ގަވާއިދާ ޚިލާފުވި 3 ގެސްޓް ހައުސްއެއް ސަސްޕެންޑްކޮށް، އިތުރު 3 ތަނަކަށް އިންޒާރުދީފި
17 ޖުލައި 2021 | ހޮނިހިރު 14:00ސައުތު އޭޝިއާއިން އަންނަ ފަތުރުވެރިންނަށް ހުއްދަ ދީފައިވަނީ ރިސޯޓުތަކާއި ސަފާރީތަކަށް ދިއުމުގެ ހުއްދަ އެކަނި
ޓޫރިޒަމް މިނިސްޓަރ ޢަބްދުﷲ މަޢުޞޫމް
ގަވާއިދާ ޚިލާފުވި ތިން ގެސްޓް ހައުސްއެއް ސަސްޕެންޑްކޮށް، އިތުރު ތިން ތަނަކަށް އިންޒާރުދީފިއެވެ.
ސައުތު އޭޝިއާއިން އަންނަ ފަތުރުވެރިންނަށް، ރިސޯޓުތަކާއި ސަފާރީތަކަށް ދިއުމުގެ ހުއްދަ ދީފައިވާއިރު، ގެސްޓް ހައުސްތަކުގައި ތިބުމުގައި ހުއްދަ ދީފައިވަނީ ހަމައެކަނި ޓްރާންސިޓްގައި ކަމަށާއި، އެހެންނަމަވެސް މި އުސޫލުތަކާ ޚިލާފުވެ، ޓްރާންސިޓް މުއްދަތަށްވުރެ އިތުރަށް ބައެއް ފަތުރުވެރިން ގެސްޓްހައުސްތަކުގައި ތިބޭ ކަމަށް މިނިސްޓްރީން ވަނީ ހާމަކޮށްފައެވެ. މި އިންސްޕެކްޝަންގައި، ގްރޭޓަރ މާލެ ސަރަހައްދުގައި ހިންގަމުން އަންނަ ތިން ގެސްޓް ހައުސްއެއް ސަސްޕެންޑްކޮށް، އިތުރު ތިން ތަނަކަށް އިންޒާރުދީފައިވާ ކަމަށް އެ މިނިސްޓްރީން ބުނެއެވެ. އަދި މި އިންސްޕެކްޝަންތައް ކުރިއަށް އޮތް ދެ ހަފްތާއަށް ކުރިއަށްދާނެ ކަމަށް ވެސް މިނިސްޓްރީން ފާހަގަކުރިއެވެ.
ޓޫރިޒަމް މިނިސްޓްރީން މި އިންސްޕެކްޝަންތައް ކުރިއަށްގެންދާއިރު، ސައުތު އޭޝިއަން ޓޫރިސްޓުންނާގުޅޭ ކަންކަން ގާތުން ބައްލަވަމުންދާނެ ކަމަށް ޓޫރިޒަމް މިނިސްޓަރ ޢަބްދުﷲ މަޢުޞޫމް ވަނީ ވިދާޅުވެފައެވެ. ސައުތު އޭޝިއާއިން އަންނަ ފަތުރުވެރިންނަށް ރާއްޖެ ބަންދުކޮށްފައި އޮތުމަށް ފަހު ހުޅުވާލީ ބުރާސްފަތި ދުވަހުއެވެ. ޓޫރިޒަމް މިނިސްޓަރ ކުރެއްވި ޓުވީޓެއްގައި ވިދާޅުވީ ސައުތު އޭޝިއަން ޓޫރިސްޓުންނާގުޅޭ އިންތަކާއި މިންތައް ތަންފީޒު ކުރާމިންވަރު ބަލަން ހޮޓެލް/ގެސްޓްހައުސް ޓޫރިޒަމް ޓީމުން ޗެކުކުރަމުންދާނެ ކަމަށެވެ. އަދި ވިޔަފާރި ބަންދުކުރުމަކީ ހައްލެއް ނޫން ކަމަށާއި، އެގޮތަށް އެކަންކުރަން ބޭނުންފުޅުވެސް ނުވާ ކަމަށެވެ. ނަމަވެސް ކަންކަން ޗެކުކުރާއިރު، މިންގަނޑުތަކަށް ނުފެތޭ ނަމަ ބަންދުކުރުން ނޫން ގޮތެއް ވެސް ނޯންނާނެ ކަމަށެވެ.
ދެކުނު އޭޝިއާގެ ފަތުރުވެރިންނަށް ރާއްޖެ އައުމުގެ ހުއްދަ ދީފައި މިވަނީ ޚާއްސަ އުސޫލެއްގެ ދަށުންނެވެ. އެސަރަހައްދުން ރާއްޖެ އަންނަ ފަތުރުވެރިންނަށް ހަމައެކަނި ރިސޯޓުތަކަށް ދިއުމުގެ ހުއްދަ ދިނުމަށް ނިންމާފައިވާއިރު، ގެސްޓް ހައުސްތަކަށް ދިއުމުގެ ހުއްދަ ލިބިގެންދާނީ ޖުލައި 30ން ފެށިގެންނެވެ. އޭގެއިތުރުން ދެކުނު އޭޝިއާގެ ގައުމުތަކުން އަންނަ ފަތުރުވެރިންނަށް ޓްރާންސިޓް ކުރެވޭނީ ޓޫރިޒަމް މިނިސްޓްރީން ކަނޑައަޅާ ގެސްޓް ހައުސްތަކުގައި އެކަނި ކަމަށް ހެލްތް ޕްރޮޓެކްޝަން އެޖެންސީން ވަނީ ބުނެފައެވެ.
އެގޮތުން އެޗްޕީއޭއިން ވަކި ގޮތެއް އަންގަންދެން، މީހުން ދިރިއުޅޭ ރަށްރަށާއި އެ ރަށްރަށުގައި ހުންނަ ގެސްޓް ހައުސްތަކަށް ފަތުރުވެރިންނަށް ޗެކްއިން ނުވެވޭނެ ކަމަށާއި، މާލޭގައި ފަތުރުވެރިން ފުރުމަށްޓަކައި ޓްރާންސިޓް ކުރުމަށް ޓޫރިޒަމް މިނިސްޓްރީން ކަނޑައަޅާ އުސޫލެއްގެ ދަށުން، އެ މިނިސްޓްރީން ކަނޑައަޅާފައިވާ ގެސްޓް ހައުސްތަކުގައި ތިބެވޭނެކަމަށް ވަނީ ބުނެފައެވެ.
