބަސްވުމެއް ގާއިމުކުރަން ނިންމަވައިފި ނަމަ، ކެނެޑާ އިން އެމެރިކާ އަށް އެތެރެކުރާ މުދަލުން ސަތޭކަ އިންސައްތަ ޓެރިފް ނުވަތަ އިމްޕޯޓް ޑިއުޓީ ނަގާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ.
ހޮނިހިރު ދުވަހުގެ ހެނދުނު "ޓްރުތް ސޯޝަލް" މެދުވެރިކޮށް ދެއްވި މެސެޖެއްގައި ޓްރަމްޕް ވިދާޅުވީ، ޗައިނާގެ މުދަލާއި އުފެއްދުންތައް އެމެރިކާ އަށް ފޮނުވުމަށް ބޭނުންކުރާ "މަގަކަށް" ކެނެޑާ ހެދޭނެ ކަމަށް ކާނީ ގަބޫލުކުރައްވާ ނަމަ، އެއީ ވަރަށް ބޮޑު ކުށްހީއެއް ކަމަށެވެ.
"ކެނެޑާ އިން ޗައިނާއާއެކު އެއްބަސްވުމެއް ގާއިމުކޮށްފި ނަމަ، އެމެރިކާ އަށް އެތެރެކުރާ ކެނެޑާގެ ހުރިހާ މުދަލަކާއި އުފެއްދުންތަކުން ވަގުތުން ސަތޭކަ އިންސައްތަ ޓެރިފް ނަގަން ފަށާނަން،" ކާނީއަށް ބޮޑުވަޒީރުގެ ބަދަލުގައި "ގަވަރުނަރު" ގެ ނަމުން މުހާތަބު ކުރައްވަމުން ޓްރަމްޕް ލިޔުއްވާފައިވެ އެވެ.
މި އިންޒާރު އައިސްފައިވަނީ، މި ހަފުތާގައި ސްވިޒަލޭންޑްގެ ޑާވޯސްގައި ބޭއްވި ވޯލްޑް އިކޮނޮމިކް ފޯރަމްގައި ކާނީ ދެއްވި ތަގުރީރަކާ ގުޅިގެން ކެނެޑާ އާއި އެމެރިކާ އާ ދެމެދު ނުތަނަވަސްކަން ބޮޑުވެފައިވާ ދަނޑިވަޅެއްގަ އެވެ. ކާނީގެ އެ ތަގުރީރަކީ ޓްރަމްޕްގެ ސަރުކާރުގެ ސިޔާސަތުތަކަށް އަމާޒުކުރެއްވި ރައްދު ހަމަލާއެއްގެ ގޮތުގައި ގިނަ ބަޔަކު ދެކެ އެވެ.
"އަޅުގަނޑުމެން މިތިބީ ބަދަލުވުމުގެ މަރުހަލާއެއްގައެއް ނޫން، އަޅުގަނޑުމެން މިތިބީ ގުޅުންތައް ކެނޑިގެންދާ މަރުހަލާއެއްގައި،" ބިރުދެއްކުންތަކާއި މަޖުބޫރުކުރުންތަކާ ކުރިމަތިލާއިރު ދުނިޔޭގެ "މެދުފަންތީގެ ބާރުތަކުން" އެއްބާރުލުން އިތުރުކުރުމަށް ގޮވާލައްވަމުން ޑާވޯސް ގައި ކާނީ ވިދާޅުވި އެވެ.
ބޮޑުވަޒީރުގެ މި ވާހަކަފުޅުތަކާ ގުޅިގެން ޓްރަމްޕްގެ ނުރުހުން ވަނީ ވަރަށް ބޮޑަށް އަމާޒުވެފަ އެވެ. "ކެނެޑާ ދެމިއޮތީ އެމެރިކާގެ ސަބަބުން،" ކަމަށް ވިދާޅުވަމުން ޓްރަމްޕް ވަނީ ދެން ފަހަރަކުން ބަޔާނެއް ދެއްވާއިރު އެކަން ހަނދާން ބެހެއްޓުމަށް ކާނީއަށް އިންޒާރު ދެއްވާފަ އެވެ.
މީގެ އިތުރުން، ޓްރަމްޕް އުފައްދަވާފައިވާ "ބޯޑް އޮފް ޕީސް" ގައި ބައިވެރިވުމަށް ކާނީ އަށް ދެއްވާފައިވާ ދައުވަތު ވެސް މި ހަފުތާގައި ވަނީ އަނބުރާ ގެންދަވާފަ އެވެ.
2025 ވަނަ އަހަރުގެ ޖެނުއަރީ މަހު ރަސްމީކޮށް މަގާމާ ހަވާލުވެވަޑައިގަތުމުގެ ކުރިންވެސް ޓްރަމްޕް ގެންދެވީ ކެނެޑާގެ މުދަލުން ބޮޑު ޓެކްސްއެއް ނަގާނެ ކަމުގެ އިންޒާރު ދެއްވަމުންނެވެ. އަދި ކެނެޑާއަކީ އެމެރިކާގެ 51 ވަނަ ސްޓޭޓަށް ވުމަށް ބޭނުންފުޅުވާ ކަމަށްވެސް އެކި ފަހަރުމަތިން އޭނާ ވަނީ ވިދާޅުވެފަ އެވެ.
