އީރާނުގައި ތިބި އެމެރިކާގެ ރައްޔިތުން ވަގުތުން އެ ގައުމުން ފުރަން އަންގައިފި

އީރާނުގައި މިހާރު ހިނގަމުންދާ ސަރުކާރާ ދެކޮޅު މުޒާހަރާތަކާ ގުޅިގެންނާއި، އެމެރިކާގެ ރައީސް ޑޮނަލްޑް ޓްރަމްޕް އީރާނާ މެދު އަޅާނެ ފިޔަވަޅުތަކާ މެދު ގޮތްތަކެއް ނިންމަވަމުންދާ ދަނޑިވަޅެއްގައި، އެ ގައުމުގައި ތިބި އެމެރިކާގެ ރައްޔިތުން ވަގުތުން އެ ގައުމުން ފޭބުމަށް އެމެރިކާ ސަރުކާރުން އަންގައިފި އެވެ.

"މިހާރުން މިހާރަށް އީރާނުން ފައިބާށެވެ،" އީރާނަށް ކަނޑައަޅާފައިވާ އެމެރިކާގެ ވަރޗުއަލް އެމްބަސީން ހޯމަ ދުވަހު ނެރުނު ސަލާމަތީ އިންޒާރެއްގައި ބުނެފައިވެ އެވެ. އަދި އެމެރިކާ ސަރުކާރުގެ އެހީތެރިކަމަކާ ނުލައި އެ ގައުމުން ފޭބުމުގެ އިންތިޒާމުތައް އަމިއްލަ އަށް ހަމަޖެއްސުމަށް އެމެރިކާގެ ރައްޔިތުންނަށް ވަނީ އިރުޝާދު ދީފައެވެ.

އެ އިންޒާރުގައި ބަޔާންކޮށްފައިވާ ގޮތުގައި، މުޅި އީރާނުގައި ކުރިއަށްދާ މުޒާހަރާތައް ދަނީ އިތުރަށް ވަރުގަދަވަމުންނެވެ. އަދި މިކަމުގެ ސަބަބުން އަނިޔާވެރި އަމަލުތައް ހިނގައި، މީހުން ހައްޔަރުކުރުމާއި އަދި އަނިޔާވުން ފަދަ ހާދިސާތައް ހިނގުން އެކަށީގެންވާ ކަމަށް ވެސް ބުނެފައިވެ އެވެ. މީގެ އިތުރުން، ސަލާމަތީ ފިޔަވަޅުތައް ވަރުގަދަކުރުމާއި، މަގުތައް ބަންދުކުރުމާއި، ދަތުރުފަތުރުގެ ނިޒާމަށް ބުރޫއެރުމުގެ އިތުރުން އިންޓަނެޓްގެ ހިދުމަތް މެދުކަނޑާލުން ފަދަ ކަންކަން މިހާރުވެސް ދަނީ ހިނގަމުންނެވެ.

އެމެރިކާގެ ރައްޔިތުންނަށް އިންޓަނެޓްގެ ހިދުމަތް މެދުކެނޑުން ކުރިއަށް އޮތް ތަނުގައި ވެސް ދިމާވާނެ ކަމަށް ބަލައި، މުއާސަލާތު ކުރުމުގެ އެހެން ގޮތްތައް ހޯދުމަށް ސަލާމަތީ އިންޒާރުގައި ލަފާދީފައިވެ އެވެ. އަދި ހާލަތު ތަންދޭ ނަމަ، އެއްގަމު މަގުން އަރްމީނިއާ ނުވަތަ ތުރުކީ މަގުން އީރާނުން ފޭބުމަށް ވެސް ވަނީ އިރުޝާދު ދީފަ އެވެ.

އީރާނާއި އެމެރިކާގެ ދެ ގައުމުގެ ރައްޔިތުކަން އޮންނަ މީހުން އީރާނުން ފުރަން ވާނީ އީރާނުގެ ޕާސްޕޯޓުގައި ކަމަށް އެ އިންޒާރުގައި ބުނެފައިވެ އެވެ. ސަބަބަކީ އީރާނު ސަރުކާރުން ދެ ގައުމުގެ ރައްޔިތުކަން ގަބޫލުނުކުރާތީ އާއި، އެފަދަ ފަރާތްތަކާ މެދު އަމަލު ކުރާނީ ހަމައެކަނި އީރާނުގެ ރައްޔިތުންގެ ގޮތުގައި ކަމަށްވާތީ ކަމަށް ވެސް ބުނެފައިވެ އެވެ.

އީރާނުގައި ތިބި އެމެރިކާގެ ރައްޔިތުންނަށް ސުވާލުކުރުމާއި، ހައްޔަރުކުރުމާއި، އަދި ބަންދުގައި ބެހެއްޓުމުގެ ބިރު ބޮޑު ކަމަށް އެމެރިކާއިން ބުނެ އެވެ. އެމެރިކާގެ ޕާސްޕޯޓެއް ދެއްކުމަކީ ނުވަތަ އެމެރިކާއާ ގުޅުމެއް އޮތްކަން ހާމަވުމަކީ، އީރާނުގެ ކަމާބެހޭ ފަރާތްތަކުން މީހަކު ހައްޔަރުކުރުމަށް ފުދޭ ސަބަބެއް ކަމަށް ވެސް ބުނެފައިވެ އެވެ.

އެ އިންޒާރުގައި އިތުރަށް ބުނެފައިވަނީ، "އެ ގައުމުން ފޭބުމަށް ނިންމި ނަމަވެސް، ތިޔަ ފަރާތްތަކުގެ ސަލާމަތާއި ރައްކާތެރިކަން ކަށަވަރުކޮށްދިނުމުގެ ގާބިލުކަން އެމެރިކާ ސަރުކާރަށް ލިބިގެންނުވެ އެވެ. ގައުމުން ފޭބުމުގައި އަމަލުކުރަން ވާނީ އެއީ ރައްކާތެރި ގޮތެއް ކަމަށް ގަބޫލުކުރެވޭ ނަމަ އެކަންޏެވެ."

އެމެރިކާ އާއި އީރާނާ ދެމެދު ސީދާ ސިޔާސީ ނުވަތަ ކޮންސިއުލަރ ގުޅުމެއް ނޯވެ އެވެ. އޭގެ ބަދަލުގައި، އީރާނުގެ ވެރިރަށް ތެހެރާންގައި ހުންނަ ސްވިޒަލޭންޑްގެ އެމްބަސީން ދަނީ އީރާނުގައިވާ އެމެރިކާގެ މަސްލަހަތުތައް ހިމާޔަތްކޮށްދޭ ފަރާތެއްގެ ގޮތުގައި ހަރަކާތްތެރިވަމުންނެވެ.