އީރާނުގެ އެތައް މިލިއަން މީހުން މަގުތަކަށް ނުކުމެ ސަރުކާރަށް އޮތް ތާއީދު ދައްކާލައިފި

އިރާނުގެ އިސްލާމީ ޖުމްހޫރިއްޔާއަށް އޮތް ސާބިތު ތާއީދު ހާމަކުރުމަށާއި، ބޭރުގެ ނުފޫޒާއެކު އެ ގައުމުގައި ހިންގަމުންދާ ހަމަނުޖެހުންތަކާ ދެކޮޅަށް އަޑުއުފުލުމަށް، އެ ގައުމުގެ އެކި ފަންތިތަކުގެ ރައްޔިތުން މުޅި ގައުމުގައި ބޮޑެތި އެއްވުންތަކެއް ބާއްވައިފި އެވެ.

ތެހެރާން ހިމެނޭހެން އިރާނުގެ ގިނަ ޕްރޮވިންސްތަކެއްގައި މި ހިނގާލުންތައް ފަށާފައިވަނީ ހޯމަ ދުވަހުގެ މެންދުރުފަހު ގައެވެ. 

ސަރުކާރުގެ އިސް އޮފިޝަލުން މި އެއްވުންތައް ސިފަކުރައްވާފައިވަނީ، ކުލީ ސިފައިންނާއި ޓެރަރިސްޓުން މެދުވެރިކޮށް ގައުމުގައި ބައިބައިވުން އުފެއްދުމަށް ދުޝްމަނުން ރާވަމުންދާ ރޭވުންތަކާ ދެކޮޅަށް ރައްޔިތުން ދައްކުވައިދިން އެއްބައިވަންތަކަމުގެ ވަރުގަދަ ހެއްކެއްގެ ގޮތުގަ އެވެ.

މިދިޔަ މަހު އިގްތިސާދީ ދަތިތަކާ ގުޅިގެން ބައެއް ވިޔަފާރިވެރިން ސުލްހަވެރި އިހުތިޖާޖުތަކެއް ކުރިއަށް ގެންދިޔަ ނަމަވެސް، އެމެރިކާ އާއި އިޒްރޭލުގެ އިސްވެރިން މުޒާހަރާ ކުރާ މީހުންނަށް ހިތްވަރު ދީ ދިން ބަޔާންތަކާ ގުޅިގެން އެ ހަރަކާތްތައް ވަނީ ހަރުކަށި އަމަލުތަކަކަށް ބަދަލުވެފަ އެވެ. އިޒްރޭލާ ގުޅުން އޮންނަ ފާރިސީ ބަހުން ވާހަކަދައްކާ މީޑިއާތަކުން ވަނީ މި ހަމަނުޖެހުންތަކަށް ހިތްވަރުދީ، ގައުމުގެ އަމާންކަން ނަގާލުމަށް މަސައްކަތް ކޮށްފަ އެވެ.

އިރާނުގެ ކަމާބެހޭ ފަރާތްތަކުން ވަނީ ރައްޔިތުންގެ އިގްތިސާދީ ކަންބޮޑުވުންތަކަކީ ހައްގު ކަންބޮޑުވުންތަކެއް ކަމަށް ގަބޫލުކޮށް، އެކަންކަން ހައްލުކުރުމަށް ވައުދުވެފަ އެވެ. ހަމަ އެއާ އެކު، އެމެރިކާއިން އިރާނުގެ މަރުކަޒީ ބޭންކަށާއި ތެލުގެ ވިޔަފާރި އަށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ކުރިމަތިވެފައިވާ ދަތިތަކުގެ ބޭނުން ހިފައިގެން، ބޭރުގެ ނުފޫޒުތަކުން ހަމަނުޖެހުން އުފައްދާތީ އެކަން ވަނީ ކުށްވެރިކޮށްފަ އެވެ.

އިރާނުގެ ކަމާބެހޭ އިދާރާތަކުން ހާމަކުރާ ގޮތުގައި، މި ހަމަނުޖެހުންތައް ހިންގާ ފަރާތްތަކަށް އެހީތެރިކަން ފޯރުކޮށްދެނީ އެމެރިކާ އާއި އިޒްރޭލުންނެވެ.

