ފަތުރުވެރިކަމުގެ ދާއިރާގެ ކުދި ވިޔަފާރިތަކަށް އީޔޫއިން ދޫކުރާ ހިލޭ އެހީއަށް އެދުމުގެ މުއްދަތު އިތުރުކޮށްފި

ފަތުރުވެރިކަމުގެ ދާއިރާގެ ކުދި އަދި މެދުފަންތީގެ ވިޔަފާރިތަކަށް އެހީވުމަށް ޔޫރަޕިއަން ޔޫނިއަނުން ހިންގާ "ސަޕޯޓް ފޯ އަ ރެޒީލިއަންޓް ރިކަވަރީ އޮފް އެސްއެމްއީ ޓޫރިޒަމް އިންޑަސްޓްރީ އިން ދަ މޯލްޑިވްސް" ޕްރޮޖެކްޓުގެ ދަށުން ދޭ ހިލޭ އެހީއަށް އެދެން ހުޅުވާލާފައިވާ މުއްދަތު އިތުރުކޮށްފިއެވެ.

މޯލްޑިވްސް ފަންޑް މެނޭޖްމެންޓް ކޯޕަރޭޝަން (އެމްއެފްއެމްސީ)އިން ބުނީ މި ހިލޭ އެހީއަށް އެދުމުގެ ފުރުސަތު އިތުރުކޮށްފައިވަނީ ކުރިން ހުޅުވާލި މުއްދަތު ހަމަވީއިރުވެސް އެކަށީގެންވާ އަދަދެއްގެ ވިޔަފާރިތަކުން އެހީއަށް އެދިފައި ނުވާތީއެވެ. އެމްއެފްއެމްސީން ބުނީ ކުރިން ހުޅުވާލި މުއްދަތު ހަމަވީއިރު، އެހީއަށް އެދި ހުށަހަޅާފައިވަނީ މިއަށް އެދި ހުށަހެޅުމުގެ ޝަރުތު ހަމަވާ ވިޔަފާރިތަކުގެ ތެރެއިން އެންމެ 53 އިންސައްތަ ވިޔަފާރި ކަމަށެވެ. އަދިވެސް ޝަރުތު ހަމަވާ 47 އިންސައްތަށް ވިޔަފާރިވާއިރު، އެހީއަށް އެދުމުގެ ފުރުސަތު 31 އޮގަސްޓުގެ މެންދުރުފަހު 2:00 އާ ހަމައަށް ހުޅުވާލާފައިވާކަމަށެވެ.

Advertisement

މި އެހީއަށް އެދި ހުށަހެޅޭނީ 100 އިންސައްތަ ދިވެހި ވިޔަފާރިތަކަށެވެ. ގެސްޓްހައުސްތަކާއި، ސަފާރީތަކަށްވެސް އެހީއަށް އެދެވޭނެއެވެ. އެ ވިޔަފާރިތަކަކީ 2019 ވަނަ އަހަރުގެ ޑިސެމްބަރު ނުވަތަ 2020 ވަނަ އަހަރުގެ ޖެނުއަރީ ނުވަތަ ފެބްރުއަރީގެ ކުރިން ރަޖިސްޓްރީކޮށްފައިވާ ވިޔަފާރިއަކަށް ވާންޖެހެއެވެ. އެ ގެސްޓްހައުސްއެއް ނުވަތަ ސަފާރީއެއްގައި ގިނަވެގެން ހުންނަންޖެހެނީ 40 އެނދެއެވެ.

އެމްއެފްއެމްސީން ބުނީ މިހާތަނަށް 286 ގެސްޓްހައުސްއަކަށް އަދި 59 ސަފާރީއަށް އެހީ ދޫކުރެވިފައިވާކަމަށެވެ. ޖުމްލަ 13،078،540 (ތޭރަމިލިއަން ހަތްދިހައަށްހާސް ފައްސަތޭކަ ސާޅީސް) ރުފިޔާ ވަނީ ދޫކޮށްފައެވެ.

މިއީ ކޮވިޑް-19 ގެ ސަބަބުން ދިވެހިރާއްޖޭގެ ފަތުރުވެރިކަމުގެ ސިނާއަތަށް ދިމާވި ގޮންޖެހުންތަކުން އަރައިގަތުމަށް ޚާއްސަކުރެވިފައިވާ އެހީއެކެވެ. މި ޕްރޮޖެކްޓުގެ މައިގަނޑު މަގުސަދަކީ ދިވެހިރާއްޖޭގައި ވިލުންވެރި އަދި ސިންދަފާތު ކުރެވިފައިވާ އިގްތިސާދެއް ބިނާކުރުމަށް މަގުފަހިކުރުމެވެ. އެގޮތުން މިޕްރޮޖެކްޓްގެ ދަށުން ވިޔަފާރިތަކަށް ގްރާންޓުގެ ގޮތުގައި 1.4 މިލިއަން ޔޫރޯ (ގާތްގަނޑަކަށް 25 މިލިއަން ދިވެހި ރުފިޔާ) ދޫކުރުމަށް ހަމަޖެހިފައިވެއެވެ.

