އީރާނުގެ މުޒާހަރާ ކުރާ މީހުން ތެހެރާނުގައި 25 މިސްކިތް، އިސްފަހާންގައި 10 މިސްކިތް އަންދާލައިފި، މީގެ ތެރޭގައި ތާރީޚީ މިސްކިތެއް ކަމަށްވާ މަސްޖިދު އަބޫޒަރު ހިމެނޭ
އީރާނުގެ ހަމަނުޖެހުންތަކުގައި 30 އަށް ވުރެ ގިނަ މިސްކިތްތަކުގައި ރޯކޮށްލާފައިވާއިރު، ހޮސްޕިޓަލްތަކާއި ބޭންކްތަކަށް ގެއްލުންދީ، ފުލުހުންގެ މަރުކަޒުތަކަށް ހަމަލާދީފައިވޭ. މި ހަމަނުޖެހުންތަކުގައި ސަލާމަތީ ބާރުތަކުގެ 30 އަށް ވުރެ ގިނަ މީހުން މަރުވެފައިވާއިރު، ތުއްތު ކުއްޖަކުވެސް މި ހަދިސާގައި މަރުވެފައިވޭ.
އީރާނުގައި ކުރިއަށްދާ ސަރުކާރާ ދެކޮޅު މުޒާހަރާތަކުގައި 30 އަށް ވުރެ ގިނަ މިސްކިތުގައި ރޯކޮށްލާފައިވާ ކަމަށް ރިޕޯޓުތައް ބުނޭ | އެކްސް
އީރާނުގައި ހިނގަމުންދާ ސަރުކާރާ ދެކޮޅު ހަމަނުޖެހުންތަކުގައި އުމްރާނީ ވަސީލަތްތަކަށް ބޮޑެތި ގެއްލުންތަކެއް ދީފައިވާ ކަމަށާއި، އޭގެ ތެރޭގައި 30ށް ވުރެ މިސްކިތް ރޯކޮށްލާފައިވާ ކަމަށް ރިޕޯޓުތައް ބުނެފި އެވެ.
އީރާނުގެ ދައުލަތުގެ ޓީވީގައި ވާހަކަދައްކަވަމުން ތެހެރާނުގެ މޭޔަރު އަލީރޭޒާ ޒަކާނީ ވިދާޅުވީ، މި ހަމަނުޖެހުންތަކުގައި ހޮސްޕިޓަލަކަށް ގެއްލުން ދީފައިވާއިރު، ސިއްޙީ ދެ މަރުކަޒަކާއި 26 ބޭންކަކުން ވައްކަންކޮށް މުދާތައް ފޭރިގަނެފައިވާ ކަމަށް ވިދާޅުވި އެވެ. މީގެ އިތުރުން ތެހެރާނުގެ 25 މިސްކިތެއްގައި ހުޅުޖަހައި އަންދާލާފައިވާ ކަމަށާއި، ފުލުހުންގެ މަރުކަޒުތަކަށާއި އިސްލާމިކް ރިވެލިއުޝަނަރީ ގާޑް ކޯޕްސްގެ 'ބަސީޖް' މިލީޝިއާގެ މަރުކަޒުތަކަށް ވެސް ހަމަލާދީފައިވާ ކަމަށް އޭނާ ފާހަގަކުރެއްވި އެވެ.
އޭނާ ވިދާޅުވި ގޮތުގައި، ހަމަނުޖެހުން ހިންގާ ފަރާތްތަކުން ވަނީ ސަރުކާރުގެ 10 އިމާރާތަކަށާއި، އަލިފާން ނިއްވާ 48 ލޮރީއަކަށާއި، 42 ބަހާއި އެމްބިއުލަންސްގެ އިތުރުން 24 އެޕާޓްމަންޓަކަށް ގެއްލުން ދީފަ އެވެ.
މި މުޒާހަރާތައް ފެށިފައިވަނީ 2025 ޑިސެމްބަރު 29 ވަނަ ދުވަހު، އީރާނުގެ ފައިސާ (ރިއާލް) ގެ އަގު ވަރަށް ބޮޑަށް ދަށްވުމާ ގުޅިގެން ތެހެރާނުގެ މެދުތެރޭގައި ވިޔަފާރިވެރިން ކުރަން ފެށި އިހުތިޖާޖުތަކަކުންނެވެ. 'ފާސް' ނިއުސް އެޖެންސީން ރިޕޯޓްކޮށްފައިވާ ގޮތުގައި، މުޒާހަރާކުރި ވިޔަފާރިވެރިން ވަނީ އެހެން ވިޔަފާރިވެރިން ވެސް ފިހާރަތައް ބަންދުކޮށް މި ހަރަކާތުގައި ބައިވެރިވުމަށް ގޮވާލާފަ އެވެ. ޑިސެމްބަރު 30 ގައި ތެހެރާނުގެ ޔުނިވަރސިޓީތަކުގެ ދަރިވަރުން މި ހަމަނުޖެހުންތަކާ ގުޅުނެވެ. އަދި ޖެނުއަރީ 2 ވަނަ ދުވަހު 'މެހެރު' ނިއުސް އެޖެންސީން ރިޕޯޓްކުރި ގޮތުގައި، އިލާމް ޕްރޮވިންސްގެ މަގުތަކުގައި މޫނު ނިވާކޮށްގެން ތިބި ހަތިޔާރު އެޅި ބަޔަކު ވަނީ ފެނިފަ އެވެ. ފަހަކަށް އައިސް، ހުޅަނގުގެ ޕްރޮވިންސްތަކުގައި މުޒާހަރާގެ ބައިވެރިންނާއި ސަލާމަތީ ބާރުތަކާ ދެމެދު ހިނގާ ކުރިމަތިލުންތައް ވަނީ ކުރިއަށްވުރެ ވަރުގަދަވެފަ އެވެ.
