އީޔޫގެ ފަރާތުން ރާއްޖޭގެ ގިނަ ގެސްޓްހައުސްތަކަށް ހިލޭ އެހީ ފޯރުކޮށްދީފި
ގެސްޓްހައުސްތަކަށް ގާތްގަނޑަކަށް 36 މިލިއަން ރުފިޔާ ހަދިޔާކޮށްފައިވޭ
އީޔޫއިން ގެސްޓްހައުސްތަކަށް އެހީވުން
ޔޫރަޕިއަން ޔޫނިއަންގެ "ސަޕޯޓް ފޯ އަ ރެޒީލިއަންޓް ރިކަވަރީ އޮފް އެސްއެމްއީ ޓޫރިޒަމް އިންޑަސްޓްރީ އިން ދަ މޯލްޑިވްސް" ޕްރޮޖެކްޓުގެ ދަށުން ގިނަ އަދަދެއްގެ ގެސްޓްހައުސްތަކަށް ހިލޭ އެހީ ފޯރުކޮށްދީފިއެވެ.
މި ހިލޭ އެހީ ފޯރުކޮށްދީފައިވަނީ ޔޫރަޕިއަން ޔޫނިއަން، މިނިސްޓްރީ އޮފް އިކޮނޮމިކް ޑިވެލޮޕްމަންޓް އަދި ޕްރައިވެޓް ސެކްޓަރ ވިޔަފާރިތަކުގެ ބައިވެރިވުމާއެކު ތުލުސްދޫގައި ބޭއްވި ހަފްލާއެއްގައެވެ. މި ހަފްލާގައި އީޔޫއިން ވަނީ ގާތްގަނޑަކަށް 36 މިލިއަން ދިވެހި ރުފިޔާ ގެސްޓްހައުސްތަކަށް ހަދިޔާކޮށްފައެވެ. މިއީ ކޮވިޑް-19 ގެ ސަބަބުން ދިވެހިރާއްޖޭގެ ފަތުރުވެރިކަމުގެ ސިނާއަތަށް ދިމާވި ގޮންޖެހުންތަކުން އަރައިގަތުމަށް ޚާއްސަކުރެވިފައިވަ އެހީއެކެވެ.
މި ޕްރޮޖެކްޓުގެ މައިގަނޑު މަގުސަދަކީ ދިވެހިރާއްޖޭގައި ވިލުންވެރި އަދި ސިންދަފާތު ކުރެވިފައިވާ އިގްތިސާދެއް ބިނާކުރުމަށް މަގުފަހިކުރުމެވެ. އެގޮތުން މިޕްރޮޖެކްޓްގެ ދަށުން ވިޔަފާރިތަކަށް ގްރާންޓުގެ ގޮތުގައި 1.4 މިލިއަން ޔޫރޯ (ގާތްގަނޑަކަށް 25 މިލިއަން ދިވެހި ރުފިޔާ) ދޫކުރުމަށް ހަމަޖެހިފައިވެއެވެ. އަދި މިހާތަނަށް މިއެހީ 219 ފަރާތަކަށް ފޯރުކޮށްދީފައިވާއިރު، އޭގެ ތެރޭގައި ހިމެނެނީ 181 ގެސްޓްހައުސްގެ އިތުރުން 38 ސަފާރީއެވެ.
