އީރާންގައި ތިބި އިންޑިއާގެ ރައްޔިތުން އެ ޤައުމު ދޫކޮށް ދިޔުމަށް އަންގައިފި

އީރާންގައި ދިރިއުޅެމުން އަންނަ އިންޑިއާގެ ރައްޔިތުން އެ ޤައުމު ދޫކޮށް ދިޔުމަށް އަންގައިފި އެވެ. 

އިންޑިއާ އިން މިހެން އަންގާފައި ވަނީ، އީރާންއާ ދެކޮޅަށް އަސްކަރީ ގޮތުން ފިޔަވަޅު ތަކެއް އަޅައި، އަދި ހަމަލާ ތަކެއް ދީފާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވާފައި ވަނިކޮށެވެ.

އިންޑިއާގެ ފޮރިން މިނިސްޓްރީ އިން ނެރުނު ބަޔާނެއްގައި ބުނީ، އީރާންގައި ތިބި އިންޑިއާގެ ރައްޔިތުން ވީހާ ވެސް އަވަހަށް އެ ޤައުމު ދޫކޮށް ދިޔުމަށް އިލްތިމާސް ކުރާ ކަމަށެވެ. މިއީ މެދު އިރުމަތީގެ ސަރަހައްދުގައި ހަނގުރާމައިގެ ބިރުވެރިކަން އިތުރުވެ، ސަލާމަތީ ޙާލަތު ގޯސްވަމުން އަންނަ ވަގުތެއްކަން ވެސް ފާހަގަ ކުރެވެ އެވެ. 

އީރާންއާ ދެކޮޅަށް އަަސްކަރީ ގޮތުން ހަމަލާ ތަކެއް ދޭނެ ކަމުގެ އިންޒާރު އެމެރިކާ އިން ދެމުން އަންނައިރު، އީރާންގައި ތިބި އިންޑިއާ ރައްޔިތުންގެ ސަލާމަތާ މެދު ވެސް ވަނީ ކަންބޮޑުވުން އުފެދިފަ އެވެ. އިންޑިއާގެ ފޮރިން މިނިސްޓްރީ އިން ބުނެފައި ވަނީ، އީރާންގައި ތިބި އެ ޤައުމުގެ ރައްޔިތުން ވީ އެންމެ އަވަހަށް ދަތުރު ކުރުމުގެ ތައްޔާރީތައް ފުރިހަމަ ކުރުމަށް އެދޭ ކަމަށެވެ. 

އީރާންގައި ފެށުނު މުޒާހަރާތައް ވަރުގަދަވެ، ޤައުމުގެ އެކި ސަރަހައްދު ތަަކަށް ފެތުރިފައިވާއިރު، އީރާންގައި އިންޑިއާގެ ވަރަށް ގިނަ ރައްޔިތުން މަސައްކަތް ކުރަމުން ގެންދެ އެވެ. އެގޮތުން ތައުލީމީ ދާއިރާ އާއި، އެހެނިހެން ދާއިރާ ތަކުގައި އިންޑިއާގެ ރައްޔިތުން އަންނަނީ މަސައްކަތް ކުރަމުންނެވެ.