މެދުއިރުމަތީގެ މަސްރަހު ހޫނުވަމުން ދަނިކޮށް ގަތަރުގައި ދިފާއީ އައު މަރުކަޒެއް އެމެރިކާ އިން ހުޅުވައިފި
މި މަރުކަޒުގައި މިހާރު 17 ޤައުމެއްގެ އަސްކަރީ ހަރަކާތްތައް ދަނީ ހިންގަމުން. މި މަރުކަޒު ހުޅުވީ އީރާނުގައި ހިނގަމުންދާ މުޒާހަރާތަކާ ގުޅިގެން ރައީސް ޓްރަމްޕް ވަރުގަދަ އިންޒާރުތަކެއް ދެއްވި ދަނޑިވަޅެއްގައި.
އެމެރިކާގެ ރައީސް ޑޮނަލްޑް ޓްރަމްޕް ގަތަރު ގެ އަމީރު ތަމީމް ބިން ހަމަދު އަލް ޘާނީ (ވ) އާއި ބޮޑު ވަޒީރު މުހައްމަދު ބިން އަބްދުލްރަހްމާން ބިން ޖާބިރު އަލް ޡާނީ (ކ) އާ އަލް އުދެއިދު އެއާބޭސް އިން ފުރާވަޑައިގަތުމުގެ ކުރިން ވާހަކަ ދައްކަވަނީ - މެއި 15، 2025. | ގެޓީ އިމޭޖަސް
މެދުއިރުމަތީގެ މަސްރަހު ހޫނުވަމުން ދަނިކޮށް ގަތަރުގައި ދިފާއީ އައު މަރުކަޒެއް އެމެރިކާ އިން ހުޅުވައިފި ކަމަށް އެ ގައުމުން ބުނެފި އެވެ.
މި މަރުކަޒު ހުޅުވިކަން އިއުލާނު މި ކުރީ އެމެރިކާގެ ރައީސް ޑޮނަލްޑް ޓްރަމްޕް އީރާނުގައި ހިނގަމުންދާ މުޒާހަރާތަކާ ގުޅިގެން އެޤައުމުގެ ދާޚިލީ ކަންކަމުގެ ތެރެއަށް ވަދެވަޑައިގަންނަވާނެ ކަމުގެ އިންޒާރު ދެއްވާފައިވާ ދަނޑިވަޅެއްގަ އެވެ.
މެދުއިރުމަތީގެ ވައިގެ ދިފާއީ ކަންކަމާއި މިސައިލް ދިފާއީ މަސައްކަތްތައް ވިލަރެސްކުރުމަށްޓަކައި އައު މަރުކަޒެއް ގާއިމު ކުރީ ގަތަރުގެ އަލް އުދައިދު އެއަރ ބޭސްގަ އެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން އަންގާރަ ދުވަހު ނެރުނު ބަޔާނެއްގައި ބުނެފައިވާ ގޮތުގައި، ގަތަރުގައި ހުންނަ މި އަސްކަރީ މަރުކަޒުގައި މިހާރުވެސް 17 ޤައުމެއްގެ އަސްކަރީ ޙަރަކާތްތައް ދަނީ ހިންގަމުންނެވެ.
"މިޑްލް އީސްޓަން އެއަރ ޑިފެންސް – ކޮމްބައިންޑް ޑިފެންސް އޮޕަރޭޝަންސް ސެލް" ގެ ނަމުން ނަންދެވިފައިވާ މި އައު މަރުކަޒު ޤާއިމުކޮށްފައި ވަނީ ކޮމްބައިންޑް އެއަރ އޮޕަރޭޝަންސް ސެންޓަރުގެ ތެރޭގަ އެވެ. މިތަނުގައި މަސައްކަތް ކުރާނީ އެމެރިކާގެ އިތުރުން އެމެރިކާ އާ ބައިވެރިވާ ސަރަޙައްދީ ޤައުމުތަކުގެ މުވައްޒަފުންނެވެ.
ސެންޓްކޮމްގެ ކޮމާންޑަރު އެޑްމިރަލް ބްރެޑް ކޫޕަރ އާ ޙަވާލާދީ އެ ބަޔާނުގައި ބުނެފައިވަނީ، މިއީ ސަރަޙައްދީ ދިފާޢީ އެއްބާރުލުން އިތުރަށް ވަރުގަދަކުރުމަށްޓަކައި އެޅުނު ވަރަށް މުހިންމު ފިޔަވަޅެއް ކަމަށެވެ. އަދި މި މަރުކަޒުގެ ސަބަބުން މެދުއިރުމަތީގެ ވައިގެ ދިފާއީ ކަންކަމާއި މިސައިލް ދިފާޢީ ޒިންމާތައް ވިލަރެސްކުރުމާއި، މަޢުލޫމާތު ޙިއްޞާކުރުން ކުރިއަށްވުރެ ބޮޑަށް ހަރުދަނާވެގެންދާނެ ކަމަށް އޭނާ ވިދާޅުވި އެވެ.