އެމެރިކާގެ ރައީސް ޑޮނަލްޑް ޓްރަމްޕް ދާދިފަހުން ވަނީ ހަމަނުޖެހުން ހިންގާ ފަރާތްތަކަށް ތާއީދުކުރައްވައި ވާހަކަދައްކަވާފަ އެވެ. އަދި އެމެރިކާގެ ކުރީގެ ސެކްރެޓަރީ އޮފް ސްޓޭޓް މައިކް ޕޮމްޕޭ ވަނީ މިކަމުގައި އިޒްރޭލުގެ ޖާސޫސީ އިދާރާ، މޮސާޑްގެ ބައިވެރިވުން އޮތްކަމަށް ދޭހަވާ ފަދަ ބަޔާންތަކެއް ނެރުއްވާފަ އެވެ.

އިރާނުގެ ރޫހާނީ ލީޑަރު، އާޔަތުﷲ ސައްޔިދު އަލީ ޚާމަނާއީ މިދިޔަ ހުކުރު ދުވަހު ވިދާޅުވެފައި ވަނީ، ގައުމުގެ މުދަލަށް ގެއްލުންދީ ހަމަނުޖެހުން ހިންގާ ފަރާތްތަކުގެ ކުރިމަތީގައި ގައުމު ކުޑަކަކޫ ނުޖަހާނެ ކަމަށެވެ. އަދި ދުޝްމަނުންނާ ދެކޮޅަށް އެއްބައިވަންތަވުމަށް އެމަނިކުފާނު ވަނީ އިލްތިމާސް ކުރައްވާފަ އެވެ.

ރައީސް މަސްއޫދު ޕެޒެޝްކިއަން އާދީއްތަ ދުވަހު ދެއްވި ބަސްދީގަތުމެއްގައި ވިދާޅުވީ، އިހުތިޖާޖު ކުރުމާއި ހަމަނުޖެހުން ހިންގުމަކީ ތަފާތު ދެކަމެއް ކަމަށާއި، ގައުމުގެ ސަލާމަތްތެރިކަން ނަގާލުމަށް ފުރުސަތު ނުދެއްވާނެ ކަމަށެވެ. އަދި އާންމު ރައްޔިތުން މެރުމަކީ އެއްގޮތަކަށްވެސް ބަލައިގަނެވޭނެ ކަމެއް ނޫން ކަމަށާއި، މިފަދަ އަމަލުތައް ހިންގާ މީހުންނަށް ތަމްރީނާއި އެހީތެރިކަން ދެނީ އެމެރިކާއާއި އިޒްރޭލުން ކަމަށް އެމަނިކުފާނު ތުހުމަތު ކުރެއްވިއެވެ.

ޕާލަމެންޓުގެ ރައީސް މުހައްމަދު ބާގިރު ގަލީބާފް ވެސް ވަނީ ސުލްހަވެރިކަމާ އެކު އިހުތިޖާޖު ކުރުމުގެ ހައްގު ރައްޔިތުންނަށް އޮތް ނަމަވެސް، ހަތިޔާރު އެޅި ޓެރަރިޒަމާ ދެކޮޅަށް ސަރުކާރުން ސާބިތުކަމާއެކު ތެދުވާނެ ކަމަށް ވިދާޅުވެފަ އެވެ.

އިރާނުގެ ޝަރުއީ ދާއިރާ އިން ވަނީ ބޭރުގެ ނުފޫޒާ އެކު ލޭއޮހޮރުވުމާއި ގެއްލުން ދިނުމުގައި ބައިވެރިވާ ފަރާތްތަކަށް އެއްވެސް ރަހުމެއް ނެތި ހަރުކަށި އަދަބު ދޭނެ ކަމަށް ބުނެފަ އެވެ.

ހޯމަ ދުވަހުގެ އެއްވުންތަކުގެ ބައިވެރިން ބުނެފައި ވަނީ، އެމީހުން ތިބީ އިސްލާމީ ޖުމްހޫރިއްޔާ އާއި ރޫހާނީ ލީޑަރުގެ ފަހަތުގައި ސާބިތުކަމާއެކު ކަމަށާއި، ދުޝްމަނުންނަށް ގައުމުގެ ހަމަޖެހުން ނަގާލުމުގެ ފުރުސަތު ނުދޭނެ ކަމަށެވެ.