ޖަނަވަރީ މަހުގެ 17 ވަނަ ދުވަހުގެ ނިޔަލަށް ޖުމްލަ 120,680 ފަތުރުވެރިން ރާއްޖެ އަށް ޒިޔާރަތްކޮށްފި
2025 ވަނަ އަހަރުގެ ޖަނަވަރީ މަހުގެ 17 ވަނަ ދުވަހުގެ ނިޔަލަށް 120,680 ފަތުރުވެރިން ރާއްޖެއަށް ޒިޔާރަތްކޮށްފައިވާ އިރު މިއީ ކުރީ އަހަރާ އަޅާބަލާއިރު 10.2 އިންސައްތައިގެ ކުރިއެރުމެއް.
ވެލައްސަރު ރިސޯޓް | ގެޓީ އިމޭޖަސް
ޖަނަވަރީ މަހުގެ 17 ވަނަ ދުވަހުގެ ނިޔަލަށް ޖުމްލަ 120,680 ފަތުރުވެރިން ރާއްޖެ އަށް ޒިޔާރަތްކޮށްފައިވާ ކަމަށް މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓުގެ ތަފާސް ހިސާބުތަކުން ހާމަ ވެއްޖެ އެވެ.
މިއީ 2025 ވަނަ އަހަރުގެ މި މުއްދަތުގައި ރާއްޖެ އަށް ޒިޔާރަތްކުރި 109,501 ފަތުރުވެރިންނާ އަޅާބަލާއިރު، 10.2 އިންސައްތައިގެ ކުރިއެރުމެކެވެ. މިއީ މި މަހުގެ ފުރަތަމަ 17 ދުވަހުގެ ތެރޭގައި އެކަނިވެސް، މިދިޔަ އަހަރަށް ވުރެ 11,000 އަށް ވުރެ ގިނަ ފަތުރުވެރިން އިތުރުވުމެކެވެ.
ޖަނަވަރީ މަހު ރާއްޖެ އަށް އެންމެ ގިނައިން ފަތުރުވެރިން ޒިޔާރަތްކުރި މާކެޓަކީ ރަޝިޔާ އެވެ. އެ ގައުމުން 19,171 ފަތުރުވެރިން (ޖުމްލަ ފަތުރުވެރިންގެ 15.9 އިންސައްތަ) ރާއްޖެ އަށް އައިސްފައިވެ އެވެ. ދެވަނަ އަށް އެންމެ ގިނަ ފަތުރުވެރިން އައީ އިޓަލީންނެވެ. އެއީ 13,601 ފަތުރުވެރިންނެވެ. ތިންވަނައިގައި އިނގިރޭސިވިލާތް (10,365 ފަތުރުވެރިން) އޮތް އިރު، ހަތަރުވަނައިގައި އޮތް ޗައިނާ އިން 7,890 ފަތުރުވެރިން ވަނީ ޒިޔާރަތްކޮށްފަ އެވެ. މީގެ އިތުރުން އެންމެ ގިނައިން ފަތުރުވެރިން ޒިޔާރަތް ކުރި ފަސް ގައުމުގެ ތެރޭގައި ހިމެނޭ ޖަރުމަނުން 7,498 ފަތުރުވެރިން އައިސްފައިވާއިރު، އިންޑިއާ އޮތީ 4,458 ފަތުރުވެރިންނާއެކު ހަވަނައިގަ އެވެ.
ފަތުރުވެރިން ޗުއްޓީ ހޭދަ ކުރި ތަންތަނަށް ބަލާއިރު، އެންމެ ބޮޑު ހިއްސާއެއް އޮތީ ރިސޯޓުތަކުގަ އެވެ. ރިސޯޓުތަކުގައި 83,437 ފަތުރުވެރިން މަޑުކޮށްފައިވާއިރު، މިއީ ޖުމްލަ ފަތުރުވެރިންގެ 69 އިންސައްތަ އެވެ. ގެސްޓްހައުސްތަކުގައި 31,141 ފަތުރުވެރިން ޗުއްޓީ ހޭދަ ކޮށްފައިވެ އެވެ. ހޮޓާތަކާއި ސަފާރީ އުޅަނދުތަކުގެ ހިއްސާއަކީ ފަސް އިންސައްތައަށްވުރެ ކުޑަ މިންވަރެކެވެ.
ޖަނަވަރީ މަހުގެ ދުވަހެއްގެ މައްޗަށް ބަލާއިރު، އެވްރެޖްކޮށް 6,000 އާއި 8,000 އާ ދެމެދުގެ އަދަދަކަށް ފަތުރުވެރިން ޒިޔާރަތްކޮށްފައިވެ އެވެ. އަދި މަހުގެ ފުރަތަމަ ފަނަރަ ދުވަހުގެ ތެރޭގައި ބައެއް ދުވަސްދުވަހު 7,500 އަށްވުރެ ގިނަ ފަތުރުވެރިން ޒިޔާރަތްކޮށްފައިވާކަން ފާހަގަކުރެވެ އެވެ.
ޖަނަވަރީ މަހުގެ މެދާ ހަމައަށް ޖުމްލަ 67,787 އެނދު އޮޕަރޭޝަނުގައި ހުއްޓެވެ. މީގެ ތެރެއިން ތިންބައިކުޅަ ދެބައި ހިއްސާކުރަނީ ރިސޯޓުތަކުންނެވެ. އަދި ހަތަރުބައިކުޅަ އެއްބައި ހިއްސާކުރަނީ ގެސްޓްހައުސްތަކުންނެވެ.