އީރާނުގެ އިސްފަހާން ޕްރޮވިންސްގައި ބޭރުގެ ނުފޫޒާއެކު ހިންގި ހަމަނުޖެހުންތަކުގައި، ސަލާމަތީ ބާރުތަކުގެ 30 މީހަކު މަރުވެފައިވާކަން އެ ސަރަހައްދުގެ ގަވަރުނަރު ވަނީ ކަށަވަރުކޮށްދެއްވާފަ އެވެ.
އާދީއްތަ ދުވަހު ވާހަކަދައްކަވަމުން އަލީ އަހުމަދީ ވިދާޅުވީ، މަރުވި މީހުންގެ ޖަނާޒާގެ ކަންކަން ހޯމަ ދުވަހު ކުރިއަށް ގެންދިއުމަށް ރޭވިފައިވާ ކަމަށެވެ. އަހުމަދީ އިތުރަށް ހާމަކުރެއްވި ގޮތުގައި، މި ހަމަނުޖެހުންތަކުގައި އާންމުންގެ ތެރެއިން މަރުވި މީހުންގެ ތެރޭގައި ދެ މަހުގެ ތުއްތު ކުއްޖަކުވެސް ހިމެނެ އެވެ.
ލިބިފައިވާ ރިޕޯޓްތަކަށް ބަލާއިރު، މި ހަމަނުޖެހުންތަކުގައި އާންމު މުދަލާއި ތަންތަނަށް ބޮޑެތި ގެއްލުންތަކެއް ދީފައިވެއެވެ. އޭގެ ތެރޭގައި އިސްފަހާނުގެ ދިހަ މިސްކިތެއްގައި ރޯކޮށްލުން ހިމެނެ އެވެ.
މީގެ އިތުރުން، ފާރްސް ޕްރޮވިންސްގައި ހިނގި ހަމަނުޖެހުންތަކުގައި ސަލާމަތީ ބާރުތަކުގެ މަދުވެގެން 12 މީހަކު މަރުވެފައިވާ ކަމަށް އެ ސަރަހައްދުގެ މާޓިއާސް ފައުންޑޭޝަންގެ ޑިރެކްޓަރ ޖެނެރަލް އިބްރާހީމް ބަޔާނީ ވިދާޅުވިއެވެ. އަދި ފުލުހުންގެ ޚާއްސަ ފައުޖުތަކުގެ ކޮމާންޑަރ ޖެނެރަލް މަސްއޫދު މުދައްޤު ވިދާޅުވި ގޮތުގައި، އޭނާގެ ކޮމާންޑްގެ ދަށުން މަސައްކަތްކުރާ އަށް މީހަކުވެސް ވަނީ މި ހަމަނުޖެހުންތަކުގައި މަރުވެފަ އެވެ.
މަރުވި މީހުންގެ ޖަނާޒާ ބޭއްވުމަށް ހަމަޖެހިފައިވާ ހޯމަ ދުވަހަކީ، މުޅި ގައުމުގައި ބޮޑު އެއްވުމެއް ބޭއްވުމަށް ހަމަޖެހިފައިވާ ދުވަހެއް ކަމަށް ވެސް ރިޕޯޓުތައް ބުނެ އެވެ. މި އެއްވުމަކީ، އީރާނުގެ ރައްޔިތުން އިގްތިސާދީ ދަތިތަކާ ގުޅިގެން ކުރަމުންދިޔަ މުޒާހަރާތަކުގެ ނާޖާއިޒު ފައިދާ ނަގައި، ބޭރުގެ ނުފޫޒުތަކާ ގުޅިގެން ހިންގަމުންދާ ޓެރަރިސްޓް ހަމަލާތަކާއި އަނިޔާވެރި އަމަލުތައް ކުށްވެރިކުރުމަށް ބާއްވާ އެއްވުމެކެވެ.
