ޖިރޫޑް، ފްރާންސްގެ ލީލް އަށް ބަދަލުވަނީ

އެމެރިކާގެ ލޮސް އެންޖަލެސް އަށް ކުޅެމުން އަންނަ ފްރާންސްގެ އޮލީވިއޭ ޖިރޫޑް، ފްރާންސް ލީގުގެ ލީލް އަށް ބަދަލުވާން ނިންމައިފި އެވެ.

އޭސީ މިލާން ދޫކޮށްލުމަށް ފަހު، އުމުރުން 38 އަހަރުގެ ކުޅުންތެރިޔާ ލޮސް އެންޖަލެސް އަށް ބަދަލުވީ 2024 ވަނަ އަހަރު އެވެ. ނަމަވެސް، އެ ކުލަބާ އެކު ސޮއި ކޮށްފައި އޮތް އެއްބަސްވުން އުވާލުމަށް ފަހު، ލީލް އަށް ބަދަލުވާން ޖިރޫޑް ވަނީ ނިންމައިފަ އެވެ.

ލީލް އިން ޖިރޫޑް އަށް ހުށަހަޅަނީ އެއް އަހަރު ދުވަހުގެ އެއްބަސްވުމެކެވެ. އެހެންކަމުން 2026 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބުގައި ހުންނާނެ އެވެ. ޖިރޫޑްގެ ޑީލް ނިންމުމަށް ލީލް އިން މިހާާރު ވަނީ ހުރިހާ ލިޔެކިޔުންތަކެއް ފުރިހަމަ ކޮށްފައި ކަމަށް ރިޕޯޓުތައް ބުނެ އެވެ. އަދި ކުރިއަށް އޮތް ދުވަސްތަކުގައި އޭނާގެ މެޑިކަލްގެ ކަންކަން ފުރިހަމަ ކުރާނެ ކަމަށް ވެސް ވަނީ ބުނެފަ އެވެ.

ޖިރޫޑް، އަލުން އެނބުރި ޔޫރަޕުގެ ފުޓުބޯޅަ އަށް ބަދަލު ވަނީ އެއް އަހަރު ދުވަހުގެ މެދު ކެނޑުމަކަށް ފަހު އެވެ. އޭނާ ވަނީ އެމެރިކާގެ ލޮސް އެންޖަލެސް އަށް ކުޅެދިން 18 މެޗުގައި ތިން ލަނޑު ޖަހައިފަ އެވެ. އެ ކުލަބާ އެކު 2024 ވަނަ އަހަރުގެ ޔޫއެސް އޯޕަން ކަޕް ކާމިޔާބު ކުރިއިރު، ލީގްސް ކަޕްގެ ފައިނަލްގައި ވަނީ ވާދަކޮށްފަ އެވެ.

ޖިރޫޑް ވަނީ އާސެނަލް، ޗެލްސީ އަދި އޭސީ މިލާންގައި ވެސް ކުޅެފަ އެވެ. ލޮސް އެންޖަލެސްގެ ކުރިން އޭނާ ކުޅުނީ އޭސީ މިލާންގަ އެވެ. ޖިރޫޑް ވަނީ އޭސީ މިލާނާ އެކު ތިން ސީޒަން ހޭދަކޮށްފަ އެވެ. އެ މުއްދަތުގެ ތެރޭގައި އޭނާ ވަނީ އެ ކުލަބަށް 132 މެޗު ކުޅެދީ 49 ލަނޑު ޖަހައިފަ އެވެ. އެ ކުލަބާ އެކު އިޓާލިއަން ލީގު ވެސް ކާމިޔާބު ކުރި އެވެ.