އެމެރިކާ ގައި ހުރި ވެނެޒުއޭލާގެ ތެލުގެ އާމްދަނީ ފައިސާ އަތުނުލެވޭނެ ގޮތަށް ގަރާރެއްގައި ޓްރަމްޕް ސޮއިކުރައްވައިފި

އެމެރިކާގައި ހުރި ވެނެޒުއޭލާގެ ތެލުގެ އާމްދަނީގެ ފައިސާ އަތުނުލެވޭނެ ގޮތަށް ގަރާރެއްގައި ޓްރަމްޕް ސޮއިކުރައްވައިފި އެވެ.

ރޮއިޓާސް އިން ރިޕޯޓު ކޮށްފައިވާ ގޮތުގައި އެމެރިކާގެ ޓްރެޜަރީ އެކައުންޓްތަކުގައި ހުރި ވެނެޒުއޭލާގެ ތެލުގެ އާމްދަނީ، ޝަރުޢީ އެއްވެސް މަރުހަލާއެއްގެ ތެރެއިން އަތުލިޔަ ނުދީ ރައްކާތެރިކުރުމަށްޓަކައި، އެމެރިކާގެ ރައީސް ޑޮނަލްޑް ޓްރަމްޕް ރިޔާސީ ގަރާރެއްގައި ސޮއިކުރައްވާފައިވާ ކަމަށް ވައިޓް ހައުސް އިން ހޮނިހިރު ދުވަހު ވަނީ ހާމަ ކޮށްފަ އެވެ.

ވައިޓް ހައުސް އިން ނެރުނު މައުލޫމާތު ކަރުދާހެއްގައި ބަޔާންކޮށްފައިވާ ގޮތުގައި، ރައީސް ޓްރަމްޕް މި ފިޔަވަޅު އެޅުއްވީ ވެނެޒުއޭލާގެ ތެލުގެ އާމްދަނީ އަތުލައިގަތުން ހުއްޓުވުމަށެވެ.

މިއީ ވެނެޒުއޭލާގެ އިގްތިސާދީ އަދި ސިޔާސީ ހަމަޖެހުން ގާއިމުކުރުމަށް އެމެރިކާ އިން ކުރަމުންދާ މުހިންމު މަސައްކަތްތަކަށް ހުރަސްއެޅިދާނެ ފަދަ ކަންކަމުން ރައްކާތެރިވުމަށް އެޅުއްވި މުހިންމު ފިޔަވަޅެއް ކަމަށް ވެސް އެ ބަޔާނުގައި ބުނެފައިވެ އެވެ.