ޖަރުމަނުން ގެންގުޅޭ ދެފުށްކެހެރި ސިޔާސަތުތަކަށް އީރާނުގެ ޚާރިޖީ ވަޒީރު ވަރުގަދަ ރައްދެއް ދެއްވައިފި

ޖަރުމަނުގެ ޗާންސެލަރ ފްރީޑްރިކް މާރޒް، އީރާނުން މުޒާހަރާކުރާ މީހުން މަރަމުންދާ ކަމަށް ތުހުމަތު ކުރެއްވުމާ ގުޅިގެން، އިންސާނީ ހައްގުތަކުގެ މައްސަލައިގައި ޖަރުމަނުން ގެންގުޅޭ ދެފުށްކެހެރި ސިޔާސަތުތަކަށް އީރާނުގެ ޚާރިޖީ ވަޒީރު ވަރުގަދަ ރައްދެއް ދެއްވައިފި އެވެ.

އަންގާރަ ދުވަހު އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވީ، އިންސާނީ ހައްގުތަކާ ބެހޭގޮތުން އެހެން ގައުމުތަކަށް "ލެކްޗަރ" ދިނުމުގެ އެއްވެސް ހައިސިއްޔަތެއް ޖަރުމަނަށް ނެތް ކަމަށެވެ. އަދި ޣައްޒާ ގައި އެމެރިކާ އާއި އިޒްރޭލުން ހިންގަމުންދާ ގަތުލުއާންމަށް ޖަރުމަނުން ފާޅުގައި ތާއީދު ކުރަމުން ދާތީ، އެ ގައުމުގެ އިތުބާރު މުޅިން ގެއްލިފައިވާ ކަމަށް އޭނާ ފާހަގަކުރެއްވި އެވެ.

"އާންމުންނާއި ފުލުހުން މަރަމުންދާ ޓެރަރިސްޓުންގެ މައްޗަށް އީރާނުން ކުރިހޯދުމުން، ޖަރުމަނުގެ ޗާންސެލަރ އަވަސްވެގަތީ ހަމަ ނުޖެހުން ހިންގި މީހުންނަށް ހިތްވަރު ދެއްވުމަށް ކަމަށް އެކްސްގައި ކުރެއްވި ޕޯސްޓެއްގައި އަރަގްޗީ ވިދާޅުވިއެވެ. "އެހެންވީއިރު، ޣައްޒާގައި 70،000 ފަލަސްތީނު ރައްޔިތުން މަރައި ހިންގަމުންދާ ގަތުލުއާންމަށް މާރޒް ކުރައްވާ ފުރިހަމަ ތާއީދާ ބެހޭގޮތުން އޭނާ ވިދާޅުވަނީ ކީކޭތޯ؟" އޭނާ ސުވާލު އުފެއްދެވިއެވެ.

އަރަގްޗީ މިފަދައިން ވިދާޅުވެފައިވަނީ، އީރާނުގެ ސަރުކާރުގެ ސައްހަ ކަމާމެދު ސުވާލު އުފައްދައި، އެ ގައުމުގައި ހިނގަމުންދާ ހަމަނުޖެހުންތަކާއެކު ސަރުކާރު ވެއްޓެން ގާތްވެފައިވާ ކަމަށް ވިދާޅުބެ މާރޒް ދެއްކެވި ވާހަކަފުޅުތަކަކާ ގުޅިގެންނެވެ.

މާރޒް ވަނީ އީރާނުގެ ސަރުކާރަކީ ރައްޔިތުންގެ ވޯޓުން އިންތިޚާބުވެފައިވާ ސަރުކާރެއް ނޫން ކަމަށް ދޭހަވާ ގޮތަށް ތުހުމަތުތަކެއް ކުރައްވާފަ އެވެ. ނަމަވެސް، އީރާނަކީ އިސްލާމީ ޑިމޮކްރަސީއެއްގެ ދަށުން ހުރިހާ މަގާމުތަކަކަށް ވެސް ރައްޔިތުންގެ ސީދާ އަދި ނުސީދާ ވޯޓުން މީހުން އިންތިޚާބުކުރާ ގައުމެކެވެ.

މީގެ އިތުރުން، 2025 ވަނަ އަހަރުގެ ޖޫން މަހު އެމެރިކާ އާއި އިޒްރޭލުން އީރާނަށް ދިން ހަމަލާތަކަށް މާރޒް ތާއީދުކުރެއްވިކަން ވެސް އަރަގްޗީ ފާހަގަކުރެއްވި އެވެ. އީރާނުގެ ނިއުކްލިއަރ މަރުކަޒުތަކަށް ގެއްލުން ދިނުމަށް ޒަޔަނިސްޓު އިސްތިއުމާރުން ކުރި މަސައްކަތަކީ ވިލާތަށްޓަކައި ކޮށްދިން  މަސައްކަތެއް ކަމަށް މާރޒް ސިފަކުރެއްވި ކަމަށް އޭނާ ވިދާޅުވިއެވެ.

