ރައީސް މުއިއްޒަކީ ވާހަކައެއް ދައްކަވަންޏާ ދޮގު ހެއްދެވޭ ބޭފުޅެއް، ހުޅުމާލޭގެ މުނިިސިޕަލް ޚިދުމަތްތައް ކައުންސިލްއާ ހަވާލުނުކޮށް ވެސް ހައްދަވަނީ ދޮގު: މޭޔަރު އާޒިމް

ރައީސް ޑރ.މުހައްމަދު މުއިއްޒަކީ ވާހަކައެއް ދައްކަވަންޏާ ދޮގު ހެއްދެވޭ ބޭފުޅެއް ކަމަށް މާލެސިޓީ ކައުންސިލްގެ މޭޔަރު އާދަމް އާޒިމް ވިދާޅުވެއްޖެ އެވެ. 

އާދިއްތަ ދުވަހުގެ ފަށާއިރު ޕްރޮގްރާމްގައި މޭޔަރު އާޒިމް މިހެން ވިދާޅުވެފައިވަނީ، މާލެސިޓީގެ މޭޔަރު ކަމުގައި ހުންނަވައި މުއިއްޒު ދައްކަވާފައިވާ ވާހަކަތަކާ ގުޅިގެންނެވެ. އެދުވަސްވަރު މޭޔަރު މުއިއްޒު ވިދާޅުވީ ހުޅުމާލޭގެ މުނިސިޕަލް ހުރިހާ މަސައްކަތެއް ކުރަން ޖެހޭނީ މާލެސިޓީ ކައުންސިލުން ކަމަށާއި، ކުންފުންޏަކުން އެމަސައްކަތް ކުރުމަކީ ކަންބޮޑުވާ މައްސަލައެއް ކަމަށެވެ. ނަމަވެސް އެމަނިކުފާނަށް ވެރިކަން ލިބިވަޑައިގަތުމުން، މިހާރު މާލެސިޓީ ކައުންސިލަށް ހުޅުމާލޭގެ މުނިސިޕަލްގެ ޚިދުމަތްތައް ދިނުމަށް ސަރުކާރުން ދަނީ ހުރަސް އަޅަމުންނެވެ. އެންމެފަހުން ހުޅުމާލޭގެ ރައްޔިތުންނާ ބައްދަލު ކުރައްވައި ރައީސް މުއިއްޒު ވިދާޅުވީ ހުޅުމާލޭގެ މުނިސިޕަލްގެ މަސައްކަތްތައް ކުރުމަށް މާލެސިޓީ ކައުންސިލުން ބޭނުންނުވާ ކަމަށާއި، ކައުންސިލުން އެކަމާ ދެކޮޅު ހަދާފައިވާ ކަަމަށެވެ. 

މިކަމަށް އިޝާރާތް ކުރައްވައި މޭޔަރު އާޒިމް ވިދާޅުވީ، ރައީސް މުއިއްޒު ފާހަގަ ކުރެވިގެން ދަނީ ވާހަކައެއް ދައްކަވާ ކަމަށްވަންޏާ ދޮގު ހައްދަވާ ބޭފުޅެއްގެ ގޮތުގައި ކަމަށެވެ. ހުޅުމާލޭގެ މަސައްކަތްތައް ކުރުމަށް މާލެސިޓީ ކައުންސިލުން ދެކޮޅު ނުހަދާ ކަމަށާއި، އެއީ ކަނޑައެޅިގެން ރައީސް މުއިއްޒު ހެއްދެވި ބޮޑު ދޮގެއް ކަމަށެވެ. 

މީގެ އިތުރުން މޭޔަރު އާޒިމް ވިދާޅުވީ ރައީސް މުއިއްޒު މާލެސިޓީގެ ހުރިހާ ކައުންސިލަރުންނާ ބައްދަލު ކުރެއްވިއިރު، ހުޅުމާލޭގެ މަސައްކަތްތައް ހަވާލު ކޮށްދިނުމަށް އެދިފައިވާ ކަމަށާއި، އެ ބައްދަލުވުމުގައި ވެސް ކައުންސިލުން އެދޭ ގޮތަށް އެމަސައްކަތް ކޮށްދޭނެ ކަމުގެ ޔަގީންކަން ރައީސް މުއިއްޒު ދެއްވި ކަމަށެވެ. 

