އީރާނުގެ އަސްކަރިއްޔާ އެންމެ މަތީ ލެވެލްގެ ސަމާލު ކަމަށް ގެނެސްފި
އައި.އާރު.ޖީ.ސީގެ އެއަރޯސްޕޭސް ކޮމާންޑަރު މާޖިދު މޫސަވީ ވިދާޅުވީ މިދިޔަ އަހަރު އިޒްރޭލާ އެކު ކުރި 12 ދުވަހުގެ ހަނގުރާމައަށްފަހު އީރާނުގެ މިސައިލް ރިޒާވް ކުރިއަށްވުރެ އިތުރުވެފައިވާ ކަމަށް. އީރާނުގެ އަސްކަރިއްޔާ އޮތީ ތައްޔާރީ ހާލަތުގެ އެންމެ މަތީ ދަރަޖައިގައި ކަމަށާއި ހަނގުރާމައިގައި ލިބުނު ގެއްލުންތައް މިހާރު މަރާމާތުކޮށް ނިމިފައިވާ ކަމަށްވެސް އޭނާ ވިދާޅުވި.
އީރާނުގެ ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ހަތިޔާރު އެޅި ފައުޖުތައް | ގެޓީ އިމޭޖަސް
އީރާނުގެ އަސްކަރިއްޔާ ތައްޔާރީ ހާލަތުގެ އެންމެ މަތީ ދަރަޖަ އަށް ގެނެސްފައިވާ ކަމަށް އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ އެއަރޯސްޕޭސް ކޮމާންޑަރު މާޖިދު މޫސަވީ ވިދާޅުވެއްޖެ އެވެ.
މޫސަވީ ބުދަ ދުވަހު ވިދާޅުވި ގޮތުގައި، މިދިޔަ އަހަރު އިޒްރޭލާ އެކު ކުރި 12 ދުވަހުގެ ހަނގުރާމައަށް ފަހު އީރާނުގެ މިސައިލް ރިޒާވް ވަނީ ކުރިއަށްވުރެ އިތުރުވެފަ އެވެ. ދައުލަތުގެ މީޑިއާތަކުން މިކަން ހާމަކޮށްފައި ވަނީ، އީރާނުގައި ކުރިއަށްދާ ސަރުކާރާ ދެކޮޅު މުޒާހަރާތަކާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް އެ ގައުމުގެ ދާޚިލީ ކަންކަމުގެ ތެރެ އަށް ވަދެވަޑައިގަންނަވާނެ ކަމުގެ އިންޒާރު ދެއްވާފައިވާ ދަނޑިވަޅެއްގަ އެވެ.
މޫސަވީ އާ ހަވާލާދީ ދައުލަތުގެ މީޑިއާ އިން ރިޕޯޓްކޮށްފައިވާ ގޮތުގައި، އީރާނުގެ އަސްކަރިއްޔާ އޮތީ ތައްޔާރީ ހާލަތުގެ އެންމެ މަތީ ދަރަޖައިގައެވެ. އަދި ހަނގުރާމައިގައި ލިބުނު ގެއްލުންތައް މިހާރު މަރާމާތުކޮށް ނިމިފައިވާ ކަމަށާއި، އެއަރޯސްޕޭސް ފޯސްގެ އެކި ދާއިރާތަކުގެ އުފެއްދުންތެރިކަން 2025 ވަނަ އަހަރުގެ ޖޫން މަހަށްވުރެ މިހާރު އިތުރުވެފައިވާ ކަމަށްވެސް އޭނާ ވިދާޅުވި އެވެ.
މަސްދަރު: ރޮއިޓާސް
