ރާއްޖޭގެ މުސްތަގުބަލަށް ރައީސް އަށް ލިބިދީފައިވާ ބާރުތައް އަދިވެސް ކުޑަ ކުރަން ޖެހޭ: އަލީ ހުސެއިން
އަލީ ހުސެއިން ވިދާޅުވީ ރައީސުލްޖުމްހޫރިއްޔާ އަކީ 5 އަހަރަށް ރައްޔިތުން އިންތިޚާބު ކުރާ މަގާމެއް ކަމަށާއި، އެއީ ރަސްގެފާނެއް ނޫން ކަމަށް. ރައީސް މުއިއްޒަށް އިޝާރާތް ކުރައްވައި އަލީ ހުސެއިން ވިދާޅުވީ އެއީ ބާރުތައް އެއްކުރުމުގައި ހައްދުން ނައްޓާފައިވާ ބޭފުޅެއް ކަމަށް. އަދި ރައްޔިތުންގެ މަޖިލިސް އިންތިޚާބާއި ރިޔާސީ އިންތިޚާބު އެކުގައި ބާއްވަން ގާނޫނު އަސާސީ އަށް ބަދަލު ގެންނަނީ ވެސް އެ މަގުސަދުގައި ކަމަށް އޭނާ ވިދާޅުވި.
ރާއްޖެޓީވީގެ ޓީވީޓޯކް ޕްރޮގްރާމްގައި މަޝްހޫރު ގާނޫނީ ވަކީލް އަލީ ހުސެއިން ވާހަކަ ދައްކަވަނީ | ރާއްޖެ އެމްވީ
ދިވެހިރާއްޖޭގެ މުސްތަގުބަލަށްޓަކައި ރައީސުލްޖުމްހޫރިއްޔާ އަށް ލިބިދީފައިވާ ބާރުތައް އަދިވެސް ކުޑަ ކުރަން ޖެހޭ ކަމަށް މަޝްހޫރު ގާނޫނީ ވަކީލް އަލީ ހުސެއިން ވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި ކެންދޫ ދާއިރާގެ މެންބަރުކަން ވެސް ކުރައްވާފައިވާ އަލީ ހުސެއިން ވިދާޅުވީ ރައީސުލްޖުމްހޫރިއްޔާ އަކީ 5 އަހަރަށް ރައްޔިތުން އިންތިޚާބު ކުރާ މަގާމެއް ކަމަށާއި، އެއީ ރަސްގެފާނެއް ނޫން ކަމަށެވެ. ނަމަވެސް ބައެއް މީހުންނަށް އެއީ ރަސްކަލެއް ކަމަށް ސިފަވާ ކަމަށާއި، ނަމަވެސް އެއީ 5 އަހަރު ދުވަހުގެ ވަޒީފާ އެއް އަދާ ކުރާ ބޭފުޅެއް ކަމަށް އޭނާ ވިދާޅުވި އެވެ.
އަލީ ހުސެއިން ވިދާޅުވީ ރާއްޖޭގައި އޮތީ ތިން ބާރު ވަކިވެފައިވާ ޑިމޮކްރަސީ ކަމަށާއި، ރައީސުލްޖުމްހޫރިއްޔާ ކަމަށް އިންތިޚާބުވާ ބޭފުޅަކަށް ބޭނުން ކަމެއް ނުކުރެވޭނެ ކަމަށެވެ. ގައުމާއި ރައްޔިތުންގެ ކަންކަން ގޯސްކޮށް ކުރާނަމަ މަގާމުން ދުރުކުރަން ޖެހޭ ކަމަށް އޭނާ ވިދާޅުވި އެވެ.
މީގެ އިތުރުން އަލީ ހުސެއިން ވިދާޅުވީ މިހާރު ގައުމުގެ ހާލަތަށް ބަލާއިރު، ކަންކަން ހިނގާ ގޮތް ވަޒަން ކުރުމަށްފަހު މިހާރު ވެސް ރައީސުލްޖުމްހޫރިއްޔާ ލިބިދޭ ބާރުތައް ހަނި ކުރަން ޖެހޭ ކަމަށެވެ.
