ބަހަނާއެއް ނެތް، މިއައީ މޮޅުވާން: ރޮސެނިއާ

ޗެލްސީގެ ކޯޗުކަމާ ހަވާލުވުމަށް ފަހު އެއްވެސް ބަހަނާއެއް ދެއްކުމެއް ނެތް ކަމަށާއި، އެ ކުލަބާ ހަވާލުވީ މޮޅުވާން ކަމަށް ރޮސެނިއާ ބުނެފި އެވެ.

ޗެލްސީގެ ކޯޗު ކަމުގައި އެންމެ ފަހުން ހުރި އެންޒޯ މަރެސްކާ ކުއްލި ގޮތަކަށް ވަކިވެފައިވާއިރު، ޗެލްސީ އިން ވަނީ އެ ޓީމުގެ ކޯޗަކަށް ރޮސެނިއާ ހަމަޖައްސައިފަ އެވެ. އެގޮތުން ޗެލްސީ އިން ވަނީ އޭނާ އާއެކު ހަ އަހަރާއި ބައިގެ އެއްބަސްވުމެއްގައި ސޮއި ކޮށްފަ އެވެ. އިނގިރޭސި ޕްރިމިއަރ ލީގުގައި ޗެލްސީ އިން ފުލަމްއާ ދެކޮޅަށް ކުޅުނު މެޗަށް ފަހު، އޭނާ އަންނަނީ ޓީމާ އެކު މަސައްކަތް ކުރަމުންނެވެ.

ޗެލްސީއާ ހަވާލުވުމާ ގުޅޭ ގޮތުން ވާހަކަ ދައްކަމުން ރޮސެނިއާ ބުނެފައި ވަނީ، ސީޒަންގެ މެދު ތެރެއިން ޗެލްސީގެ ކޯޗުކަމާ ހަވާލުވާން ޖެހުމަކީ މައްސަލައެއް ނޫން ކަމަށެވެ. އަދި އެކަމުގައި އެއްވެސް ބަހަނާއެއް ދައްކަން ބޭނުންވާ ނުވާ ކަމަށާއި، ބޭނުން ވަނީ ޗެލްސީ އާއެކު މޮޅުވާން ކަމަށް ވެސް އޭނާ ބުންޏެވެ.

މީގެ އިތުރުން ޗެލްސީގައި އޮތް ޕްރޮޖެކްޓަކީ ހަމައެކަނި މޮޅުވުމަށް އޮތް ޕްރޮޖެކްޓެއް ކަމަށް އޭނާ ބުންޏެވެ. އެއީ ކޮންމެ ކޮންމެ ގޮތަކަށް އޮތް ޕްރޮޖެކްޓެއް ނޫންކަން ފާހަގަކޮށް އޭނާ ބުނީ، ބޭނުން ވަނީ ޗެލްސީގެ އަމާޒާ އެއްގޮތަށް ތަށި ތަކެއް ހޯދައިދީ، ކާމިޔާބީ ގެނެސްދިނުން ކަމަށެވެ. އެކަމުގައި ދިމާވާނެ ގޮންޖެހުންތަކާއި، ކުރިމަތި ވާނެ ޕްރެޝަރު ވެސް ވަޒަން ކުރެވޭ ކަމަށް އޭނާ ބުންޏެވެ.

ރޮސެނިއާ ބުނީ ޗެލްސީގައި އޭނާ ހުންނަނީ ހަތަރު އަހަރު، ނުވަތަ ފަސް އަހަރު، ނުވަތަ ހަ އަހަރަށް ކަމަށް ވިޔަސް، ޗެލްސީ އަކީ ކާމިޔާބު ކުލަބެއްގެ ގޮތުގައި ދިގު މުއްދަތެއް ވަންދެން ދެމި އޮންނާނެ ކަމަށެވެ. އޭނާ ބުނީ ޗެލްސީ އަށް އިރުޝާދު ދިނުމަކީ ފަސޭހަ ކަމެއް ނޫން ކަމަށާއި، އެ ވަޒީފާ އަކީ ވެސް ފަސޭހަ ވަޒީފާއެއް ނޫން ކަމަށް ޤަބޫލު ކުރާ ކަމަށެވެ.

ޗެލްސީގެ ކޯޗުކަމާ ހަވާލުވުމުގެ ކުރިން ރޮސެނިއާ ހުރީ ސްޓްރާސްބޯގެ ކޯޗުކަމުގެ މަގާމުގަ އެވެ. އެ ކުލަބަށް އޭނާ ވަނީ 63 މެޗެއްގައި އިރުޝާދު ދީފަ އެވެ. އޭގެ ތެރެއިން 31 މެޗުން އެ ޓީމު މޮޅުވެފައިވާއިރު، 15 މެޗުން ބަލިވެ އަނެއް 17 މެޗުން ވަނީ އެއްވަރުވެފަ އެވެ. ޑާބީ ކައުންޓީގެ ވަގުތީ ކޯޗެއްގެ ގޮތުގައި ކޯޗިން ކެރިއަރު ފެށި ރޮސެނިއާ ވަނީ، ހަލް ސިޓީ އަށް ވެސް އިރުޝާދު ދީފަ އެވެ.