މީގެ އިތުރުން، އެމެރިކާގެ އެއަރ ފޯސް ސެންޓްރަލް (އޭއެފްސެންޓް) ގެ މުވައްޒަފުން ސަރަޙައްދީ ބައިވެރިންނާ ގުޅިގެން ގިނަ ގައުމުތަކެއް ބައިވެރިވާ އަސްކަރީ ތަމްރީނުތައް ރޭވުމާއި، ތަމްރީނުތައް ހިންގުމުގެ އިތުރުން ކުއްލި ހާލަތްތަކަށް އިޖާބަދިނުމުގެ މަސައްކަތްތައް ކުރާނެ ކަމަށް ސެންޓްކޮމް އިން ބުންޏެވެ.
އީރާނުގައި ކުރިއަށްދާ މުޒާހަރާތައް ހުއްޓުވުމަށް އެގައުމުގެ ސަރުކާރުން ބާރުގެ ބޭނުންކުރުމާ ގުޅިގެން، ރައީސް ޓްރަމްޕް ވަރުގަދަ ފިޔަވަޅުތަކެއް އަޅާނެ ކަމުގެ އިންޒާރު ދެއްވުމުން، އީރާނުން ވަނީ އެމެރިކާ އުޅެނީ އަސްކަރީ ގޮތުން ނުފޫޒު ފޯރުވުމަށް ބަހަނާއެއް ހޯދަން ކަމަށް ތުހުމަތުކޮށްފަ އެވެ.
އީރާނުން އދ. އަށް ކަނޑައަޅާފައި ހުންނަ މިޝަނުން 'އެކްސް' ގައި ބުނެފައި ވަނީ، އެމެރިކާ އިން އީރާނާ މެދު ގެންގުޅޭ ސިޔާސަތުތަކަކީ ވެރިކަން ބަދަލުކުރުމުގެ މަޤްޞަދުގައި ކުރާ ކަންކަން ކަމަށެވެ. އަދި ދަތިކުރުމުގެ ފިޔަވަޅުތަކާއި، އިންޒާރުތަކާއި، ރޭވިގެން ހިންގާ ހަމަނުޖެހުންތަކަކީ އަސްކަރީ ގޮތުން ވަދެގަތުމަށް ބަހަނާ ދެއްކުމަށް ކުރާ ކަންކަން ކަމަށާއި، ނަމަވެސް ވޮޝިންގޓަނުގެ މި އުކުޅުތައް އަލުން ނާކާމިޔާބު ވާނެ ކަމަށް އީރާނުން ބުންޏެވެ.
ގަތަރަކީ އިޒްރޭލާއި އީރާނުގެ ހަމަލާތައް ވެސް ކުރިމަތިވެފައިވާ އެ ސަރަހައްދުގެ ހަމައެކަނި ގައުމެވެ. ހަމަ އެއާ އެކު، ދޯހާ އާއި ތެހެރާނަކީ ދުނިޔޭގެ އެންމެ ބޮޑު ގުދުރަތީ ގޭސް ފީލްޑް ހިއްސާ ކުރާ އަދި އެކުވެރި ގުޅުމެއް ބާއްވަމުން އަންނަ ދެ ގައުމެވެ.
މި އައު މަރުކަޒު ހުޅުވާފައި ވަނީ މިދިޔަ އަހަރު ގަތަރާއި ބަޙްރައިންގައި އެމެރިކާގެ އަސްކަރިއްޔާ އިން ވައިގެ ދިފާއީ ކަންކަމަށް ޚާއްޞަ ދެ މަރުކަޒެއް ގާއިމު ކުރުމަށްފަހުގަ އެވެ.
އީރާނުން ވަނީ އެމެރިކާ އިން އެ ގައުމަށް އަސްކަރީ ހަމަލާއެއް ދިފި ނަމަ އެ ސަރަހައްދުގައި ހުރި އެމެރިކާގެ ޓާގެޓް ތަކަށް ހަމަލާ ދޭނެ ކަަމަށް ބުނެފަ އެވެ.
