ސަރަހައްދުގެ ގައުމުތަކަށް އީރާނުގެ އިންޒާރު - އެމެރިކާ އިން ހަމަލާ ދީފި ނަމަ އެމެރިކާގެ އަސްކަރީ މަރުކަޒުތަކަށް ހަމަލާ ދޭނަން

އެމެރިކާ އިން އީރާނަށް ހަމަލާއެއް ދީފިނަމަ، އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް އީރާނުން ހަމަލާދޭނެ ކަމުގެ އިންޒާރު އަވަށްޓެރި ގައުމުތަކަށް ދީފިއެވެ.

އީރާނުގެ އިސް އޮފިޝަލަކު ރޮއިޓާސް އަށް މައުލޫމާތު ދެއްވަމުން ބުދަ ދުވަހު ވިދާޅުވީ، މި އިންޒާރު ދީފައިވަނީ އީރާނުގައި ކުރިއަށްދާ މުޒާހަރާތަކާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް އެ ގައުމުގެ ދާހިލީ ކަންކަމުގެ ތެރެއަށް ވަދެވަޑައިގަންނަވާނެ ކަމަށް ވިދާޅުވެ ދެއްވި އިންޒާރުތަކާ ގުޅިގެން ކަމަށެވެ.

މީގެ އިތުރުން، އީރާނުގެ ފޮރިން މިނިސްޓަރު އައްބާސް އަރަގްޗީ އާއި އެމެރިކާގެ ހާއްސަ މަންދޫބު ސްޓީވް ވިޓްކޯފްއާ ދެމެދު ކުރިއަށްދިޔަ ސީދާ މުއާމަލާތްތައް މިހާރު މެދުކަނޑާލާފައިވާ ކަމަށްވެސް އެ އޮފިޝަލް ވިދާޅުވި އެވެ.

އެ އޮފިޝަލް އިތުރަށް ފާހަގަކުރެއްވި ގޮތުގައި، އެމެރިކާގެ މިފަދަ އިންޒާރުތަކުގެ ސަބަބުން ޑިޕްލޮމެޓިކް ދާއިރާ އިން ކުރަމުންދާ މަސައްކަތްތަކަށް ހުރަސް އެޅެއެވެ. އަދި އެތައް އަހަރަކަށް ދެމިގެން ގޮސްފައިވާ ނިއުކްލިއާ މައްސަލައަށް ސުލްހަވެރި ސިޔާސީ ހައްލެއް ހޯދުމަށް ދެ ގައުމުގެ އޮފިޝަލުންގެ މެދުގައި ބޭއްވުމަށް ހަމަޖެހިފައިވާ ބައްދަލުވުންތައް ވެސް މިހާރު ވަނީ ކެންސަލް ކުރެވިފަ އެވެ.