ގެސްޓްހައުސްއެއްގެ ސަސްޕެންޝަން ބާތިލްކޮށް، އިތުރު ތަނެއް ސަސްޕެންޑުކޮށްފި
އެ ގެސްޓް ހައުސްގެ ސަސްޕެންޝަން ބާތިލުކުރީ ކަރަންޓީން ފެސިލިޓީއެއްކަން އެނގުމާ ގުޅިގެން
މާފުށި ގެސްޓްހައުސްއެއް
ޓޫރިޒަމް މިނިސްޓްރީން ކުރިއަށްގެންދިޔަ ގެސްޓްހައުސް އިންސްޕެކްޝަންގައި މި މަހުގެ 19 ވަނަ ދުވަހު ސަސްޕެންޑުކުރި ގެސްޓްހައުސްގެ ސަސްޕެންޝަން ބާތިލްކޮށް، އިތުރު ތަނެއް ސަސްޕެންޑުކޮށްފިއެވެ.
ރާއްޖެއެމްވީއަށް މައުލޫމާތުދެއްވަމުން ޓޫރިޒަމް މިނިސްޓްރީގެ ޑެޕިއުޓީ މިނިސްޓަރ އައްސަދު ރިޒާ ވިދާޅުވީ ޓޫރިޒަމް މިނިސްޓްރީއާއި އެޗްޕީއޭއާ ގުޅިގެން މިހާރު ކުރިއަށްގެންދާ ގެސްޓްހައުސް އިންސްޕެކްޝަނުން 4 ވަނައަށް ސަސްޕެންޑުކުރި ގެސްޓްހައުސްގެ ސަސްޕެންޝަން ބާތިލްކޮށްފައިވާކަމަށެވެ.
ހަތަރުވަނައަށް ސަސްޕެންޑުކުރި ގެސްޓްހައުސް ސަސްޕެންޑުކޮށްފައިވަނީ ދެކުނު އޭޝިއާގެ ފަތުރުވެރިން ރާއްޖެ އައުމާ ގުޅިގެ އެކުލަވާލާފައިވާ އުސޫލާ ޚިލާފުވެ އެގައުމުގެ ފަތުރުވެރިންނަށް އެ ގެސްޓްހައުސްއިން ޚިދުމަތް ދިނުމުންނެވެ.
އައްސަދު ވިދާޅުވީ އެތަނަކީ ވޯކް ޕާމިޓުގައި ރާއްޖެ އެތެރެވާ ފަރާތްތައް ކަރަންޓީންކުރުމަށް އެޗްޕީއޭއިން ހުއްދަ ދީފައިވާ ތަނެއްކަމަށާއި، އެތަން ސަސްޕެންޑުކުރި އިރު އެކަން ނޭނގޭ ކަމަށެވެ.
އެއީ ކަރަންޓީން ފެސިލިޓީއެއްކަން އެނގުމާއެކު ސަސްޕެންޝަން އުވާލީ ކަމަށް އައްސަދު ވިދާޅުވިއެވެ. މިހާރު އެކަންތައް ބަލަމުންދަނީ އެޗްޕީއޭއިން ކަމަށާއި، އިތުރު ފިޔަވަޅެއް އަޅާނަމަ މިނިސްޓްރީއަށް އަންގާނެ ކަމަށް އައްސަދު ވިދާޅުވިއެވެ.
އައްސަދު ވިދާޅުވީ މިހާރު އެކުލަވާލާފައިވާ އުސޫލުގައިވާ ގޮތުން އެފަދަ ތަންތަނުގައި ވެސް ދެކުނު އޭޝިއާގެ ފަތުރުވެރިން ބޭތިއްބުމަކީ މަނާކަމެއް ކަމަށެވެ. މި އިންސްޕެކްޝަން އަދިވެސް ކުރިއަށްދާ ކަމަށާއި، އިންސްޕެކްޝަންއިން އިތުރު ގެސްޓްހައުސްއެއް ސަސްޕެންޑުކޮށްފައިވާ ކަމަށް އައްސަދު ވަނީ ވިދާޅުވެފައެވެ.
މި ގެސްޓްހައުސް ވެސް ސަސްޕެންޑުކޮށްފައިވަނީ ދެކުނު އޭޝިއާގެ ފަތުރުވެރިންނަށް ޚިދުމަތް ދީގެން ކަމަށް އައްސަދު ވިދާޅުވިއެވެ. ދެކުނު އޭޝިއާގެ ފަތުރުވެރިންނަށް ރާއްޖެ އައުމުގެ ހުއްދަ ދީފައި ވަނީ ޚާއްސަ އުސޫލެއްގެ ދަށުންނެވެ.
އެސަރަހައްދުން ރާއްޖެ އަންނަ ފަތުރުވެރިންނަށް ހަމައެކަނި ރިސޯޓުތަކަށް ދިއުމުގެ ހުއްދަ ދިނުމަށް ނިންމާފައިވާއިރު، ގެސްޓް ހައުސްތަކަށް ދިއުމުގެ ހުއްދަ ލިބޭނީ ޖުލައި 30 އިން ފެށިގެންނެވެ. ދެކުނު އޭޝިއާގެ ގައުމުތަކުން އަންނަ ފަތުރުވެރިންނަށް ޓްރާންސިޓް ކުރެވޭނީ ޓޫރިޒަމް މިނިސްޓްރީން ކަނޑައަޅާ ގެސްޓް ހައުސްތަކުގައި އެކަންޏެވެ.