އޭނާ ކަންކަން ގޯސްކޮށް ކުރަންޏާ ބޭލެން ވެސް ޖެހޭނެ. އެހެންވީމަ ރައީސުލްޖުމްހޫރިއްޔާގެ ބާރުތައް ކުޑަވާން ޖެހޭ މިގައުމުގައި. އަޅުގަނޑުމެންނަށް މިފެންނަނީ މިދިޔަ ފަހަރު މިސާލަކަށް ރައީސް އިބޫ އެގޮތަށް ބާރުތައް ބޭނުން ކުރެއްވި ވާހަކަ އެއް ނޫން. އެކަމަކު ބޭނުން ކުރަން ބޭނުންވި ނަމަ ކުރެވޭނެ. ނުކުުރުން އެއީ މުޅިން އެހެން ކަމެއް. މިހާރު މިފެންނަނީ ހަމަ ހިތު ހުރި ގޮތަކަށް ބޭނުން ކޮށްލަނީ. ހިތު ހުރި ކަމެއް ކުރަނީ. މިއަދު ހިތަށް އެރީމަ މާދަމާ ގާނޫނު އަސާސީ އިސްލާހު ކޮށްލަންވީއޭ. ވަރިހަމައެއް ނުންހޭ އަދުރޭ މީޓިންއަކަށް އެދިގެން ނުވަ މަސް ވަންދެން މީޓް ނުކުރިއަސް ތިމަންނަ ފޮނުވާލީމަ ކުރާކަށްނުންހޭ ޖެހޭނީ. ހަމަ ސައިޒް ކޮށްލާފައި އެހުރީ. އަބްދުއްރަހީމް މީޓިއަކަށް އެދިގެން އުޅޭތާ 8 މަހަށްވުރެ ގިނަ ދުވަސް ވެއްޖެ އެނގޭތޯ. ހަމަ ސައިޒްކޮށްފައި ފިޔޮކެއްހެން ބަދެފައި އޭނީ ބައިންދާފައި.މަޝްހޫރު ގާނޫނީ ވަކީލް އަލީ ހުސެއިން
ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް އިޝާރާތް ކުރައްވައި އަލީ ހުސެއިން ވިދާޅުވީ އެއީ ބާރުތައް އެއް ކުރުމުގައި މިހާރު ހައްދުން ނައްޓާފައިވާ ބޭފުޅެއް ކަމަށެވެ. ރައްޔިތުންގެ މަޖިލިސް އިންތިޚާބާއި ރިޔާސީ އިންތިޚާބު އެކުގައި ބާއްވަން ގާނޫނު އަސާސީ އަށް ބަދަލު ގެންނަނީ ވެސް އެ މަގުސަދުގައި ކަމަށް އޭނާ ވިދާޅުވި އެވެ.
އަލީ ހުސެއިން ވިދާޅުވީ ބާރުތައް ވަކިވެފައިވާ ރައްޔިތުން އެދޭ ސުލްހަވެރި ގައުމެއް ބޭނުންވާ ކަމަށްވާނަމަ، ރިޔާސީ އިންތިޚާބާއި މަޖިލިސް އިންތިޚާބު އެއްކޮށް ބާއްވައިގެން ނުވާނެ ކަމަށެވެ. މަޖިލިސް އިންތިޚާބު ބާއްވަން ޖެހޭނީ ރިޔާސީ އިންތިޚާބާ ދުރުގައި ކަމަށާއި، މަޖިލިސް އިންތިޚާބު ވާން ޖެހޭނީ މިޑްޓާމް އިލެކްޝަން އަކަށް ކަމަށް އޭނާ ވިދާޅުވި އެވެ.
