ގަވާއިދާ ޚިލާފުވި އިތުރު ގެސްޓްހައުސްއެއް ސަސްޕެންޑްކޮށްފި
ދެކުނު އޭޝިއާއިން އަންނަ ފަތުރުވެރިންނަށް ހުއްދަ ދީފައިވަނީ ރިސޯޓުތަކާއި ސަފާރީތަކަށް ދިއުމުގެ ހުއްދަ އެކަނި
ރާއްޖެ އައި ފަތުރުވެރިންތަކެއް
ދެކުނު އޭޝިއާގެ ފަތުރުވެރިން ރާއްޖެ އައުމަށް އެކުލަވާލާފައިވާ އުސޫލުތަކާ ޚިލާފަށް އަމަލުކުރި އިތުރު ގެސްޓްހައުސްއެއް ޓޫރިޒަމް މިނިސްޓްރީން ސަސްޕެންޑްކޮށްފިއެވެ.
ޓޫރިޒަމް މިނިސްޓްރީން ކޮށްފައިވާ ޓްވީޓެއްގައި ވަނީ ދެކުނު އޭޝިއާގެ ފަތުރުވެރިން ރާއްޖެ އައުމާ ގުޅިގެ އެކުލަވާލާފައިވާ އުސޫލާ ޚިލާފުވެގެން މާލެ ސަރަހައްދުގެ އިތުރު ގެސްޓްހައުސްއެއް ސަސްޕެންޑް ކޮށްފައިވާ ކަމަށެވެ.
ދެކުނު އޭޝިއާއިން އަންނަ ފަތުރުވެރިންނަށް، ރިސޯޓުތަކާއި ސަފާރީތަކަށް ދިއުމުގެ ހުއްދަ ދީފައިވާއިރު، ގެސްޓްހައުސްތަކުގައި ތިބުމުގައި ހުއްދަ ދީފައިވަނީ ހަމައެކަނި ޓްރާންސިޓްގައި ކަމަށާއި، އެހެންނަމަވެސް މި އުސޫލުތަކާ ޚިލާފުވެ، ޓްރާންސިޓް މުއްދަތަށްވުރެ އިތުރަށް ބައެއް ފަތުރުވެރިން ގެސްޓްހައުސްތަކުގައި ތިބޭ ކަމަށް މިނިސްޓްރީން ވަނީ ހާމަކޮށްފައެވެ. ގެސްޓް ހައުސްތަކުން ފަތުރުވެރިންނަށް ޚިދުމަތް ދިނުމުގައި އެކުލަވާލާފައިވާ އުސޫލުތަކާ އެއްގޮތަށް އަމަލުކުރޭތޯ ބެލުމުގެ މަސައްކަތް ޓޫރިޒަމް މިނިސްޓްރީން ގާތުން ކުރަމުންދާއިރު، އެކަމަށް ހާއްސަ އިންސްޕެކްޝަން ޓީމެއް މިނިސްޓްރީން ވަނީ އެކުލަވާލާފައެވެ.
ޓޫރިޒަމް މިނިސްޓްރީން މި އިންސްޕެކްޝަންތައް ކުރިއަށްގެންދާއިރު، ދެކުނު އޭޝިއާއިން އަންނަ ފަތުރުވެރިންނާގުޅޭ ކަންކަން ގާތުން ބައްލަވަމުންދާނެކަމަށް ޓޫރިޒަމް މިނިސްޓަރ ޑރ. ޢަބްދުﷲ މަޢުޞޫމް ވަނީ ވިދާޅުވެފައެވެ. ދެކުނު އޭޝިއާއިން އަންނަ ފަތުރުވެރިންނަށް ރާއްޖެ ބަންދުކޮށްފައި އޮތުމަށް ފަހު ހުޅުވާލީ ބުރާސްފަތި ދުވަހުއެވެ. ޓޫރިޒަމް މިނިސްޓަރ ކުރެއްވި ޓުވީޓެއްގައި ވަނީ ދެކުނު އޭޝިއާގެ ފަތުރުވެރިންނާގުޅޭ އިންތަކާއި މިންތައް ތަންފީޒު ކުރާމިންވަރު ބަލަން ހޮޓެލް/ގެސްޓްހައުސް ޓޫރިޒަމް ޓީމުން ޗެކުކުރަމުންދާނެ ކަމަށެވެ. އަދި ވިޔަފާރި ބަންދުކުރުމަކީ ހައްލެއް ނޫން ކަމަށާއި، އެގޮތަށް އެކަންކުރަން ބޭނުންފުޅުވެސް ނުވާ ކަމަށެވެ. ނަމަވެސް ކަންކަން ޗެކުކުރާއިރު، މިންގަނޑުތަކަށް ނުފެތޭ ނަމަ ބަންދުކުރުން ނޫން ގޮތެއް ވެސް ނޯންނާނެ ކަމަށެވެ.
ދެކުނު އޭޝިއާގެ ފަތުރުވެރިންނަށް ރާއްޖެ އައުމުގެ ހުއްދަ ދީފައި މިވަނީ ޚާއްސަ އުސޫލެއްގެ ދަށުންނެވެ. އެސަރަހައްދުން ރާއްޖެ އަންނަ ފަތުރުވެރިންނަށް ހަމައެކަނި ރިސޯޓުތަކަށް ދިއުމުގެ ހުއްދަ ދިނުމަށް ނިންމާފައިވާއިރު، ގެސްޓް ހައުސްތަކަށް ދިއުމުގެ ހުއްދަ ލިބިގެންދާނީ ޖުލައި 30ން ފެށިގެންނެވެ. އޭގެއިތުރުން ދެކުނު އޭޝިއާގެ ގައުމުތަކުން އަންނަ ފަތުރުވެރިންނަށް ޓްރާންސިޓް ކުރެވޭނީ ޓޫރިޒަމް މިނިސްޓްރީން ކަނޑައަޅާ ގެސްޓް ހައުސްތަކުގައި އެކަނި ކަމަށް ހެލްތް ޕްރޮޓެކްޝަން އެޖެންސީން ވަނީ ބުނެފައެވެ.
އެގޮތުން އެޗްޕީއޭއިން ވަކި ގޮތެއް އަންގަންދެން، މީހުން ދިރިއުޅޭ ރަށްރަށާއި އެ ރަށްރަށުގައި ހުންނަ ގެސްޓް ހައުސްތަކަށް ފަތުރުވެރިންނަށް ޗެކްއިން ނުވެވޭނެ ކަމަށާއި، މާލޭގައި ފަތުރުވެރިން ފުރުމަށްޓަކައި ޓްރާންސިޓް ކުރުމަށް ޓޫރިޒަމް މިނިސްޓްރީން ކަނޑައަޅާ އުސޫލެއްގެ ދަށުން، އެ މިނިސްޓްރީން ކަނޑައަޅާފައިވާ ގެސްޓް ހައުސްތަކުގައި ތިބެވޭނެކަމަށް ވަނީ ބުނެފައެވެ.
