ހަމަ ނުޖެހުން ހިންގާ މީހުން ތަމްރީނު ކޮށްފައި ވަނީ ގައުމުން ބޭރުގެ ބަޔަކު: އީރާނުގެ ރައީސް
11 ޖެނުއަރީ 2026 | އާދީއްތަ 18:35އިހުތިޖާޖަކީ ރައްޔިތުންގެ ހައްގެއް ނަމަވެސް، މިސްކިތްތަކުގައި އަލިފާން ރޯކުރުމާއި، ކީރިތި ގުރުއާންގެ މުސްހަފްތައް އަންދާލުމާއި، އާންމު މުދަލަށް ގެއްލުން ދިނުމަކީ އެމެރިކާ އާއި އިޒްރޭލުން ރާވައިގެން ހިންގާ ޖަރީމާތަކެއް ކަމަށް ވިދާޅުވެ ޕެޒެޝްކިއަން އިންޒާރު ދެއްވި.
އީރާނުގެ ރައީސް މަސްއޫދު ޕެޒެޝްކިއަން | ގެޓީ އިމޭޖަސް
އީރާނު ގައި ހިނގަމުންދާ މުޒާހަރާތަކުގައި ހަމަ ނުޖެހުން ހިންގާ މީހުން ތަމްރީނު ކޮށްފައިވަނީ ގައުމުން ބޭރުގެ ބަޔަކު ކަމަށް އީރާނުގެ ރައީސް ވިދާޅުވެއްޖެ އެވެ.
އީރާނުގެ ރައީސް މަސްއޫދު ޕެޒެޝްކިއަން ވިދާޅުވީ، އިހުތިޖާޖު ކުރުމަކީ ރައްޔިތުންނަށް ލިބިގެންވާ ގާނޫނީ ހައްގެއް ކަމަށެވެ. ނަމަވެސް، އެމެރިކާ އާއި ޒަޔަނިސްޓް އިޒްރޭލުން ތަމްރީނުކޮށްގެން ގައުމުގައި ހަމަނުޖެހުން އުފައްދަން މަސައްކަތްކުރާ ހަރުކަށި ފަރާތްތަކާ ދުރުހެލިވުމަށް އެމަނިކުފާނު އީރާނުގެ ރައްޔިތުންނަށް ގޮވާލެއްވި އެވެ.
އާދިއްތަ ދުވަހު ދެއްވި ޓީވީ އިންޓަވިއުއެއް ގައި ޕެޒެޝްކިއަން ވިދާޅުވީ، ރައްޔިތުންގެ ދިރިއުޅުމުގެ ހާލަތު ރަނގަޅުކުރުމަށް ސަރުކާރުން ވަރަށް ބޮޑު އިސްކަމެއް ދޭނެ ކަމަށެވެ. އަދި ޖިންސީ، ނަސްލީ ތަފާތުކުރުމެއް ނެތި، އިންސާފުވެރިކަމާއެކު ދައުލަތުގެ އެހީތެރިކަން (ސަބްސިޑީ) ހުރިހާ ރައްޔިތުންނަށް ފޯރުކޮށްދިނުމަށް ސަރުކާރުން ނިންމާފައިވާ ކަމަށް ވެސް ވިދާޅުވި އެވެ.
ވިޔަފާރިވެރިން ކުރި އިހުތިޖާޖުތަކަށް ފަހު އެފަރާތްތަކުގެ ޝަކުވާތައް ސަރުކާރަށް އަޑުއިވިފައިވާ ކަމަށާއި، ސަރުކާރުގެ ބައްދަލުވުންތަކުގައި ބައިވެރިވެ ކަންބޮޑުވުންތައް ހިއްސާ ކުރުމަށް އެ ފަރާތްތަކަށް ދައުވަތު ދީފައިވާނެ ކަމަށް ރައީސް ވިދާޅުވި އެވެ. "އަޅުގަނޑުމެން މިދަނީ ކޮންމެ ދުވަހަކު ވެސް އެ ފަރާތްތަކާ ވާހަކަދައްކަމުން،" އޭނާ އިތުރަށް ވިދާޅުވި އެވެ.
