ފުރަތަމަ ލެގުގައި ޗެލްސީ ބަލިކޮށް އާސެނަލް އިން އުންމީދުގައި

ކަރަބޯ ކަޕްގެ ސެމީ ފައިނަލްގެ ފުރަތަމަ ލެގުގައި ޗެލްސީ ބަލިކޮށް، އާސެނަލް އިން މުބާރާތުގެ ފައިނަލްގެ އުންމީދު ބޮޑު ކޮށްފި އެވެ. 

ޗެލްސީގެ އަމިއްލަ ދަނޑުގައި ބުދަ ދުވަހުގެ ރޭ ދަންވަރު ކުޅުނު މެޗު އާސެނަލް އިން ކާމިޔާބު ކުރީ 3-2 އިންނެވެ. މެޗުގެ ފުރަތަމަ ހާފުގައި އާސެނަލް އިން އެއް ލަނޑު ޖަހައި ލީޑު ނެގިއިރު، އަނެއް ދެ ލަނޑު ޖެހީ ދެ ވަނަ ހާފުގަ އެވެ. ޗެލްސީ އިން އެ ޓީމުގެ ދެ ލަނޑު ވެސް ޖެހީ ދެ ވަނަ ހާފުގަ އެވެ.

މެޗު ފަށައިގެން ހަތް ވަނަ މިނެޓުގައި އާސެނަލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ބެން ވައިޓް އެވެ. އެއީ ޑެކްލަން ރައިސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. މެޗުގެ ދެ ވަނަ ހާފު ފަށައިގެން ހަތަރު ވަނަ މިނެޓުގައި އާސެނަލްގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ވިކްޓާ ޔޮކަރޭސް އެވެ.

އާސެނަލް އިން ދެ ލަނޑު ޖެހި ފަހުން، މެޗުގެ 57 ވަނަ މިނެޓުގައި އަލެހާންދްރޯ ގާނާޗޯ ވަނީ ޗެލްސީގެ ފުރަތަމަ ލަނޑު ޖަހައި ފަރަގު ކުޑަ ކޮށްފަ އެވެ. އޭގެ ފަހުން މެޗުގެ 71 ވަނަ މިނެޓުގައި މާޓިންް ޒުބިމެންޑީ ވަނީ އާސެނަލްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. މެޗުގައި ޗެލްސީގެ ދެ ވަނަ ލަނޑު 83 ވަނަ މިނެޓުގައި ޖެހީ ވެސް ގާނާޗޯ އެވެ.

މޮޅާ އެކު އާސެނަލް އިން މުބާރާތުގެ ފައިނަލްގެ އުންމީދު ބޮޑު ކޮށްފައިވާއިރު، ދެ ވަނަ ލެގު އޮތީ އާސެނަލްގެ އަމިއްލަ ދަނޑުގަ އެވެ. އެ މެޗުން ބަލި ނުވެ ފަރު ޖައްސާލައިގެން އާސެނަލް އަށް މުބާރާތުގެ ފައިނަލްގެ ޖާގަ ހޯދޭނެ އެވެ. 

މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފައި ވަނީ، ޗެލްސީ އަކީ ވަރުގަދަ އިިދިކޮޅު ޓީމެއް ކަަމަށެވެ. އާޓެޓާ ބުނީ ޗެލްސީއާ ދެކޮޅަށް ކުޅުނު މެޗަކީ ވާދަވެރި މެޗެއް ކަމަށާއި، ދަނޑު މަތިން އެކަން ފެނުނު ކަމަށެވެ. ނަމަވެސް، އާސެނަލްގެ ކުޅުންތެރިން މެޗު ކޮންޓްރޯލް ކޮށްގެން ވަރަށް ރަނގަޅަށް ކުޅުނުއިރު، ހަތަރު ވަަނަ ލަނޑެއް ޖަހާނެ ފުރުސަތު ވެސް އެ ޓީމަށް ލިބުނު ކަމަށް އާޓެޓާ ބުންޏެވެ.

ފުރަތަމަ ލެގު ކާމިޔާބު ކުރެވުނު ނަމަވެސް، އާޓެޓާ ބުނީ މިއީ އަދި ހާފު ޓައިމް ކަމަށެވެ. އޭނާ ބުނީ ދުވަސް ތަކެއް ފަހުން އާސެނަލްގެ އަމިއްލަ ދަނޑުގައި ދެ ވަނަ ލެގަށް ނިކުންނަން ޖެހޭ ކަމަށާއި، މުޅިން ހަމަޖެހުމެއް އޮތީ އެ މެޗުން ވެސް މޮޅުވެގެން ކަމަށެވެ. އެ މެޗަށް ވެސް ސަމާލުވާން ޖެހޭނެކަން ފާހަގަކޮށް އާޓެޓާ ބުނީ، ޗެލްސީ އަކީ ވަރުގަދަ ޓީމަކަަށްވާއިރު، އެއްވެސް ކަމެއް ފަސޭހަކޮށްގެން ނުވާނެ ކަމަަށެވެ.