ދީނާ ބީރައްޓެހި އަމަލު ހިންގާ ގެސްޓް ހައުސްތަކުގެ އެއްބަސްވުން ބާތިލްކުރާނެކަމަށް މާފުށީ ކައުންސިލުން ބުނެފި

ދީނާ ބީރައްޓެހި އަމަލު ހިންގާ ގެސްޓް ހައުސްތަކުގެ އެއްބަސްވުން ބާތިލްކުރާނެކަމަށް މާފުށީ ކައުންސިލުން ބުނެފިއެވެ.

މިކަން ހާމަކޮށް އެކައުންސިލުން ނެރެފައިވާ އިއުލާނުގައި ބުނެފައިވަނީ، އިސްލާމް ދީނާ ބީރައްޓެހި, ދީނުގެ އަސާސްތަކާއި މުޖުތަމައުގެ ރީތި އާދަކާދަތަކާއި މުޅިން ޚިލާފު ކަންކަން ކުރިޔަށް ގެންދާތީ ކަންބޮޑުވާ ކަމަށާއި، ރައްޔިތުންގެ ފަރާތުންވެސް ޝަކުވާ ލިބެމުން އަންނަ ކަމަށެވެ. އަދި އެފަދަ އަމަލު ހިންގާ ފަރާތްތަކާމެދު ފިޔަވަޅު އަޅާނެ ކަމަށެވެ.

އެއްބަސްވުމުގައި, ޣައިރު ޤާނޫނީ އެއްވެސް މަސައްކަތެއް ނުވަތަ އެކަށީގެންނުވާ، ބޭއަދަބީ އެއްވެސް ބޭނުމަކަށް ބިން ބޭނުންކޮށްގެން ނުވާނެ ކަމަށް ބަޔާންކޮށްފައި އޮތްނަމަވެސް ކަންކަން ހިނގަނީ އެހެން ނޫންކަމަށް ކައުންސިލުންވަނީ ބުނެފައެވެ. ގިނަ ބިންތަކުގައި ދިވެހިރާއްޖޭގެ ޤާނޫނާއި ގަވާއިދުތަކާ ޚިލާފަށް, އިސްލާމީ މުޖުތަމައެއްގައި ކުރުމަށް ބަލައި ނުގަނެވޭނެފަދަ އަމަލުތައް ހިންގަމުން އަންނަކަމުގެ ޝަކުވާ ރަށުގެ އާންމު ރައްޔިތުންގެ ފަރާތުންލިބި، ކައުންސިލަށްވެސް އެކަން ފާހަގަކުރެވިފައިވާ ކަމަށް އިއުލާނުގައި ވެއެވެ.

އެ ބަޔާނުގައި ބުނެފައިވަނީ ނަމާދު ގަޑި ތަކުގަޔާއި ރޭގަނޑު 12:00ގެ ފަހުން އަޑުގަދަކޮށް ބާރަށް ލަވަ ޖަހާ މައްސަލައާއި، ކައުންސިލްގެ ހުއްދަ ނެތި, ބިންތަކާއި އިންވެގެންވާ މަގުތައް ބަންދުކޮށް އެތަނުގައި ދިވެހިރާއްޖޭގެ ގާނޫނާއި ގަވާއިދުތަކާއި، އިސްލާމް ދީނާއި ދިވެހި ސަގާފަތާ ފުށުއަރާފަދަ ޣައިރު މުސްލިމުންގެ ދީންތަކާގުޅޭ ދުވަސްތައް ފާހަގަކުރުމާއި، އިސްލާމީ ރިވެތި އަޚްލާގުގެ ބޭރުން އަމަލުކުރަމުން އަންނަކަން ކައުންސިލްގެ ސަމާލުކަމަށް އައިސްފައިވާކަމަށެވެ.

މާފުށީ ކައުންސިލުން ބުނީ, ބިންތައް ކުއްޔަށް ދީފައިވާ އެއްބަސްވުމާ ޚިލާފަށް ބިންތަކުގައި ކުރިއަށްގެންދާ ހަރަކާތްތައް ހުއްޓާލުމަށާއި، ބިން ދޫކޮށްފައިވާ ބޭނުން ފިޔަވައި އެހެން ބޭނުމެއް ބިމުގައި ކުރަންވާނީ ކައުންސިލަށް ލިޔުމުން ހުށަހަޅައި ލިޔުމުން ހުއްދަ ހޯދައިގެންކަމަށެވެ. މިނޫން ގޮތަކަށް ބިންތައް ބޭނުންކުރާނަމަ, އެއްބަސްވުމުގެ 11 ވަނަ މާއްދާއިން ކައުންސިލަށް ލިބިދޭ ބާރުގެ ދަށުން އެއްބަސްވުން ބާތިލްކުރާނެކަމަށެވެ.

ފުޅާ ދާއިރާއެއްގައި ގެސްޓްހައުސް ވިޔަފާރި ކުރަމުންދާ މާފުއްޓަކީ ފަތުރުވެރިންނާއި ދިވެހިންވެސް ގިނައަދަދަކަށް ޒިޔާރަތްކުރާ ރަށެކެވެ. އެރަށުގެ އާމްދަނީގެ ބޮޑު ހިއްސާއެއްވެސް އަދާކުރަނީ ލޯކަލް ޓޫރިޒަމެވެ.