އެއީ އަޅުގަނޑުމެން ހުންނާނެ ސިޓީ ފޮނުވާފައި ހަވާލު ނުކޮށްގެން. އަޅުގަނޑު ވަކިން ބައްދަލު ކުރަން އެދެފިން ކިތަންމެ ފަހަރަކު. އެކަމަކު ބައްދަލުވުމެއް ނުދެއްވާ. އެހެނެސް އަޅުގަނޑުމެން ކައުންސިލްއާ ރައީސް މުއިއްޒު ބައްދަލު ކުރެއްވި. ކައުންސިލްގެ ހުރިހާ މެންބަރުންނާއެކު. ބައްދަލުކުރި ދުވަހު ވެސް އަޅުގަނޑު އިންނާނެ ދަންނަވާފައި ހަވާލު ކޮށްދޭށާ، ހަވާލު ކޮށްދެއްވި ގޮތާއި އަޅުގަނޑުމެން ބޭނުންވާ ގޮތާއި ވިދާޅުވި ތިޔަ ވިދާޅުވި ގޮތަށް ކޮށްދެއްވާނަމޭ. އެވަޑައިގެންނެވި ގޮތަށް ގެއްލުނީ އަނެއްކާ ވެސް. ދެން ގެއްލި އަނެއްކާ ވެސް މި ފެނުނީ  އެވާހަކަ ދައްކަވަނިކޮށް ހުޅުމާލޭގައި. ހުޅުމާލޭގައި އެއަށްބޮޑު އާބާދީއަށް މާލެސިޓީގެ ބައެއް އެއީ ވެސް. ބޮޑު ސިންގާހާ ދޮގެއް ހަދާލީ އަނެއްކާ ވެސް. އަޅުގަނޑުވެސް ދިޔައީ ސިއްސައިގެން އެނގޭތޯ. އެކަހަލަ ކަންތައް ކުރާކަށް ނުވާނެ.

މާލެސިޓީގެ މޭޔަރު އާދަމް އާޒިމް 

މޭޔަރު އާޒިމް ވިދާޅުވީ ހުޅުމާލޭގެ މަސައްކަތްތައް ކުރުމަށް ކައުންސިލުން ފާސްކޮށްފައިވާ ކަމަށާއި، މޭޔަރު ކަމަށް އޭނާ އިންތިޚާބު ވުމުގެ ކުރީން އެކަމުގެ އެއްބަސްވުމުގައި ސޮއި ކޮށްފައިވާ ކަމަށެވެ. ނަމަވެސް މޭޔަރުކަމުގެ މަގާމާ ހަވާލުވެ، ރައީސް މުއިއްޒު ވެރިކަމަށް ވަޑައިގެންނެވި ފަހުން އެ މަސައްކަތް ހުއްޓުވާފައިވާ ކަަމަށް މޭޔަރު އާޒިމް ވިދާޅުވި އެވެ. 

މީގެ އިތުރުން މޭޔަރު އާޒިމް  ވިދާޅުވީ މިހާރު ހުޅުމާލޭގެ މުނިސިޕަލް ހުރިހާ ޚިދުމަތްތަކެއް ދެމުން ދަނީ ހައުސިން ޑިވަލޮޕްމަންޓް ކޯޕްރޭޝަން (އެޗްޑީސީ)ން ކަމަށާއި، ނަމަވެސް އެމަސައްކަތް ކައުންސިލްއާ ހަވާލު ކޮށްފިނަމަ މާ ރަނގަޅަށް ޚިދުމަތްތައް ގާއިމް ކުރާނެ ކަމަށެވެ. އަދި ވިދާޅުވީ މިހާތަނަށް ހަވާލުކުރި ހުރިހާ މަސައްކަތެއް ވަރަށް ރަނގަޅަށް ކޮށްފައިވާ ކަމަށާއި، އެކަން ރައްޔިތުންނަށް އެނގޭނެ ކަމަށެވެ.