އެމެރިކާ އަށް ކުރިމަތިވި ބާރުގަދަ ފިނީގެ ތޫފާނެއްގެ ސަބަބުން 160،000 އަށްވުރެ ގިނަ ގޭބިސީން ކަރަންޓުގެ ހިދުމަތް މެދުކެނޑި، އެތައް ހާސް ފްލައިޓްތަކެއް ކެންސަލްކުރަން ޖެހިއްޖެ

އެމެރިކާ އަށް ކުރިމަތިވި ބާރުގަދަ ފިނީގެ ތޫފާނެއްގެ ސަބަބުން 160،000 އަށްވުރެ ގިނަ ގޭބިސީން ކަރަންޓުގެ ހިދުމަތް މެދުކެނޑި، އެތައް ހާސް ފްލައިޓްތަކެއް ކެންސަލްކުރަން ޖެހިއްޖެއެވެ.

އެމެރިކާގެ ހުޅަނގުން ޓެކްސަަސްއާ ހަމައަށް ފެތުރިފައިވާ މި ނުރައްކާތެރި ތޫފާނުގެ ސަބަބުން، ހޮނިހިރު ދުވަހު އެކަނިވެސް 4،000 އަށްވުރެ ގިނަ ފްލައިޓް ވަނީ ކެންސަލްކޮށްފައެވެ. އަދި މި ތޫފާނުގެ ސަބަބުން އެމެރިކާގެ އިރުމަތީގެ ސްޓޭޓްތަކަށް ބޯކޮށް ސްނޯ ފައިބައި، އެ ސަރަހައްދުތަކުގެ ދަތުރުފަތުރުގެ ނިޒާމު މުޅިން ހުއްޓުމަކަށް އަތުވެދާނެ ކަމުގެ ބިރު ވަނީ ހީވެފައެވެ.

މޫސުމާ ބެހޭ މާހިރުން ލަފާކުރާ ގޮތުގައި، ގަނޑުފެނާއި، ސްނޯ އަދި އިންތިހާއަށް ފިނިގަދަ ވަޔާއެކު މި ތޫފާން އާދިއްތަ ދުވަހުން ފެށިގެން ކުރިއަށް އޮތް ހަފުތާގެ ތެރޭގައި އެމެރިކާގެ ބޮޑު ބަޔަކަށް ފެތުރިގެންދާނެ އެވެ.

މި ތޫފާނަކީ "ތާރީޚީ" ހާދިސާއެއްގެ ގޮތުގައި ސިފަކުރައްވައި، ރައީސް ޑޮނަލްޑް ޓްރަމްޕް ވަނީ ސައުތު ކެރޮލައިނާ، ވާޖިނިއާ، ޓެނެސީ، ޖޯޖިއާ، ނޯތު ކެރޮލައިނާ، މޭރީލޭންޑް، އާކަންސަސް، ކެންޓަކީ، ލޫސިއާނާ، މިސިސިޕީ، އިންޑިއާނާ އަދި ވެސްޓް ވާޖިނިއާ ހިމެނޭހެން ގިނަ ސްޓޭޓްތަކެއްގައި ފެޑަރަލް ކުއްލި ނުރައްކަލުގެ ހާލަތު އިޢުލާނުކުރައްވާފަ އެވެ.

"އަޅުގަނޑުމެން ދަނީ މޫސުމަށް ވަރަށް ގާތުން ފާރަވެރިވަމުން. އަދި ތޫފާނުގެ އަސަރު ފޯރާނެ ކަމަށް ބެލެވޭ ހުރިހާ ސްޓޭޓްތަކަކާ ގުޅުން ދަމަހައްޓަމުން ދާނަން. ހުރިހާ ރައްޔިތުންވެސް ރައްކާތެރިކަމާއެކު ތިއްބެވުމަށް އިލްތިމާސްކުރަން،" ޓްރަމްޕްގެ 'ޓްރޫތު ސޯޝަލް' އެކައުންޓުގައި ލިޔުއްވާފައިވެ އެވެ.

