ބޯންމައުތު ކައިރިން ޗެލްސީ ފުއްދާލަން ޖެހުނީ ޕޮއިންޓަކުން
މި ނަތީޖާ އާއެކު ޗެލްސީ އޮތީ ލީގު ތާވަލްގެ ފަސް ވަނަ މަގާމުގައި. އެއީ މިހާތަނަށް ލީގުގައި ކުޅެފައިވާ 19 މެޗުން 30 ޕޮއިންޓާ އެކު. މި ސީޒަންގެ ލީގުގައި މިހާތަނަށް އަށް މެޗުން ޗެލްސީ މޮޅުވެފައިވާއިރު، ހަ މެޗު އެއްވަރުވެ އަދި ފަސް މެޗުން ވަނީ ބަލިވެފައި.
ޗެލްސީ އާއި ބޯންމައުތު ކުޅުނު މެޗުގެ ތެރެއިން
އިނގިރޭސި ޕްރިމިއާ ލީގުގައި ބޯންމައުތާ ދެކޮޅަށް ކުޅުނު މެޗުން ޗެލްސީ އެއްވަރުވެއްޖެ އެވެ.
ޗެލްސީގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި ބޯންމައުތުން ލަނޑު ޖަހައި ކުރި ހޯދާފައި ވަނިކޮށް، ޗެލްސީ އިން ފަހަތުން އަރައި ލީޑު ވެސް ނެގި އެވެ. ނަމަވެސް، އިތުރު ލަނޑެއް ޖަހައިގެން ބޯންމައުތު ވަނީ ނަތީޖާ ހަމަހަމަ ކޮށްފަ އެވެ.
މެޗު ފަށައިގެން ހަ ވަނަ މިނެޓުގައި ބޯންމައުތުން ވަނީ ޗެލްސީ ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޑޭވިޑް ބްރޫކްސް އެވެ. ނަމަވެސް، މެޗުގެ 15 ވަނަ މިނެޓުގައި ޗެލްސީ އަށް ލިބުނު ޕެނަލްޓީ ކާމިޔާބުކޮށް ކޯލް ޕާމާ ވަނީ ނަތީޖާ ހަމަހަމަ ކޮށްފަ އެވެ.
އޭގެ ފަހުން މެޗުގެ 23 ވަނަ މިނެޓުގައި ދެ ވަނަ ލަނޑެއް ޖަހައިގެން ޗެލްސީ އިން ވަނީ ލީޑު ނަގައިފަ އެވެ. އަލެހާންދްރޯ ގާނާޗޯ ތަނަވަސްކޮށްދިން ފުރުސަތެއްގައި ޗެލްސީ އަށް އެ ލަނޑު ޖަހައިދިނީ އެންޒޯ ފެނާންޑޭސް އެވެ. އޭގެ ހަތަރު މިނެޓު ފަހުން ޖަސްޓިން ކްލައިވަޓް ވަނީ ބޯންމައުތުގެ ދެ ވަނަ ލަނޑު ޖަހައި ނަތީޖާ ހަމަހަމަ ކޮށްފަ އެވެ.
މި ނަތީޖާ އާއެކު ޗެލްސީ އޮތީ ލީގު ތާވަލްގެ ފަސް ވަނަ މަގާމުގަ އެވެ. އެއީ މިހާތަނަށް ލީގުގައި ކުޅެފައިވާ 19 މެޗުން 30 ޕޮއިންޓާ އެކު އެވެ. މި ސީޒަންގެ ލީގުގައި މިހާތަނަށް އަށް މެޗުން ޗެލްސީ މޮޅުވެފައިވާއިރު، ހަ މެޗު އެއްވަރުވެ އަދި ފަސް މެޗުން ވަނީ ބަލިވެފަ އެވެ. ޗެލްސީ އަތުން ހޯދި ޕޮއިންޓާ އެކު، 15 ވަނައިގައި ބޯންމައުތު އޮތީ 23 ޕޮއިންޓާ އެކު އެވެ.
މެޗު އެއްވަރުވެފައިވާއިރު، މެޗުގެ ފަހުން އޮތް ނޫސްވެރިންގެ ބައްދަލުވުމުގައި ޗެލްސީގެ ކޯޗު އެންޒޯ މަރެސްކާ ބައިވެރިވެފައި ނުވެ އެވެ. އޭނާ ގެ ބަދަލުގައި ނޫސްވެރިންގެ ބައްދަލުވުމުގައި ބައިވެރިވެފައި ވަނީ، އެސިސްޓެންޓް ކޯޗު ވިލީ ކަބަލޭރޯ އެވެ.
ނޫސްވެރިންގެ ބައްދަލުވުމުގައި މަރެސްކާ ބައިވެރި ނުވި ސަބަބާ ގުޅޭ ގޮތުން އެސިސްޓެންޓް ކޯޗު ބުނެފައި ވަނީ، ފާއިތުވި ދެ ދުވަހު ވެސް މަރެސްކާ އުޅުނީ ބަލިކޮށް ކަމަށާއި، ބަލި ޙާލަތު ހުރި ގޮތުން ބައްދަލުވުމުގައި ބައިވެރި ނުވަން ކޯޗު ނިންމީ ކަމަށެވެ. މެޗަށް ޗެލްސީ އިން ނިކުތީ މަރެސްކާގެ ރޭވުންތެރިކަމާ އެކު ކަމަށް ވިޔަސް، މެޗަށް ފަހު ނޫސްވެރިންގެ ބައްދަލުވުން ކުރިއަށް ގެންގޮސްދިނުމަށް އޭނާ އެދިފައިވާ ކަމަށް އެސިސްޓެންޓް ކޯޗު ބުންޏެވެ.
ޗެލްސީގެ ނަތީޖާތައް ދަށްވެފައިވާއިރު، އެންމެ ފަހުން ލީގުގައި ކުޅުނު ތިން މެޗުން ވެސް އެ ޓީމު މޮޅުވެފައި ނުވެ އެވެ. ޗެލްސީގެ ނަތީޖާތައް ދަށްވަމުން އަންނާތީ، މަރެސްކާ އަށް އަންނަނީ ޕްރެޝަރު ވެސް ބޮޑު ވަމުންނެވެ.
