ފަހު ވަގުތު ފޮރެސްޓް ބަލިކޮށް، ސިޓީ ދެ ވަނައިގައި

އިނގިރޭސި ޕްރިމިއާ ލީގުގައި ނޮޓިންހަމް ފޮރެސްޓާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ސިޓީ އިންް ލީގު ރޭހުގައި ވިއްދައިފި އެވެ.

ފޮރެސްޓުގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު ސިޓީ އިން ކާމިޔާބު ކުރީ 2-1 އިންނެވެ. މެޗުގައި ސިޓީ އިން ލަނޑު ޖަހައި ކުރި ހޯދާފައި ވަނިކޮށް، ފޮރެސްޓް އިން ނަތީޖާ ހަމަހަމަ ވެސް ކުރި އެވެ. ނަމަވެސް، މެޗުގެ ފަހު ވަގުތުގައި ލަނޑު ޖަހައިގެން ސިޓީ ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ނުޖެހުނު ނަމަވެސް. ދެ ވަަނަ ހާފު ފަށައިގެން ކުރީ ކޮޅު ސިޓީ އިން ވަނީ ލަނޑު ޖަހައި ލީޑު ނަގައިފަ އެވެ. އެގޮތުން ދެ ވަނަ ހާފު ފަށައިގެން ތިން ވަނަ މިނެޓުގައި ސިޓީ އަށް ލީޑު ނަގައިދިނީ ޓިޖާނީ ރެއިންޖާސް އެވެ. އޭނާ އެ ލަނޑު ޖެހީ ރަޔާން ޗާކީ ތަނަވަސްކޮށްދިން ފުރުސަތެއްގަ އެވެ.

ނަމަވެސް ސިޓީ އަށް ލީޑުގައި އޮވެވުނީ އެންމެ ހަ މިނެޓުގަ އެވެ. މެޗުގެ 54 ވަނަ މިނެޓުގައި އޮމާރް ހަޗިންސަން ވަނީ ލަނޑު ޖަހައި ފޮރެސްޓަށް ނަތީޖާ ހަމަހަމަ ކޮށްދީފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އިގޯ ޖީސަސް އެވެ. 

މެޗުގައި ދެ ވަނަ ލަނޑެއް ޖަހައި ކުރި ހޯދަން ސިޓީ އިން ވަނީ ވަރަށް މަސައްކަތް ކޮށްފަ އެވެ. އެގޮތުން މެޗުގެ ފުރިހަމަ ވަގުތު ހަމަވާން ހަތް މިނެޓަށް ވެފައި ވަނިކޮށް، ޗާކީ ވަނީ ލަނޑު ޖަހައި ސިޓީ އަށް ކުރި ހޯދައިދީފަ އެވެ. އެއީ ލަނޑު ޗާކީ ޖެހީ ޖޮސްކާ ގްވާޑިއޯލް ތަނަވަސްކޮށްދިން ފުރުސަތެއްގަ އެވެ.

މެޗަށް ފަހު ވާހަކަ ދައްކަމުން ސިޓީގެ ކޯޗު ޕެޕް ގާޑިއޯލާ ބުނީ އެއީ ވަރަށް ވާދަވެރި އަދި އެހާމެ ފޯރި ގަދަވި މެޗެއް ކަމަށެވެ. އޭނާ ބުނީ ސިޓީގެ ކުޅުންތެރިން ދެ ވަނަ ހާފުގައި ގިނަ މަސައްކަތް ތަކެއް ކުރި ކަމަށެވެ. ދެ ފަހަރު ވެސް ސިޓީ އިން ކުރި ހޯދީ ކުޅުންތެރިން އެކުވެގެން ވަރަށް ރަނގަޅަށް މަސައްކަތް ކޮށްގެން ކަމަށް ގާޑިއޯލާ ބުންޏެވެ. އޭނާ ބުނީ އެ މެޗުން ލިބުނީ ވަރަށް މުހިންމު ތިން ޕޮއިންޓު ކަމަށާއި، އަދި ވެސް ސިޓީ އަށް ހަމަޖެހިލައިގެން ތިބެވެން ނެތް ކަމަށެވެ. 

މޮޅާއެކު ސިޓީ އޮތީ ލީގު ތާވަލްގެ ދެ ވަނަ މަގާމުގަ އެވެ. އެއީ މިހާތަނަށް ލީގުގައި ކުޅެފައިވާ 18 މެޗުން 40 ޕޮއިންޓާ އެކު އެވެ. ސީޒަންގެ ކުރީ ކޮޅު ސިޓީގެ ނަތީޖާތައް ދަށްވި ނަމަވެސް، މިހާރު އެ ޓީމުން އަންނަނީ މަޑު މަޑުން ނަތީޖާ ރަނގަޅު ކުރަމުންނެވެ. މި ސީޒަންގެ ޕްރިމިއާ ލީގުގައި ސިޓީ ވަނީ މިހާތަނަށް ހަތަރު މެޗަކުން ބަލިވެފަ އެވެ.