ޑިޕާޓްމަންޓް އޮފް ހޯމްލޭންޑް ސެކިއުރިޓީ (ޑީ.އެޗް.އެސް) އިން ހާމަކުރި ގޮތުގައި، 17 ސްޓޭޓަކާއި ޑިސްޓްރިކްޓް އޮފް ކޮލަމްބިއާގައި މިހާރު ވަނީ މޫސުމީ ކުއްލި ނުރައްކަލުގެ ހާލަތު އިޢުލާނުކޮށްފަ އެވެ. ޑީ.އެޗް.އެސްގެ ސެކްރެޓަރީ ކްރިސްޓީ ނޯއެމް ވިދާޅުވީ، ދެކުނުގެ ސްޓޭޓްތަކުން އެތައް ހާސް ބައެއްގެ ކަރަންޓު ކެނޑިފައިވާ ކަމަށާއި، ވީ އެންމެ އަވަހަކަށް ކަރަންޓު އިއާދަކުރުމުގެ މަސައްކަތް ކަމާބެހޭ ފަރާތްތަކުން ކުރަމުންދާ ކަމަށެވެ.

ޕަވަރއައުޓޭޖް.ކޮމް އިން ރިޕޯޓްކޮށްފައިވާ ގޮތުގައި، ހޮނިހިރު ދުވަހުގެ ރޭގަނޑާ ހަމައަށް 160،000 އަށްވުރެ ގިނަ ކަސްޓަމަރުންގެ ކަރަންޓު ކެނޑިފައިވާއިރު، އޭގެ ތެރޭގައި ގިނައީ ލޫސިއާނާ އަދި ޓެކްސަސްގެ ރައްޔިތުންނެވެ. ކަރަންޓު ކެނޑުމުގެ މައްސަލަ ހައްލުކުރުމަށްޓަކައި، ޑޭޓާ ސެންޓަރުތަކާއި ބޮޑެތި މަރުކަޒުތަކުގައި ހުރި ބެކަޕް ޖެނެރޭޓަރުތައް ބޭނުންކުރުމުގެ ހުއްދަ އެމެރިކާގެ އެނާޖީ ޑިޕާޓްމަންޓުން މިހާރު ވަނީ ދީފަ އެވެ.

އެމެރިކާގެ ނޭޝަނަލް ވެދަރ ސާވިސް އިން އިންޒާރު ދީފައިވާ ގޮތުގައި، މިއީ އާދަޔާ ހިލާފަށް ދިގުލައިގެންދާނެ ތޫފާނެކެވެ. މީގެ ސަބަބުން ދެކުނު އިރުމަތީގެ ސަރަހައްދުތަކަށް ބޯކޮށް ގަނޑުފެން ފައިބައި، އާންމު ދިރިއުޅުމަށް ބޮޑެތި ހުރަސްތަކެއް ކުރިމަތިވާނެ އެވެ.

ފްލައިޓްތަކުގެ މައުލޫމާތު ހާމަކުރާ 'ފްލައިޓްއެވެއަރ' އިން ބުނާ ގޮތުގައި، ހޮނިހިރު ދުވަހު ކެންސަލްކުރި 4،000 އެއްހާ ފްލައިޓްގެ އިތުރުން، އާދިއްތަ ދުވަހަށް ތާވަލުކުރި 9،400 އަށްވުރެ ގިނަ ފްލައިޓް ވެސް ވަނީ ކެންސަލްކޮށްފަ އެވެ. އެއާލައިންތަކުން ވަނީ ދަތުރުވެރިން މޫސުމަށް ސަމާލުވުމަށާއި، ފްލައިޓްތަކަށް އަތުވެދާނެ ބަދަލުތަކަށް ތައްޔާރުވެ ތިބުމަށް އިލްތިމާސްކޮށްފަ އެވެ.

ޑެލްޓާ އެއާލައިންސް، ޖެޓްބްލޫ އަދި ޔުނައިޓެޑް އެއާލައިންސް ފަދަ ބޮޑެތި ކުންފުނިތަކުން ދަނީ މޫސުން ގޯސް ސަރަހައްދުތަކުގެ ފްލައިޓްތައް ކެންސަލްކޮށް، ބޯޓުތަކުގައި ގަނޑުފެން ވިރުވުމަށް ކުރަންޖެހޭ މަސައްކަތްތަކަށް އިތުރު މުވައްޒަފުން ނެރެމުންނެވެ.

ހޯމްލޭންޑް ސެކިއުރިޓީގެ ސެކްރެޓަރީ ނޯއެމް އިތުރަށް ވިދާޅުވީ، ކުރިއަށް އޮތީ އިންތިހާ އަށް ފިނިގަދަ ދުވަސްތަކެއް ކަމަށާއި، އެހެންކަމުން ކާބޯތަކެއްޗާއި ތެޔޮ ފަދަ ޒަރޫރީ ތަކެތި އެއްކޮށް، ރައްކާތެރިކަމުގެ ފިޔަވަޅުތައް އެޅުމަށް ހުރިހާ ރައްޔިތުންނަށް އިލްތިމާސްކުރާ ކަމަށެވެ.