މި ހަމަނުޖެހުންތަކުގައި މަރުވި ސަލާމަތީ ބާރުތަކުގެ މީހުންނާއި އާންމުންގެ ޖުމްލަ އަދަދު އަދި މިހާތަނަށް ރަސްމީކޮށް ހާމަކޮށްފައެއް ނުވެ އެވެ. ނަމަވެސް، ގައުމުގެ އެކި ސަރަހައްދުތަކުގައި ހުންނަ ސިއްހީ މަރުކަޒުތަކަށާއި އެހީދޭ އިދާރާތަކަށް ހަމަލާތަކެއް ދީފައިވާ ކަމަށް ރިޕޯޓްކޮށްފައިވެ އެވެ. އެގޮތުން، އުތުރުގެ ގީލާން ޕްރޮވިންސްގައި ރެޑް ކްރެސެންޓްގެ ވޮލަންޓިއަރަކު މަރުވެފައިވާއިރު، އެކި ސަރަހައްދުތަކުން އެ އިދާރާގެ އިތުރު ފަސް މުވައްޒަފަކަށް ވަނީ އެކިވަރުގެ އަނިޔާތައް ލިބިފަ އެވެ.
އީރާނުގެ ސަރުކާރުގެ އިސް އޮފިޝަލުން ވިދާޅުވަމުން ގެންދަވަނީ، އިގްތިސާދީ ދަތިތަކާ ގުޅިގެން ކުރާ ސުލްހަވެރި މުޒާހަރާތަކަކީ ރައްޔިތުންގެ ހައްގެއް ކަމަށާއި އެކަންކަމަށް ހައްލު ހޯދައިދެއްވާނެ ކަމަށެވެ. ނަމަވެސް، ހަމަނުޖެހުން ހިންގުމާއި ތަންތަނަށް ގެއްލުންދިނުން ފަދަ އަމަލުތަކަށް އެއްވެސް ޖާގައެއް ނުދެއްވާނެ ކަމަށް އެ ބޭފުޅުން ވިދާޅުވި އެވެ.
އޮފިޝަލުން ހާމަކުރި ގޮތުގައި، ހަމަނުޖެހުން ހިންގާ ފަރާތްތަކުން ވަނީ ތަކެތީގެ އަގުބޮޑުވުމާއި އީރާނުގެ ފައިސާގެ އަގު ވެއްޓުމުގެ ސަބަބުން ރައްޔިތުންގެ މެދުގައި އުފެދިފައިވާ ކަންބޮޑުވުންތަކުގެ ނާޖާއިޒު ފައިދާ ނަގާފަ އެވެ. މި އިގްތިސާދީ މައްސަލަތަކަކީ އެމެރިކާ އިން އީރާނުގެ މަރުކަޒީ ބޭންކަށާއި ތެލުގެ އެކްސްޕޯޓަށް އަމާޒުކޮށް އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ކުރިމަތިވެފައިވާ މައްސަލަތަކެއް ކަމަށް އީރާނުން ބުނެ އެވެ.
ސަލާމަތީ އަދި ޝަރުއީ ދާއިރާގެ އިސް ބޭފުޅުން ވަނީ ހަމަނުޖެހުން ހިންގުމަށް މަސައްކަތްކުރި ހަތިޔާރު އެޅި ބައެއް ގްރޫޕްތައް އަތުލައިގަނެ، ބޭރުގެ ފަރާތްތަކާ ގުޅުން އޮންނަ ބައެއް މީހުން ހައްޔަރުކޮށްފައިވާ ކަމަށް ވިދާޅުވެފަ އެވެ.
އީރާނުގެ އޮފިޝަލުން ވިދާޅުވާ ގޮތުގައި، މި އަނިޔާވެރި އަމަލުތަކަށް އެމެރިކާ އާއި އިޒްރޭލުގެ އިސްވެރިން ވަނީ ހިތްވަރު ދެއްވާފަ އެވެ. އޭގެ ތެރޭގައި ޓްރަމްޕް ދެއްވި އިންޒާރުތަކާއި، އިޒްރޭލުގެ ޖާސޫސީ އިދާރާތަކުގެ ބައިވެރިވުން އޮތްކަމަށް ދޭހަވާ ގޮތަށް އެމެރިކާގެ ކުރީގެ ސެކްރެޓަރީ އޮފް ސްޓޭޓް މައިކް ޕޮމްޕެއޯ ދެއްވާފައިވާ ބަޔާންތައް ހިމެނެ އެވެ.
އީރާނުގެ ރޫހާނީ ލީޑަރު އާޔަތުﷲ ސައްޔިދު އަލީ ޚާމަނާއީ ހުކުރު ދުވަހު ވިދާޅުވީ، ތަންތަނަށް ގެއްލުންދީ ހަމަނުޖެހުން ހިންގާ މީހުންގެ ކުރިމަތީގައި އީރާނުން ފަހަތަކަށް ނުޖެހޭނެ ކަމަށާއި، ބޭރުގެ ކުލީ ސިފައިންގެ ގޮތުގައި މަސައްކަތްކުރާ ފަރާތްތަކަށް އެއްވެސް ލުޔެއް ނުދެއްވާނެ ކަމަށެވެ.