"ރައްޔިތުން ކުރާ އިހުތިޖާޖުތަކަކީ ހައްގު ކަންތައްތަކެއް ކަމަށް އަޅުގަނޑުމެން ގަބޫލުކުރަން،" ރައީސް ވިދާޅުވިއެވެ. ރައްޔިތުންގެ ހައްގު ކަންބޮޑުވުންތަކަށް ސަރުކާރުން އަބަދުވެސް އިޖާބަދޭނެ ކަމުގެ ޔަގީންކަން އެމަނިކުފާނު ދެއްވި އެވެ.
ރައީސް ޕެޒެޝްކިއަން ފާހަގަކުރެއްވި ގޮތުގައި، ޖޫން 2025 ގައި ކުރިމަތިވި ހަނގުރާމައިގެ ދުވަސްވަރު ގައުމު ހަލަބޮލިކޮށްލުމަށް ނުކުޅެދުނު ދުޝްމަނުން، މިހާރު މަސައްކަތް ކުރަމުން ދަނީ އިގްތިސާދީ ދަތިތަކުގެ ބޭނުން ހިފައިގެން މަސްރަހު ގޯސްކުރުމަށެވެ.
އިހުތިޖާޖަކީ ރައްޔިތުންގެ ހައްގެއް ނަމަވެސް، މިސްކިތްތަކުގައި އަލިފާން ރޯކުރުމާއި، ކީރިތި ގުރުއާންގެ މުސްހަފްތައް އަންދާލުމާއި، އާންމު މުދަލަށް ގެއްލުން ދިނުމަކީ އެމެރިކާ އާއި އިޒްރޭލުން ރާވައިގެން ހިންގާ ޖަރީމާތަކެއް ކަމަށް ވިދާޅުވެ ޕެޒެޝްކިއަން އިންޒާރު ދެއްވިއެވެ. ފަލަސްތީނުގެ ޣައްޒާ އާއި ލުބުނާނުގައި އިޒްރޭލުން ހިންގަމުންދާ އަނިޔާވެރިކަން، އީރާނާ ދެކޮޅު ޔޫރަޕްގެ ގައުމުތަކަށް ވެސް ދިފާއެއް ނުކުރެވޭނެ ކަމަށް އޭނާ ވިދާޅުވި އެވެ.
އީރާނުގެ އެތެރެ އާއި ބޭރުގައި ދުޝްމަނުން ވަނީ ބައެއް މީހުން ތަމްރީނުކޮށް، ގައުމަށް ޓެރަރިސްޓުން ފޮނުވާފައި ކަމަށާއި، އެމީހުން ދަނީ މިސްކިތްތަކާއި ފިހާރަތަކުގައި ރޯކޮށް މީހުން މަރަމުން ކަމަށް ރައީސް ވިދާޅުވި އެވެ. "މި ކުށްވެރިންނަކީ އާންމު ރައްޔިތުންނެއް ނޫން، އަދި އެއީ އީރާނުގެ ބައެއް ވެސް ނޫން،" އެމަނިކުފާނު ވިދާޅުވި އެވެ.
ގައުމު ބައިބައިކޮށް ހަލަބޮލިކޮށްލުމަށް ކުރާ މަސައްކަތްތަކާއި، މުސްހަފްތައް އަންދާލުން ފަދަ ނާތަހުޒީބު އަމަލުތަކަކީ އީރާނުގެ ރައްޔިތުން ބަލައިގަންނާނެ ކަންކަމެއް ނޫން ކަމަށް ރައީސް ވިދާޅުވި އެވެ. އަދި ދަތިތަކާއެކު ވެސް ސަރުކާރުން އިގްތިސާދީ މައްސަލަތައް ހައްލުކުރާނެ ކަމުގެ ވައުދު އެމަނިކުފާނު ވެވަޑައިގެންނެވި އެވެ.
މީހުން މަރައި، އާންމު ތަންތަނުގައި ރޯކުރަމުންދާ ފަރާތްތަކާ ދެކޮޅަށް އީރާނުގެ ސަލާމަތީ ބާރުތަކުން ހަރުކަށި ފިޔަވަޅު އަޅަންޖެހޭނެ ކަމަށްވެސް ރައީސް ޕެޒެޝްކިއަން ވިދާޅުވި އެވެ.
މަސްދަރު: ތަސްނިމް ނިއުސް އެޖެންސީ