އީޔޫގެ ފަރާތުން ވާހަކަދައްކަވަމުން ހެޑް އޮފް ކޯޕޮރޭޝަން އެޓް ދަ އީޔޫ ޑެލިގޭޝަން ޓު ސްރީލަންކާ އެންޑް ދަ މޯލްޑިވްސް، ޖެނީ ކޮރެއިއާ ނޫންސް ފާހަގަކުރެއްވީ މިއީ ކޮވިޑް-19 ގެ ފުރަބަންދުގެ ސަބަބުން އެންމެ ބޮޑަށް އަސަރުކުރި ކުދި ވިޔަފާރިތަކަށް އަމާޒުކުރެވިފައިވާ ޕްރޮޖެކްޓެއް ކަމަށެވެ. އަދި މި ޕްރޮޖެކްޓުގެ ސަބަބުން ސަރުކާރުގެ އަމާޒެއްކަމުގައިވާ ފަތުރުވެރިކަމުގެ ސިނާއަތް ސިންދަފާތުކުރެވި، މިކަމުގައި މުޖްތަމައުގެ ބައިވެރިވުން އިތުރުކުރެވުމުގެ ސަބަބުން އެކަމުގެ ފައިދާ އެފަރާތްތަކަށް ލިބިގެންދާނެ ކަމަށް ޖެނީ ވިދާޅުވިއެވެ. އަދި މި އެހީއާއެކު ގެސްޓްހައުސްތަކާއި ސަފާރީތަކުން އެތަންތަނަށް ޒިޔާރަތްކުރާ ފަރާތްތަކަށް ހެޔޮ އަގުތަކެއްގައި، މުޖްތަމައާއި ވީހަވެސް ކައިރިން ތަފާތު ތަޖުރިބާތައް ފޯރުކޮށްދިނުމަށް މަގުފަހިވާނެކަންވެސް އޭނާ ފާހަގަކުރެއްވިއެވެ. އަދި މިކަން ވެގެންދާނީ އެފަރާތްތަކަށް ދިވެހިރާއްޖޭގެ ސަގާފަތާއި ދިވެހިންގެ ދިރިއުޅުމުގެ ވައްޓަފާޅި އާއި ގުޅޭ މައުލޫމާތު ލިބިގެންދާނެ ފުރުސަތަކަށްކަމަށްވެސް ވިދާޅުވިއެވެ.
މި އެހީ އާއި ގުޅޭގޮތުން ވާހަކަދައްކަވަމުން މިނިސްޓަރ އޮފް އިކޮނޮމިކް ޑިވެލޮޕްމަންޓުގެ ނައިބު ހުސައިން ޒަމީރު ވިދާޅުވީ މިއީ ރާއްޖޭގެ ފަތުރުވެރިކަމުގެ ސިނާއަތް އަލުން އާރާސްތުކުރުމުގައި އިސް ދައުރެއް އަދާކުރި ޕްރޮޖެކްޓެއް ކަމަށެވެ.
މިޕްރޮޖެކްޓްގެ ޒަރިއްޔާއިން 600 އަށް ވުރެ ގިނަ ކުދި އަދި މެދުފަންތީގެ ވިޔަފާރިތަކަށް އެހީ ފޯރުކޮށްދެވިގެންދާނެ ކަމަށް ލަފާކުރެވެއެވެ. މިގޮތުން އޮޕަރޭޓް ކުރުމުގެ ޞައްހަ ލައިސަންސެއް ޑިސެންބަރު 2019 ނުވަތަ ޖަނަވަރީ 2020 ނުވަތަ ފެބުރުވަރީ 2020 ގައި އޮތް ފަރާތްތަކަށް މިއެހީއަށް އެދި ހުށަހެޅުމަށް ޝަރުތުހަމަވާނެއެވެ.
މިއީ އީޔޫގެ ފަރާތުން ކޮވިޑް-19 އާއި ގުޅިގެން ދިވެހިރާއްޖެއަށް ފުޅާ ދާއިރާއެއްގައި ފޯރުކޮށްދޭ އެހީތަކުގެ ތެރެއިން ހިމެނިގެން ދެވޭ އެހީއެކެވެ. އޭގެ ތެރޭގައި ދިވެހިރާއްޖޭގެ ސިއްޙީ ދާއިރާއަށް ޚާއްސަކޮށް ފޯރުކޮށްދިން 1 މިލިއަން ޔޫރޯގެ ހިލޭ އެހީވެސް ހިމެނެއެވެ.
މިހަފްލާގައި ޑެލިގޭޝަން އޮފް ދަ ޔޫރަޕިއަން ޔޫނިއަން ޓު ސްރީލަންކާ އެންޑް މޯލްޑިވްސް، މިނިސްޓްރީ އޮފް އިކޮނޮމިކް ޑިވެލޮޕްމަންޓް، މޯލްޑިވްސް ފަންޑް މެނޭޖްމަންޓް ކޯޕަރޭޝަން، ނޭޝަނަލް ބޯޓިންގ އެސޯސިއޭޝަން އޮފް ދަ މޯލްޑިވްސް، ގެސްޓްހައުސް އެސޯސިއޭޝަން އޮފް ދަ މޯލްޑިވްސް އަދި ކ.ތުލުސްދޫ ކައުންސިލްގެ ފަރާތުން ބައިވެރިވިއެވެ. މިޕްރޮޖެކްޓުގެ ތަންފީޒީ އިދާރާއަކީ މޯލްޑިވްސް ފަންޑް މެނޭޖްމަންޓް ކޯޕަރޭޝަނެވެ.