ވެނެޒުއޭލާގެ ރައީސް ނިކޮލަސް މަދޫރޯ އެމެރިކާ އިން ވަގަށް ނެގި މައްސަލައިގައި ޖަރުމަނުން ހަނު އޮތް އޮތުމަށްވެސް އަރަގްޗީ ފާޑުވިދާޅުވި އެވެ. އޭނާ ވިދާޅުވީ ޖަރުމަނުން އީރާނުގެ ދާޚިލީ ކަންކަމާ ބެހުން ހުއްޓާލައި، ޓެރަރިޒަމާއި ގަތުލުއާންމަށް ކުރާ ތާއީދު ހުއްޓާލަން ޖެހޭ ކަމަށެވެ.

ވަކި މައްސަލައެއްގެ ގޮތުގައި، ޔޫރަޕިއަން ޕާލަމެންޓުން އީރާނުގެ ޑިޕްލޮމެޓުން އެ އިދާރާ އަށް ވަނުން މަނާކުރި ކުރުމަށްވެސް އަރަގްޗީ ވަނީ ވަރުގަދަ ރައްދެއް ދެއްވާފައެވެ. އޭނާ ވިދާޅުވީ ޣައްޒާގައި ދެ އަހަރަށްވުރެ ގިނަ ދުވަސްވަންދެން ހިންގަމުންދާ ގަތުލުއާންމާ ގުޅިގެން އިޒްރޭލާ ދެކޮޅަށް އެއްވެސް ފިޔަވަޅެއް ނާޅާ އޮތް އޮތުމުން އެ އިދާރާގެ ނުފޫޒާއި އިންސާފުވެރިކަމާމެދު ސުވާލު އުފެދޭ ކަމަށެވެ.

އަރަގްޗީ އިތުރަށް ވިދާޅުވީ، ހަނގުރާމައިގެ ކުށްވެރިއެއްގެ ގޮތުގައި ބައިނަލްއަގުވާމީ ޖިނާއީ ކޯޓުން (އައިސީސީ) މައްސަލަ ބަލަމުންދާ ނަތަންޔާހޫ އަށް ޔޫރަޕުގެ ވައިގެ ސަރަހައްދުގައި މިނިވަންކަމާއެކު ދަތުރު ކުރެވޭ އިރު، އީރާނުގެ ޑިޕްލޮމެޓުންނާ މެދު މިފަދަ ފިޔަވަޅުތައް އެޅުމުން ދުނިޔެ އަށް ހަގީގަތް ސާފުވާ ކަމަށެވެ. އަދި ޔޫރަޕުން އަޅާ ކޮންމެ ފިޔަވަޅަކަށް އީރާނުން ހަމަ އެފަދަ ރައްދެއް ދޭނެ ކަމަށް އޭނާ އިންޒާރު ދެއްވި އެވެ.

އީރާނުގައި ދިރިއުޅުމުގެ އަގުތައް ބޮޑުވުމާ ގުޅިގެން ހިނގަމުންދާ ހަމަނުޖެހުންތަކަކީ އެމެރިކާގެ ދަތިކުރުމުގެ ފިޔަވަޅުތަކުގެ ސަބަބުން ދިމާވެފައިވާ ކަންކަން ކަމަށް އީރާނު ސަރުކާރުން ބުނެ އެވެ. ރައްޔިތުންގެ އިގްތިސާދީ ޝަކުވާތައް ބަލައިގަންނަ ކަމަށް ބުނަމުން، ބޭރުގެ ނުފޫޒުން ހިންގާ ހަމަނުޖެހުންތަކަށް ހަރުކަށި ފިޔަވަޅު އަޅާނެ ކަމަށް ވެސް އީރާނުން ވަނީ ބުނެފަ އެވެ. މީގެ އިތުރުން، ބޭރުގެ ނުފޫޒުތަކާ ދެކޮޅަށް އީރާނުގެ އެކި ސަރަހައްދުތަކުގައި އެތައް މިލިއަން ރައްޔިތުން ނުކުމެ ސަރުކާރަށް ތާއީދުކޮށް އަޑުއުފުލާފައިވާކަން ވެސް ފާހަގަކުރެވެ އެވެ.