ބްރައިޓަން އަތުން މޮޅުވެ، އާސެނަލް އިން މަގާމު ދަމަހައްޓައިފި

އިނގިރޭސި ޕްރިމިއާ ލީގުގައި ބްރައިޓަންއާ ދެކޮޅަށް ކުޅުނު މެޗުން މޮޅުވެ، އާސެނަލް އިން އެއް ވަނަ މަގާމު ދަމަހައްޓައިފި އެވެ. 

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި އާސެނަލް އިން އެއް ލަނޑު ޖެހިިއިރު، އަނެއް ލަނޑު ޖެހީ ދެ ވަނަ ހާފުގަ އެވެ. އޭގެ ފަހުން ބްރައިޓަން އިން ވެސް ވަނީ މެޗުގައި ލަނޑެއް ޖަހައިފަ އެވެ.

މެޗު ފަށައިގެން 14 ވަނަ މިނެޓުގައި އާސެނަލް އަށް ލީޑު ނަގައިދިނީ މާޓިން އޮޑެގާޑް އެވެ. އެ ލަނޑު އޭނާ ޖެހީ ބުކަޔޯ ސަކާ ތަނަވަސްކޮށްދިން ފުރުސަތެއްގަ އެވެ. މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި އާސެނަލް އަށް ލީޑު ފުޅާވީ ބްރައިޓަންގެ ޖޯޖީނިއޯ ރުޓާ އަތުން ބައި ކޮޅަށް ވަތް ލަނޑުންނެވެ. 

މެޗުގައި އާސެނަލް އިން ދެ ލަނޑު ޖަހާފައި ވަނިކޮށް، ބްރައިޓަން އިން ލަނޑު ޖަހައި ފަރަގު ކުޑަ ވެސް ކުރި އެވެ. އެގޮތުން މެޗުގެ 64 ވަނަ މިނެޓުގައި ބްރައިޓަންގެ ލަނޑު ޖެހީ ޑިއޭގޯ ގޯމޭޒް އެވެ. 

މެޗުން މޮޅުވެ އާސެނަލް އެއް ވަނައިގައި އޮތީ ދެ ޕޮއިންޓުގެ ލީޑަކުންނެވެ. އެއީ މިހާތަނަށް ލީގުގައި ކުޅެފައިވާ 18 މެޗުން 42 ޕޮއިންޓާ އެކު އެވެ. އާސެނަލް އިން ލީގު ތާވަލްގެ އެއް ވަނަ މަގާމު ދަމަހައްޓަމުން އަންނައިރު، ލީގުގެ ވާދަވެރިކަން ވެސް ވަނީ ބޮޑުވެފަ އެވެ.

މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފައި ވަނީ މެޗުގައި އޭނާގެ ޓީމުން ދެއްކި ކުޅުމާ މެދު ވަރަށް ބޮޑަށް ހިތްހަމަ ޖެހޭ ކަމަށެވެ. ވަކި ވަކި ކުޅުންތެރިން ދެއްކި ކުޅުމުގެ އިތުރުން، މުޅި ޓީމެއްގެ ގޮތުގައި އާސެނަލް އިން ދެއްކި ކުޅުމާ މެދު ވެސް ހިތްހަމަ ޖެހޭ ކަަމށް އާޓެޓާ ބުންޏެވެ. އާޓެޓާ ބުނީ އާސެނަލް އިން މުޅި މެޗުގައި ފުރިހަަމަ އަށް ކޮންޓްރޯލް ކޮށްގެން ކުޅުނު ކަމަށެވެ.

އޭނާ ބުނީ މެޗުގައި އިތުރު ލަނޑު ޖަހަން ވެސް އާސެނަލް އިން ފުރުސަތު ތަކެއް ތަނަވަސްކުރި ކަމަށެވެ. އެކަން ކަމަށް ބަލާއިރު، މެޗުގެ ނަތީޖާ އަކީ 2-1 އަށް ވެގެން ނުވާނެ ކަމަށް ވެސް އާޓެޓާ ބުންޏެވެ. އެހެން ނަމަވެސް، ޕްރިމިއާ ލީގުގައި ކޮންމެ ޓީމެއް ވެސް ވާދަވެރި ވާނެ ކަމަށާއި، ކޮންމެ މެޗަކީ ވެސް ޕްރެޝަރު ބޮޑު މެޗެއް ކަމަށް އޭނާ ބުންޏެވެ. 

އާޓެޓާ ބުނީ އާސެނަލް ކުރިއަށް ދާން މަސައްކަތް ކުރަނީ އެތައް ދަތިތަކާއި، ގޮންޖެހުންތަކާ އެކު ކަމަށެވެ. އެގޮތުން ފާއިތުވި ހަ މަސް ދުވަހުގެ ތެރޭގައި އާސެނަލް އިން ކުރިމަތިލާން ޖެހުނު ކަންތައް ތަކުގެ އަަދަދު ވެސް ނޭނގޭ ކަމަށާއި، ކުރިއަށް ދަނީ ހުރިހާ ކަމެއް ހުރަސް ކުރުމަށް ފަހު ކަމަށް އޭނާ ބުނެފައިވެ އެވެ.