ބްރެންޓްފޯޑް ބަލިކޮށް، ސިޓީ ސެމީ ފައިނަލަށް

ކަރަބޯ ކަޕްގެ ކުއާޓާ ފައިނަލް ގައި ބްރެންޓްފޯޑާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ސިޓީ އިން މުބާރާތުގެ ސެމީ ފައިނަލްގެ ފުރުސަތު ހޯދައިފި އެވެ.

ބުދަ ދުވަހުގެ ރޭ ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ސިޓީ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 32 ވަނަ މިނެޓުގައި ސިޓީ އަށް ލީޑު ނަގައިދިނީ ރަޔަން ޗާކީ އެވެ. އޭގެ ފަހުން ވެސް ސިޓީ އިން ވަނީ މެޗުގައި ރަނގަޅަށް ކުޅެ ލަނޑު ޖަހަން ފުރުސަތު ތަނަވަސްކޮށްފަ އެވެ. މެޗުގެ 67 ވަނަ މިނެޓުގައި ސަވީނިއޯ ވަނީ ސިޓީގެ ދެ ވަނަ ލަނޑު ޖަަހައި ލީޑު ފުޅާ ކޮށްފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޓިޖާނީ ރެއިންޖާސް އެވެ. 

މެޗަށް ފަހު ވާހަކަ ދައްކަމުން ސިޓީގެ ކޯޗު ޕެޕް ގާޑިއޯލާ ބުނެފައި ވަނީ، އެ މެޗުގައި ސިޓީގެ ފުރަތަމަ އެގާރަ އަށް ވަރަށް ބޮޑު ބަދަލެއް އޭނާ ގެނެސްފައިވާ ކަމަށެވެ. އެގޮތުން އެންމެ ފަހުން އިނގިރޭސި ޕްރިމިއާ ލީގުގައި ކްރިސްޓަލް ޕެލަސްއާ ދެކޮޅަށް ކުޅުނު މެޗާ އަޅާ ބަލާއިރު، ބޮޑު ބަދަލެއް ގެނެސްފައިވާ ކަމަށް އޭނާ ފާހަގަ ކުރި އެވެ. 

އެކަން ފާހަގަކޮށް ގާޑިއޯލާ ބުނީ އެއީ ވަރަށް ރަނގަޅު ބަދަލެއް ކަމަށާއި، މެޗުގެ ނަތީޖާ އިން ވެސް އެކަން ފާހަގަވާ ކަމަށެވެ. ޚާއްސަކޮށް ކުޅުންތެރިން ކުރި މަސައްކަތާ މެދު ވަރަށް ބޮޑަށް ހިތްހަމަ ޖެހޭ ކަމަށް ގާޑިއޯލާ ބުންޏެވެ. ޚާއްސަކޮށް ސަވީނިއޯގެ ފަރާތުން ވަރަށް ރަނގަޅު ކަންތައް ތަކެއް ފެންނަ ކަމަށާއި، އެންމެ ރަނގަޅު ވަގުތުގައި އޭނާ ފުރުސަތުގެ ބޭނުން ކުރާ ކަމަށް ގާޑިއޯލާ ބުންޏެވެ.

އިތުރަށް ގާޑިއޯލާ ބުނީ ބައެއް ކުޅުންތެރިންނަކީ އެހާ ގިނައިން ކުޅުމުގެ ފުރުސަތު ނުލިބޭ ކުޅުންތެރިން ކަމަށާއި، ނަމަވެސް ބެރެންޓްފޯޑާ ދެކޮޅަށް އެ ކުޅުންތެރިން ވަރަށް ފުރިހަމަ ކުޅުމެއް ދައްކާފައިވާ ކަމަށެވެ. އޭނާ ބުނީ ސިޓީ އަށް ބައެއް ކަހަލަ އުނދަގޫތަކާ ދިމާވެފައިވާ ކަމަށާއި، އެއީ ކުރިއަށް ޖެހިގެން ކުޅުމުގައި ދިމާވި ދަތިތަކެއް ކަމަަށެވެ.

ގާޑިއޯލާ ބުނީ މެޗު ފަށައިގެން ފުރަތަމަ 15 މިނެޓާއި، 20 މިނެޓުގެ ތެރޭގައި ސިޓީ އަށް އުނދަގޫ ތަކެއް ކުރިމަތިވި ކަމަށެވެ. ނަމަވެސް، ކުޅުންތެރިން އެކަމަށް ހޭނި، ރަނގަޅަށް ކުޅުނު ކަމަށް ގާޑިއޯލާ ބުންޏެވެ. ގާޑިއޯލާ ބުނީ ފުރަތަމަ އެގާރައިގައި ތިބި ކުޅުންތެރިން އަދި ބަދަލު ކުޅުންތެރިންގެ ގޮތުގައި ކުޅެން ނިކުތް ކުޅުންތެރިން ދެއްކި ކުޅުމާ މެދު ވެސް އޭނާ ވަރަށް ބޮޑަަށް ހިތްހަމަ ޖެހޭ ކަަމަށެވެ.