އެސްޓަން ވިލާގެ މޮޅުވުމަށް ނިމުން ގެނެސް، އާސެނަލް މަގާމު ދަމަހައްޓައިފި

އިނގިރޭސި ޕްރިމިއާ ލީގުގައި އެސްޓަން ވިލާއާ ދެކޮޅަށް ކުޅުނު މެޗުން މޮޅުވެ، އާސެނަލް އިން އެ ޓީމުގެ ފޯމު ދަމަހައްޓައި، އެއް ވަނަ މަގާމުގައި ދެމި އޮވެއްޖެ އެވެ.

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި އަންގާރަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 4-1 އިންނެވެ. މެޗުގައި ދެ ޓީމުން ވެސް ލަނޑުތައް ޖެހީ ފަހު ހާފުގަ އެވެ. އާސެނަލް އިން ހަތަރު ލަނޑު ޖެހި ފަހުން، އެސްޓަން ވިލާ އިން ވަނީ އެ ޓީމުގެ ހަމައެކަނި ލަނޑު ޖަހައިފަ އެވެ.

މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި އާސެނަލް އަށް ލީޑު ނަގައިދިނީ ގަބްރިއެލް މަގާާޅައެސް އެވެ. އޭގެ ހަތަރު މިނެޓު ފަހުން މާޓިން ޒުބިމެންޑީ ވަނީ އާސެނަލްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު އޭނާ ޖެހީ މާޓިން އޮޑެގާޑް ތަނަވަސްކޮށްދިން ފުރުސަތެއްގަ އެވެ.

އޭގެ ފަހުން މެޗުގެ 69 ވަނަ މިނެޓުގައި ލިއާންޑްރޯ ޓްރޮސާޑް ވަނީ އާސެނަލްގެ ތިން ވަނަ ލަނޑު ޖަަހައި އިތުރަށް ލީޑު ފުޅާ ކޮށްފަ އެެވެ. އެއީ ޔޫރިއެން ޓިމްބާ ތަނަވަސްކޮށްދިން ފުރުސަތެއްގައި ޓްރޮސާޑް ޖެހި ލަނޑެކެވެ. މެޗުގައި އާސެނަލްގެ ފަހު ލަނޑު ގެބްރިއަލް ޖީސޫސް ޖެހީ މެޗުގެ 78 ވަނަ މިނެޓުގަ އެވެ. އެ ލަނޑު ޖަހަން ފުރުސަތު ތަަނަވަސްކޮށްދިނީ ޓްރޮސާޑް އެވެ.

މެޗުގައި އެސްޓަން ވިލާގެ ހަމަ އެކަނި ލަނޑު އެ ޓީމުން ޖެހީ މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. އެ ލަނޑު އެ ޓީމަށް ޖަހައިދިނީ އޮލީ ވަޓްކިންސް އެވެ. 

މޮޅާއެކު، އާސެނަލް އިން ވަނީ ލީގުގައި އެސްޓަން ވިލާ އިން ދަމަހައްޓަމުން އައި މޮޅުވުމުގެ ސިލްސިލާ އަށް ނިމުން ގެނެސްފަ އެވެ. ލީގުގައި އެންމެ ފަހުން ކުޅުނު 11 މެޗުން ވެސް އެސްޓަން ވިލާ މޮޅުވެ ރަނގަޅު ޓްރެކެއްގައި އޮއްވާ، 12 ވަނަ މެޗުގައި އާސެނަލް އިން ވަނީ އެ ޓީމު ބަލިކޮށްފަ އެވެ.

މި މޮޅާއެކު، ލީގު ތާވަލްގެ އެއް ވަނަ މަގާމުގައި އާސެނަލް އޮތީ މިހާތަނަށް ކުޅެފައިވާ 19 މެޗުން 45 ޕޮއިންޓާ އެކު އެވެ. އާސެނަލް އަށް ވުރެ އެއް މެޗު މަދުން ކުޅެގެން ދެ ވަނައިގައި މެންޗެސްޓަރ ސިޓީ އަށް ލިބެނީ 40 ޕޮއިންޓެވެ. ނަމަވެސް، މެޗުގެ އަދަދު ހަމަކޮށް، ފަރަގު ކުޑަ ކުރުމުގެ ފުރުސަތު ސިޓީ އަށް އޮންނާނެ އެވެ.

މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފައި ވަނީ، އެންމެ ފަހުން ކުޅުނު 11 މެޗުން ވެސް އެސްޓަން ވިލާ މޮޅުވެފައި އޮތުމުން، އެ ޓީމުގެ ފެންވަރު ވަޒަން ކުރެވޭ ކަމަށެވެ. އެހެންކަމުން އެ ޓީމާ ދެކޮޅަށް އާސެނަލްގެ ކުޅުންތެރިން ދެއްކި ކުޅުމާ މެދު ހިތްހަމަ ޖެހޭ ކަމަށާއި، މެޗުގެ ނަތީޖާއާ މެދު ވެސް ހިތްހަމަ ޖެހޭ ކަމަށް އާޓެޓާ ވަނީ ބުނެފަ އެވެ. 

މެޗުގެ ފުރަތަމަ 10 މިނެޓުގެ ތެރޭގައި އާސެނަލް އަށް އުނދަގޫ ތަކެއް ދިމާވި ނަމަވެސް، އާޓެޓާ ބުނީ އޭގެ ފަހުން އާސެނަލް އިން ރަނގަޅަށް ކުޅުނު ކަމަށެވެ. އޭނާ ބުނީ އެންމެ މުހިންމުވީ ރަނގަޅު ކުޅުމެއް ދެއްކުމާ އެކު ތިން ޕޮއިންޓު ކަމަށާއި، އެކަން ކުރެވުމުން ވަރަށް ހިތްހަމަ ޖެހިފައި ހުރި ކަމަށެވެ.