ގެސްޓްހައުސް ހިންގަމުންދާ ރަށްރަށުގެ ކައުންސިލްތަކުން އުސޫލުތަކާއި ގަވާއިދުތައް ތަންފީޒު ކުރަމުންދާ ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ)އިން ބުނެފިއެވެ.
ގެސްޓްހައުސް ހިންގަމުންދާ ރަށްރަށުގައި ފަތުރުވެރިން ނިވާކަން ކުޑަ ހެދުން އަޅައިގެން ރަށު ތެރޭގައި އުޅޭ މައްސަލަ ވަނީ ފެންމަތިވެފައެވެ. ބައެއް ރަށްރަށުގެ ރައްޔިތުން އެކަމާއި ނުރުހުން ފާޅުކޮށް، ކައުންސިލްތަކާއި ބައްދަލުކޮށްފައިވެއެވެ. އުސޫލު ތަންފީޒު ކުރުވުމުގައި ކައުންސިލްތަކުން އިހުމާލުވަމުންދާ ކަމަށް ބުނެފައިވެއެވެ.
މިމައްސަލައަށް އިޝާރާތްކޮށް އެލްޖީއޭގެ ޗީފް އެގްޒެކެޓިވް އޮފިސަރ ފާތިމަތު އަފްޝަން ލަތީފް ވިދާޅުވީ ކައުންސިލްތަކަށް ފިޔަވަޅު އެޅުމަކީ އަމާޒެއް ނޫން ކަމަށާއި، މަސައްކަތް ކުރަނީ ކައުންސިލްތައް އިތުރަށް ޒިންމާދާރު ކުރުވުމަށް ކަމަށެވެ. މިހާރުވެސް ގެސްޓްހައުސްތައް ހިންގަމުންދާ ރަށްރަށުގައި ކައުންސިލާއި ޓޫރިޒަމް މިނިސްޓްރީން ގުޅިގެން އަހުލުވެރިކުރުވުމުގެ ގޮތުން ތަފާތު ޕްރޮގްރާމްތައް ކުރިއަށް ގެންދާ ކަމަށް އަފްޝަން ވިދާޅުވިއެވެ. އަދި ވިދާޅުވީ ގިނަ ކައުންސިލްތަކުން އުސޫލުތައް ތަންފީޒު ކުރަމުންދާ ކަމަށެވެ.
މީގެ އިތުރުން އަފްޝަން ވިދާޅުވީ ކައުންސިލްތަކުން އެންމެ ފުރިހަމަ ގޮތުގައި ޒިންމާ އަދާނުކުރާނަމަ ފިޔަވަޅު އަޅާނެ ކަމަށާއި، ކައުންސިލްތައް ޒިންމާދާރު ކުރުމުގެ މަސައްކަތްތައް އަބަދު ވެސް ކުރިއަށްދާ ކަމަށެވެ. އަދި ވަރަށް ގާތުން ކައުންސިލްތައް މޮނިޓަރ ކުރަމުންދާ ކަމަށް ވިދާޅުވިއެވެ.
ރާއްޖޭގެ ބައެއް ރަށްރަށުގައި ފުޅާ ދާއިރާގައި ގެސްޓްހައުސް ވިޔަފާރި ހިންގަމުންދާއިރު، ދާދި ފަހުން އއ. ތޮއްޑޫގައި ހިންގާ ގެސްޓުހައުސްތަކަށް އެރަށު ކައުންސިލުން ޒިޔާރަތްކޮށް ފަތުރުވެރިންނަށް ހެދުން އެޅުމުގެ ގަވާއިދު ކިޔައިދީ ނަސޭހަތްތެރިވެ ނޯޓިސް ހަރުކުރުމުގެ ހަރަކާތެއް ކުރިއަށް ގެންގޮސްފައިވެއެވެ.
ކައުންސިލުން ބުނީ ގެސްޓުހައުސްތަކަށް ކައުންސިލަރުން ޒިޔާރަތްކޮށް، ފަތުރުވެރިން ހެދުން އެޅުމުގެ ގަވާއިދު ފެންނާނެ ފަދަ ނޯޓިސް އެތަންތަނުގެ ތެރޭގައި ހަރުކުރުމަށް ނިންމާފައިވާ ކަމަށެވެ. ގަވާއިދުތައް ތަންފީޒުކުުރުވައި މޮނިޓަަރ ކުރުމަށް އެކަމަށް ޚާއްސަ މުއައްޒަފުން މި ޖެނުއަރީ މަސް ނިމުމުގެ ކުރިން ނަގާނެކަމަށް ކައުންސިލުން ބުނެއެވެ. އަދި އެއަތޮޅު ރަސްދޫ ކައުންސިލުން ވެސް ވަނީ މި މައްސަލަ ފެންމަތިވަމުންދާތީ އުސޫލުތަކާއި އެއްގޮތަށް އަމަލުކުރުމަށް ގޮވާލާފައެވެ. މީގެ އިތުރުން ކ.މާފުށީ ކައުންސިލުން ވެސް ވަނީ ގަވާއިދާ ޚިލާފަށް އަމަލުކުރާ ގެސްޓްހައުސްތަކަށް ފިޔަވަޅު އަޅާނެ ކަމަށް ބުނެފައެވެ.
