ޓްރަމްޕް އުފައްދަވާފައިވާ "ބޯޑް އޮފް ޕީސް" ގައި ބައިވެރިވުމަށް ކެނެޑާ އަށް ދީފައިވާ ދައުވަތު އަނބުރާ ގެންދަވައިފި
ވައިޓް ހައުސް އިން ހާމަކޮށްފައިވާ ގޮތުގައި، މި ބޯޑުގައި ބައިވެރިވުމަށް 60 ގައުމަކަށް ދައުވަތު ދީފައިވާއިރު، މިހާތަނަށް 35 ގައުމަކުން ވަނީ ބައިވެރިވާން އެއްބަސްވެފައި.
ކެނެޑާގެ ބޮޑުވަޒީރު މާކް ކާނީ | ރޮއިޓަސް
އެމެރިކާގެ ރައީސް ޑޮނަލްޑް ޓްރަމްޕް، އަލަށް އުފައްދަވާފައިވާ "ބޯޑް އޮފް ޕީސް" ގައި ބައިވެރިވުމަށް ކެނެޑާ އަށް ދީފައިވާ ދައުވަތު އަނބުރާ ގެންދަވައިފި އެވެ. މިއީ އުތުރު އެމެރިކާގެ އަވަށްޓެރި މި ދެ ގައުމުގެ ދެމެދުގައި އުފެދިފައިވާ ނުތަނަވަސްކަމުގެ ތެރެއިން ފެނިގެންދިޔަ އެންމެ ފަހުގެ ހާދިސާ އެވެ.
ޓްރަމްޕްގެ "ޓްރުތް ސޯޝަލް" އެކައުންޓުގައި، ކެނެޑާގެ ބޮޑުވަޒީރު މާކް ކާނީ އަށް އަމާޒުކުރައްވައި ކުރެއްވި ޕޯސްޓެއްގައި ވިދާޅުވެފައި ވަނީ، "ބޯޑް އޮފް ޕީސް" ގައި ކެނެޑާ ބައިވެރިވުމަށް ދީފައިވާ ދައުވަތު މި ސިޓީ މެދުވެރިކޮށް އަނބުރާ ގެންދާކަން އަންގާ ކަމަށެވެ.
މި ހަފުތާގައި ޑާވޯސް ގައި ކާނީ ދެއްކެވި ވާހަކަފުޅުތަކާ ގުޅިގެން މީޑިއާގެ ސަމާލުކަން ވަނީ ވަރަށް ބޮޑަށް ލިބިފައެވެ. އެގޮތުން އެމެރިކާ އިސްވެ އޮވެ ހިންގާ ކަންތައްތަކުގެ ސަބަބުން ދުނިޔޭގެ ނިޒާމަށް ބޮޑެތި ލޮޅުންތަކެއް އަރާފާނެ ކަމުގެ އިންޒާރު އޭނާ ވަނީ ދެއްވާފަ އެވެ. މީގެ އިތުރުން، ޓްރަމްޕްގެ މި އާ އިދާރާގައި ބައިވެރިވުމަށް އެއްވެސް ފައިސާއެއް ނުދޭނެ ކަމަށް ކެނެޑާގެ ސަރުކާރުން ވަނީ ބުނެފަ އެވެ.
މި ބޯޑަކީ މައްސަލަތައް ހައްލުކުރުމަށް އުފައްދާ ބައިނަލްއަގުވާމީ އާ ޖަމިއްޔާއެއްގެ ގޮތުގައި އެމެރިކާ އިން ސިފަކުރާއިރު، ބޯޑުގެ ރައީސްގެ ހައިސިއްޔަތުން ނިންމުންތައް ނިންމުމުގެ ފުޅާ ބާރުތަކެއް ޓްރަމްޕަށް ލިބިވަޑައިގަންނަވަ އެވެ. ބުރާސްފަތި ދުވަހުގެ ރޭ ޓްރަމްޕް ކުރެއްވި ޕޯސްޓުގައި، ކެނެޑާއަށް ދިން ދައުވަތު ބާތިލުކުރަން ނިންމެވި ސަބަބެއް ހާމަކުރައްވާފަ އެއް ނުވެ އެވެ.
މިކަމާ ގުޅިގެން ކާނީގެ އޮފީހުން އަދި ވަކި އެއްޗެއް ބުނެފައެއް ނުވެ އެވެ. ނަމަވެސް، ޓްރަމްޕްގެ ދައުވަތު އުސޫލެއްގެ ގޮތުން ގަބޫލުކުރައްވާނެ ކަމަށް ބޮޑުވަޒީރު މިދިޔަ ހަފުތާގައި ވަނީ ވިދާޅުވެފަ އެވެ.
ޓްރަމްޕްގެ އުފެއްދެވި "ބޯޑް އޮފް ޕީސް" އަކީ ފަލަސްތީނުގެ ޣައްޒާ ގައި އިޒްރޭލާއި ހަމާސްއާ ދެމެދު ކުރިއަށްދާ ދެ އަހަރުވީ ހަނގުރާމަ ހުއްޓުވުމަށާއި، ޣައްޒާ އަލުން އާރާސްތު ކުރުމުގެ މަސައްކަތްތައް ބެލެހެއްޓުމަށް އުފެއްދި ބޯޑެއް ކަމަށް ކުރިން ބެލެވުނެވެ. ނަމަވެސް، މި ބޯޑުގެ ދުސްތޫރުގައި ފަލަސްތީނުގެ މި ސަރަހައްދުގެ ވާހަކަ އެއްވެސް ވަރަކަށް ހިމަނާފަ އެއް ނުވެ އެވެ. އަދި މިއީ އދ. އިން އަދާކުރާ ދައުރުގެ ބަދަލުގައި އެމެރިކާގެ ބާރުގެ ދަށުން ހިންގާ އިދާރާއެއް ގާއިމުކުރުމަށް ކުރާ މަސައްކަތެއްގެ ގޮތުގައި ދަނީ ފެންނަމުންނެވެ.
ވައިޓް ހައުސް އިން ހާމަކޮށްފައިވާ ގޮތުގައި، މި ބޯޑުގައި ބައިވެރިވުމަށް 60 ގައުމަކަށް ދައުވަތު ދީފައިވާއިރު، މިހާތަނަށް 35 ގައުމަކުން ވަނީ ބައިވެރިވާން އެއްބަސްވެފަ އެވެ.
އިނގިރޭސިވިލާތުން ބުރާސްފަތި ދުވަހުގެ ކުރީކޮޅު ބުނެފައިވަނީ، ރަޝިޔާގެ ރައީސް ލަޑިމިއަރ ޕޫޓިން މި ބޯޑުގައި ބައިވެރިވެވަޑައިގެންފާނެ ކަމުގެ ބިރު އޮތުމުން، އެ ގައުމުން އަދި މި ބޯޑުގައި ބައިވެރިނުވާނެ ކަމަށެވެ.
