ބިން ހަވާލުކުރިތާ 9 މަސް: ނ. އަތޮޅު ހެނބަދޫގެ ފިޓްނަސް އެންޑް ރެކްރިއޭޝަން ސެންޓަރުގެ މަސައްކަތް ކުރިއަށް ނުގޮސް، އެ ސަރަހައްދު ވިނަ ހެދެން ދޫކޮށްލާފައި
ނ. އަތޮޅު ހެނބަދޫގެ ފިޓްނަސް އެންޑް ރެކްރިއޭޝަން ސެންޓަރުގެ ބިންގާ އަޅުއްވައިދެއްވީ 2025 ޖުލައި މަހު ސްޕޯޓްސް މިނިސްޓަރު އަބްދުﷲ ރާފިއު ބިން ހަވާލުކުރިތާ 9 މަސް ވީ އިރު ވެސް މަސައްކަތް އޮތީ ހުއްޓިފައި.
ނ. އަތޮޅު ހެނބަދޫގެ ފިޓްނަސް އެންޑް ރެކްރިއޭޝަން ސެންޓަރުގެ ބިންގާ އެޅުމުގެ ރަސްމިއްޔާތުގެ ތެރެއިން: ބިންގާ އަޅާ ކުރެހުން ހަރު ކުރީ ޖުލައި މަހު، މަސައްކަތް ކުރިއަކަށް ނުދޭ | ރައީސް އޮފީސް
ބިން ހަވާލުކުރިތާ 9 މަސް ދުވަސް ވީ އިރު ވެސް ނ. އަތޮޅު ހެނބަދޫގެ ފިޓްނަސް އެންޑް ރެކްރިއޭޝަން ސެންޓަރުގެ މަސައްކަތް ހުއްޓިފައި ހުރިކަން ހާމަވެއްޖެ އެވެ.
ހެނބަނދޫ ކައުންސިލް ގެ ރައީސް ހުސެއިން އަބޫބަކުރު ވިދާޅުވީ އެ މަސައްކަތް ކުރިއަށް ނުދިއުމަކީ ކައުންސިލްގެ ވަރަށް ބޮޑު ކަންބޮޑުވުމެއް ކަމަށެވެ. އެ އިމާރާތުގެ ކުރެހުން އެ ސަރަހައްދުގައި ހަރުކޮށްފައި ހުރި ނަމަވެސް އެ ސެންޓަރުގެ މަސައްކަތް ސަރުކާރުން ކުރިއަށް ނުގެންދާ ކަމަށް އޭނާ ވިދާޅުވި އެވެ. އުންމީދަކީ ވީހާވެސް އަވަހަކަށް އެ އިމާރާތް ނިމި އާއްމުންނަށް ޚިދުމަތް ލިބުން ކަމަށް އޭނާ ވިދާޅުވި އެވެ.
"ބިންގާ އެޅި އިރު މި ތަން ވަރަށް ރީތިކޮށް އޮތީ. ބިން މިއޮތީ ހަވާލުކޮށްފައި. އެހެން ނަމަވެސް މަސައްކަތް ކުރިއަށް ނުގޮސް ތަނުގައި ވިނަ ހެދެން ދޫކޮށްފައި މި އޮތީ. ފެނަކަ އާއި މަސައްކަތް ހަވާލު ކުރީ. މި ބިމަކީ ކުރިން ބޮޑު އިމާރާތެއް ވެސް ހުރި ސަރަހައްދެއް. އެއީ ކުރީގެ އިންޖީނުގެ. އެތަން ތަޅާލާފައި ބިން ދިނީ. އެހެންވީމަ ބިން ނެތިގެނެއް ނޫން މަސައްކަތް ނުކޮށް އޮތީ." ކައުންސިލް ރައީސް ވިދާޅުވި އެވެ.
ނ. އަތޮޅު ހެނބަދޫގެ ފިޓްނަސް އެންޑް ރެކްރިއޭޝަން ސެންޓަރުގެ ބިންގާ އަޅާފައި ވަނީ މިދިޔަ 2025 ވަނަ އަހަރުގެ ޖުލައި މަހު އެވެ.
ހެނބަދޫގެ ފިޓްނަސް އެންޑް ރެކްރިއޭޝަން ސެންޓަރުގެ ބިންގާ އަޅުއްވައިދެއްވީ ސްޕޯޓްސް މިނިސްޓަރު އަބްދުﷲ ރާފިއު އެވެ.
އެ މަޝްރޫއު ގެ ބިންގާ އަޅުއްވައިދެއްވީ ރައީސް ޑރ. މުހައްމަދު މުއިއްޒު ނ. އަތޮޅަށް ކުރެއްވި ދަތުރުފުޅުގެ ތެރެއިން ހެނބަދޫއަށް ވަޑައިގެން އެ ރަށުގައި އެކަމަށް ހާއްސަކޮށްގެން ބޭއްވި ރަސްމިއްޔާތެއްގަ އެވެ. އެ ރަސްމިއްޔާތުގައި ރައީސް މުއިއްޒު އާއި ބައެއް ވަޒީރުންނާއި ނ. އަތޮޅުގެ ދާއިރާތައް ތަމްސީލު ކުރައްވާ ރައްޔިތުންގެ މަޖިލީހުގެ މެންބަރުންގެ އިތުރުން ހެނބަދޫ ކައުންސިލުން ވެސް ބައިވެރިވެވަޑައިގެންނެވިއެވެ.
