އިތުރު ފަސް އަހަރަށް، އާސެނަލްގެ އެއްބަސްވުން އައު ކުރަން ސަކާ އެއްބަސްވެއްޖެ

އާސެނަލް އަށް ކުޅެމުން އަންނަ އިންގްލެންޑުގެ ބުކަޔޯ ސަކާ، އެ ކުލަބުގެ އެއްބަސްވުން އައު ކުރަން އެއްބަސްވެއްޖެ ކަމަށް ރިޕޯޓުތައް ބުނެފި އެވެ.

އުމުރުން 24 އަހަރުގެ ކުޅުންތެރިޔާ އޭނާގެ ސީނިއަރ ކެރިއަރު ފެށީ ވެސް އާސެނަލް އިންނެވެ. 2018 ވަނަ އަހަރު ސަކާ އޭނާގެ ސީނިއަރ ކެރިއަރު އާސެނަލް އިން ފަށާފައިވާއިރު، އެންމެ ފަހުން އާސެނަލްއާ އެކު ސަކާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2027 ވަނަ އަހަރު އެވެ. އެއްބަސްވުމުގެ މުއްދަތު ހަމަވާން އަހަރެއް އޮތް ނަމަވެސް، އާސެނަލް އިން ވަނީ ސަކާގެ އެއްބަސްވުން އައު ކުރުމުގެ މަަސައްކަތް މިދިޔަ އަހަރުގެ ތެރޭގައި ފަށައިފަ އެވެ.

ގިނަ މަޝްވަރާ ތަކަށް ފަހު، ސަކާ ވަނީ އާސެނަލް އާއެކު އައު އެއްބަސްވުމެއްގައި ސޮއި ކުރުމަށް އެއްބަސްވެފަ އެވެ. އެގޮތުން އިތުރު ފަސް އަހަރަށް އާސެނަލްގައި މަޑު ކުރަން ނިންމައި، އާސެނަލްގައި އެއްބަސްވުމުގައި ސަކާ ވަރަށް އަވަހަށް ސޮއި ކުރާނެ އެވެ. އަދި އެ ކުލަބުން އެކަން ރަސްމީކޮށް އިއުލާން ކުރުމަށް ވެސް ހަަމަޖެހިފައިވެ އެވެ. އެހެންކަމުން، އާސެނަލް އާއެކު ސަކާ ސޮއި ކުރާ އައު އެއްބަސްވުމުގެ މުއްދަތު ހަމަވާނީ 2031 ވަނަ އަހަރުގެ ޖޫން މަހުގެ ނިޔަލަށެވެ.

ސަކާ ވަނީ މިހާތަނަށް އާސެނަލް އާއެކު ހޭދަކޮށްފައިވާ އަށް ސީޒަންގެ ތެރޭގައި، އެ ކުލަބަށް 290 މެޗު ކުޅެދީ 77 ލަނޑު ޖަހައިފަ އެވެ. އާސެނަލް އާއެކު އޭނާ ވަނީ ތިން ތައްޓެއް ވެސް ކާމިޔާބު ކޮށްފަ އެވެ. އެގޮތުން އެފްއޭ ކަޕް އެއް ފަހަރު ކާމިޔާބު ކުރުމުގެ އިތުރުން، އެފްއޭ ކޮމިއުނިޓީ ޝީލްޑު ދެ ފަހަރު ވަނީ ކާމިޔާބު ކޮށްފަ އެވެ. ޔުއެފާ ޔޫރޮޕާ ލީގުގައި ފައިނަލްގައި ކުޅުނު ނަމަވެސް، ޗެލްސީއާ ވާދަކޮށް ވަނީ ބަލިވެފަ އެވެ. 

މީޑީއާ ތަކުގައި ބުނެފައިވާ ގޮތުން، ސަކާގެ އެއްބަސްވުން އައުކޮށް އާސެނަލްގައި އޭނާ ބަހައްޓަން އެންމެ ބޮޑަށް ބާރު އަޅާފައި ވަނީ އެ ޓީމުގެ ކޯޗު މިކޭލް އާޓެޓާ އެވެ. ޚާއްސަކޮށް ސަކާ އަކީ އާޓެޓާގެ ޕްލޭންގައި ހިމެނޭ މުހިންމު ކުޅުންތެރިޔަކަށްވާއިރު، ސަކާ އެ ކުލަބުގައި ހުރުމަކީ އާޓެޓާ ވަރަށް ބޮޑަށް ބޭނުންވާ ކަމެއް ކަމަށް ފާހަގަ ކޮށްފައިވެ އެވެ. މީގެ ކުރިން އެކި ފަހަރު މަތިން އާޓެޓާ ވަނީ ސަކާގެ ހުނަރާއި، އޭނާގެ މޮޅު ކަމަށް ތައުރީފު ކޮށްފަ އެވެ.

އައު އެއްބަސްވުމުގެ ދަށުން އާސެނަލް އިން ސަކާ އަށް ދެމުން އަންނަ މުސާރަ ވެސް ބޮޑު ވާނެ ކަމަށް ރިޕޯޓު ތަކުގައި ވަނީ ފާހަގަ ކޮށްފަ އެވެ. އައު އެއްބަސްވުމާ ގުޅޭ ގޮތުން ސުވާލު ކުރުމުން މީގެ ކުރިން ސަކާ ބުނެފައި ވަނީ، އާސެނަލްގެ ބެޖުގައި މޮޅުވެ، ތަށި ތަކެއް ކާމިޔާބު ކުރަން އޭނާ ބޭނުންވާ ކަމަށެވެ. އެހެން ނަމަވެސް، އެއްބަސްވުން އައު ކުރުމުގެ ކަންތަކުގައި އަވަސް އަރުވާ ނުލާނެ ކަމަށް ވެސް ސަކާ ބުނެފައިވެ އެވެ.