އެމެރިކާ އިން އީރާނަށް ހަމަލާދިނުމަކީ ހެދޭނެ އެންމެ ބޮޑު ގޯސް ކަމަށް ރަޝިޔާގެ އިސް އޮފިޝަލަކު ވިދާޅުވެއްޖެ

އެމެރިކާ އިން އީރާނަށް ހަމަލާދިނުމަކީ ހެދޭނެ އެންމެ ބޮޑު ގޯސް ކަމަށް ރަޝިޔާގެ އިސް އޮފިޝަލަކު ވިދާޅުވެއްޖެ އެވެ.

ރަޝިޔާގެ ޕާލަމެންޓުގެ ތިރިގޭގެ އިންޓަނޭޝަނަލް އެފެއާޒް ކޮމިޓީގެ މުގައްރިރު ލިއޮނިޑް ސްލޫޓްސްކީ ވިދާޅުވި ގޮތުގައި، އެމެރިކާ އިން އީރާނުގެ ދާޚިލީ ކަންކަމުގެ ތެރެއަށް ވަދެ އަސްކަރީ ފިޔަވަޅެއް އަޅައިފިނަމަ، މުޅި ސަރަހައްދުގެ ހަމަޖެހުން ގެއްލިގެން ހިނގައިދާނެ ކަމަށެވެ.

ރަޝިޔާގެ ދައުލަތުގެ މީޑިއާ "ޓާސް" އިން ރިޕޯޓްކޮށްފައިވާ ގޮތުގައި ސްލޫޓްސްކީ ވިދާޅުވީ، ވިސްނުމެއް ނެތި އުދުވާނީ ހަމަލާ އެއް އީރާނަށް ދިނުމަށް ވައިޓް ހައުސް އިން ނިންމައިފި ނަމަ، އެއީ ވޮޝިންގްޓަނަށް ހެދޭނެ އެންމެ ބޮޑު ގޯހަށް ވާނެ ކަމަށެވެ.

"ތެލުގެ ދަހިވެތިކަމުގައި އެމެރިކާ އިން މި ތައްޔާރުވަނީ ހަމައެކަނި މުދަލުގެ ބާޒާރު ފުނޑުފުނޑުކޮށްލާކަށް ނޫން. މުޅި ސަރަހައްދުގެ މަސްލަހަތު މުޅިން ނަގާލުމަށް،" އޭނާ އިތުރަށް ވިދާޅުވި އެވެ.

ރަޝިޔާގެ ލިބަރަލް ޑިމޮކްރެޓިކް ޕާޓީގެ ލީޑަރުކަން ވެސް ކުރައްވާ ސްލޫޓްސްކީ ތުހުމަތު ކުރެއްވި ގޮތުގައި، އީރާނުގައި މިހާރު ހިނގަމުންދާ މުޒާހަރާތަކަކީ ވެރިކަން ބަދަލުކުރުމުގެ މަގުސަދުގައި ބޭރުގެ ބާރުތަކުން ހިތްވަރުދީގެން ހިންގާ ހަރަކާތްތަކެކެވެ. އޭނާ ވިދާޅުވީ، މަގުމަތީގެ ކުރިމަތިލުންތައް ކުރިއަށް ގެންދިއުމަށާއި ގާނޫނީ ގޮތުން އިންތިޚާބުކޮށްފައިވާ ސަރުކާރު ވައްޓާލުމަށް ގޮވާލައި، ހުޅަނގުގެ ސިޔާސީވެރިން މިކަމަށް ތާއީދުކޮށް ބައިއަތު ހިފާފައިވާ ކަމަށެވެ.

އަނެއްކޮޅުން ނިއުޔޯކް ޓައިމްސް އިން އެމެރިކާގެ އޮފިޝަލުންނާ ހަވާލާދީ ރިޕޯޓްކޮށްފައިވާ ގޮތުގައި، ޕެންޓަގަނުން ވަނީ އީރާނުގެ ނިއުކްލިއާ ޕްރޮގްރާމާއި ބެލިސްޓިކް މިސައިލް ސައިޓްތައް ހިމެނޭހެން ހަމަލާދެވިދާނެ ތަންތަނުގެ ތަފާތު އިޚްތިޔާރުތައް ރައީސް ޓްރަމްޕަށް ހުށަހަޅާފަ އެވެ. ނަމަވެސް، ސައިބާ ހަމަލާ އެއް ދިނުން ނުވަތަ އީރާނުގެ ދާޚިލީ ސަލާމަތީ ނިޒާމަށް އަމާޒުކޮށް ހަމަލާދިނުން ފަދަ ފިޔަވަޅުތައް އެޅުމުގެ ފުރުސަތު ބޮޑު ކަމަށް އޮފިޝަލުން ފާހަގަކުރެ އެވެ.

އަސްކަރީ ހަމަލާ އެއް ދޭނަމަ އެކަމަށް މަދުވެގެން ދުވަސްކޮޅެއް ނަގާނެ ކަމަށާއި، އޭގެ ސަބަބުން އީރާނުގެ ފަރާތުން ވަރުގަދަ ބަދަލުހިފުމުގެ ހަމަލާތަކެއް އަތުވެދާނެ ކަމަށް އޮފިޝަލުން އެ ނޫހަށް މައުލޫމާތު ދީފައިވެ އެވެ.

އަސްކަރީ އޮފިޝަލުންނާ ހަވާލާދީ އެ ރިޕޯޓުގައިވާ ގޮތުން، އެމެރިކާގެ ކަނޑުގެ ސިފައިންގެ މިސައިލް ހަމަލާ ދޭ ތިން މަނަވަރު މިހާރު ވެސް މެދުއިރުމަތީގެ ސަރަހައްދުގައި އެބަހުއްޓެވެ. އޭގެ ތެރޭގައި ފާއިތުވި ދުވަސްތަކުގައި ރަތްކަނޑަށް ވަދެފައިވާ "ރޫޒަވެލްޓް" މަނަވަރު ހިމެނެ އެވެ. މީގެ އިތުރުން، އެ ސަރަހައްދުގައި އެމެރިކާގެ މިސައިލް ފޮނުވާ ސަބްމެރިން އެއް ވެސް އޮތްކަމަށް ޕެންޓަގަނުގެ އޮފިޝަލުން ވަނީ ކަށަވަރުކޮށްދީފަ އެވެ.