ޕެނަލްޓީ ޖަހައިގެން މޮޅުވެ އާސެނަލް ސެމީ ފައިނަލަށް

ކަރަބޯ ކަޕްގެ ކުއާޓާ ފައިނަލްގައި ކްްރިސްޓަލް ޕެލަސްއާ ދެކޮޅަށް ކުޅުނު މެޗުން މޮޅުވެ، އާސެނަލް އިން މުބާާރާތުގެ ސެމީ ފައިނަލް އިން ޖާގަ ހޯދައިފި އެވެ.

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި އަންގާރަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ ޕެނަލްޓީގައި ކުރި ހޯދައިގެންނެވެ. މެޗުގައި އާސެނަލް އަށް ލީޑު ލިބިފައި ވަނިކޮށް، ޕެލަސް އިން ވަނީ ފަހަތުން އަރައި ނަތީޖާ ހަމަހަމަ ކޮށްފަ އެވެ.

މެޗުގެ ފުރަތަމަ ހާފުގައި ދެ ޓީމަށް ވެސް ލަނޑު ޖަހާނެ ފުރުސަތު ލިބުނުއިރު، އެއްވެސް ޓީމަކަށް ފުރުސަތުގެ ބޭނުން ކުރެވޭ ގޮތެއް ނުވި އެވެ. މެޗުގެ 80 ވަނަ މިނެޓުގައި އާސެނަލް އަށް ލީޑު ލިބުނީ ޕެލަސްގެ ޑިފެންޑަރު މެކްސެންސް ލަކްރޯ އަތުން ބައި ކޮޅަށް ވަތް ލަނޑުންނެވެ. 

ނަމަވެސް، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލަނޑު ޖަހައިގެން ޕެލަސް ވަނީ މެޗުން މޮޅުވެފަ އެވެ. އެ ލަނޑު ޕެލަސް އަށް ޖަހައިދިނީ މާކް ގުއާހީ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޖެފާސަން ލާމާ އެވެ. ދެ ޓީމު އެއްވަރު ވުމުން ދެން ކުޅުނު 15 މިނެޓުގެ ދެ ހާފުގައި ވެސް އެއްވެސް ޓީމަކަށް ލަނޑެއް ނުޖެހުމުން، ނަތީޖާ ނެރުމަށް ޖެހީ ޕެނަލްޓީ އެވެ.

ނަތީޖާ ނެރުމަށް ޖެހި ޕެނަލްޓީގައި އާސެނަލް އިން ވަނީ އަށް ޕެނަލްޓީ ކާމިޔާބު ކޮށްފަ އެވެ. ޕެލަސް އަށް ހަތް ޕެނަލްޓީ ކާމިޔާބު ކުރެވުނުއިރު، އެ ޓީމުގެ އަށް ވަނަ ޕެނަލްޓީ ވަނީ ނާކާމިޔާބުވެފަ އެވެ. 

މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފައި ވަނީ މުބާރާތުގެ ސެމީ ފަައިނަލް އިން ފުރުސަތު ލިބުމުން ވަރަށް ބޮޑަށް ހިތްހަމަ ޖެހޭ ކަމަށެވެ. އެއީ އާސެނަލް އޮންނަން ބޭނުންވާ ހިސާބު ކަމަށާއި، ނަމަވެސް ދެން އޮތީ އެންމެ މުހިންމު މަސައްކަތް ކަމަށް އާޓެޓާ ބުންޏެވެ.

އާޓެޓާ ބުނީ ޕެލަސް އަކީ ވަރަށް ރޭވުންތެރި އަދި ވަރުގަދަ ޓީމެއް ކަމަށެވެ. މެޗުގައި ވެސް އެކަން ވަރަށް ރަނގަޅަށް ފެނުނުކަން ފާހަގަކޮށް އާޓެޓާ ބުނީ، ބައެއް ކަހަލަ ބަދަލުތަކާ އެކު އާސެނަލްގެ ކުޅުންތެރިން ދެއްކި ކުޅުމާާ މެދު އޭނާ ހިތްހަމަ ޖެހޭ ކަމަށެވެ. އެގޮތުން އާޓެޓާ ބުނީ މެޗުގައި އާސެނަލް އަށް ލަނޑު ޖަހަން ފުރުސަތު ތަކެއް ލިބުނުއިރު، އިދިކޮޅު ޓީމުން ވެސް އުނދަގޫ ތަކެއް ކުރި ކަމަށެވެ. ނަމަވެސް، ކުޅުންތެރިން ޑިފެންސްގައި ވެސް ދެއްކީ ފުރިހަމަ ކުޅުމެއް ކަމަށް އޭނާ ފާހަގަ ކުރި އެވެ.

އާސެނަލް މި ފަހުން ކުޅުނު މެޗު ތަކަށް އިޝާރާތް ކުރަމުން އާޓެޓާ ބުނީ، އެއީ އާސެނަލް އިން ބޭނުންވާ ރޫހު ކަމަށެވެ. އޭނާ ބުނީ އަބަދު ވެސް ބޭނުން ވަނީ އަދި މަސައްކަތް ކުރަނީ އެއް ފެންވަރެއްގައި ކުޅެ، ނަތީޖާ ނެރެން ކަމަށެވެ. އެގޮތުން އާސެނަލްގެ ކުޅުންތެރިންގެ ފަރާތުން ފެންނަމުން އަންނަ ހިތްވަރާއި، ކުޅުންތެރިން ދައްކާ ރޫހު އެއީ ޓީމަށް ކުރިއަށް ދާން ލިބޭ އިތުރު ފުރުސަތެއް ކަމަށް އޭނާ ބުންޏެވެ.

މީގެ އިތުރުން އާޓެޓާ ބުނީ ބައެއް ކަހަލަ ބަދަލުތައް ޓީމަށް ގެންނަން ޖެހުނު ނަމަވެސް، ކުޅުންތެރިންނަށް އިތުބާރު އޮންނަ ކަމަށެވެ. އޭނާ ބުނީ ބައެއް ޙާލަތް ތަކުގައި އާސެނަލް އަށް އިތުރު ފުރުސަތެއް ވެސް ނޯންނަ ކަަމަށާއި، ޙާލަތަށް ފިޓުވެގެން ކުޅެން ޖެހޭ ކަމަށެވެ.