މި ޕްރޮޖެކްޓާ ގުޅިގެން މީގެ ކުރިން ބޭއްވި ހަފްލާއެއްގައި އީޔޫގެ ފަރާތުން ވާހަކަދައްކަވަމުން ހެޑް އޮފް ކޯޕޮރޭޝަން އެޓް ދަ އީޔޫ ޑެލިގޭޝަން ޓު ސްރީލަންކާ އެންޑް ދަ މޯލްޑިވްސް، ޖެނީ ކޮރެއިއާ ނޫންސް ފާހަގަކުރެއްވީ މިއީ ކޮވިޑް-19 ގެ ފުރަބަންދުގެ ސަބަބުން އެންމެ ބޮޑަށް އަސަރުކުރި ކުދި ވިޔަފާރިތަކަށް އަމާޒުކުރެވިފައިވާ ޕްރޮޖެކްޓެއް ކަމަށެވެ. އަދި މި ޕްރޮޖެކްޓުގެ ސަބަބުން ސަރުކާރުގެ އަމާޒެއްކަމުގައިވާ ފަތުރުވެރިކަމުގެ ސިނާއަތް ސިންދަފާތުކުރެވި، މިކަމުގައި މުޖްތަމައުގެ ބައިވެރިވުން އިތުރުކުރެވުމުގެ ސަބަބުން އެކަމުގެ ފައިދާ އެފަރާތްތަކަށް ލިބިގެންދާނެ ކަމަށް ޖެނީ ވިދާޅުވިއެވެ. އަދި މި އެހީއާއެކު ގެސްޓްހައުސްތަކާއި ސަފާރީތަކުން އެތަންތަނަށް ޒިޔާރަތްކުރާ ފަރާތްތަކަށް ހެޔޮ އަގުތަކެއްގައި، މުޖްތަމައާއި ވީހަވެސް ކައިރިން ތަފާތު ތަޖުރިބާތައް ފޯރުކޮށްދިނުމަށް މަގުފަހިވާނެކަންވެސް އޭނާ ފާހަގަކުރެއްވިއެވެ. އަދި މިކަން ވެގެންދާނީ އެފަރާތްތަކަށް ދިވެހިރާއްޖޭގެ ސަގާފަތާއި ދިވެހިންގެ ދިރިއުޅުމުގެ ވައްޓަފާޅި އާއި ގުޅޭ މައުލޫމާތު ލިބިގެންދާނެ ފުރުސަތަކަށްކަމަށްވެސް ވިދާޅުވިއެވެ.

މި އެހީ އާއި ގުޅޭގޮތުން ވާހަކަދައްކަވަމުން މިނިސްޓަރ އޮފް އިކޮނޮމިކް ޑިވެލޮޕްމަންޓުގެ ނައިބު ހުސައިން ޒަމީރު ވިދާޅުވީ މިއީ ރާއްޖޭގެ ފަތުރުވެރިކަމުގެ ސިނާއަތް އަލުން އާރާސްތުކުރުމުގައި އިސް ދައުރެއް އަދާކުރި ޕްރޮޖެކްޓެއް ކަމަށެވެ.

މިޕްރޮޖެކްޓްގެ ޒަރިއްޔާއިން 600 އަށް ވުރެ ގިނަ ކުދި އަދި މެދުފަންތީގެ ވިޔަފާރިތަކަށް އެހީ ފޯރުކޮށްދެވިގެންދާނެ ކަމަށް ލަފާކުރެވެއެވެ. މިގޮތުން އޮޕަރޭޓް ކުރުމުގެ ޞައްހަ ލައިސަންސެއް ޑިސެންބަރު 2019 ނުވަތަ ޖަނަވަރީ 2020 ނުވަތަ ފެބުރުވަރީ 2020 ގައި އޮތް ފަރާތްތަކަށް މިއެހީއަށް އެދި ހުށަހެޅުމަށް ޝަރުތުހަމަވާނެއެވެ.

މިއީ އީޔޫގެ ފަރާތުން ކޮވިޑް-19 އާއި ގުޅިގެން ދިވެހިރާއްޖެއަށް ފުޅާ ދާއިރާއެއްގައި ފޯރުކޮށްދޭ އެހީތަކުގެ ތެރެއިން ހިމެނިގެން ދެވޭ އެހީއެކެވެ. އޭގެ ތެރޭގައި ދިވެހިރާއްޖޭގެ ސިއްޙީ ދާއިރާއަށް ޚާއްސަކޮށް ފޯރުކޮށްދިން 1 މިލިއަން ޔޫރޯގެ ހިލޭ އެހީވެސް ހިމެނެއެވެ.