އެވަޓަން ބަލިކޮށް، އާސެނަލް އެއް ވަނައިގައި

އިނގިރޭސި ޕްރިމިއަރ ލީގުގައި އެވަޓަންއާ ދެކޮޅަށް ކުޅުނު މެޗުން މޮޅުވެ، އާސެނަލް އިން ލީގު ތާވަލްގެ އެއް ވަނަ މަގާމު ދަމަހައްޓައިފި އެވެ. 

އެވަޓަންގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އާސެނަލް އިން ކާމިޔާބު ކުރީ 1-0 އިންނެވެ. މެޗުގައި އާސެނަލް އިން ހަމައެކަނި ލަނޑު ޖެހީ މެޗުގެ ފުރަތަމަ ހާފުގަ އެވެ.

މެޗުގެ ފުރަތަމަ ހާފުގެ 27 ވަނަ މިނެޓުގައި އާސެނަލް އަށް ވަނީ ޕެނަލްޓީ ދީފަ އެވެ. އެއީ އާސެނަލްގެ ޑެކްލަން ރައިސް ނެގި ކޯނަރެއްގައި ބޯޅަ އަށް ކުޅެން އުޅުމުގެ ތެރޭގައި އެވަޓަންގެ ކުޅުންތެރިޔެއްގެ އަތުގައި ބޯޅަ ޖެހުމުން، ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށް ފަހު ރެފްރީ ދިން ޕެނަލްޓީ އެކެވެ. ޕެނަލްޓީ ކާމިޔާބުކޮށް އާސެނަލް އަށް ކުރި ހޯދައިދިނީ ވިކްޓަ ޔޯކެރޭޝް އެވެ.

މޮޅާއެކު އާސެނަލް އެއް ވަނައިގައި އޮތީ މިހާތަނަށް ކުޅެފައިވާ 17 މެޗުން 39 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި މެންޗެސްޓަރ ސިޓީ އަށް ލިބެނީ 37 ޕޮއިންޓެވެ. އާސެނަލް އާއި ސިޓީއާ ދެމެދު ދެ ޕޮއިންޓުގެ ފަރަގެއް އޮތްއިރު، އެއް ވަނަ މަގާމުގެ ވާދަވެރިކަން ވަނީ ބޮަޑުވެފަ އެވެ.

މެޗަށް ފަހު ވާހަކަ ދައްކަމުން އާސެނަލްގެ ކޯޗު މިކޭލް އާޓެޓާ ބުނެފަައި ވަނީ، މެޗުގެ ނަތީޖާއާ މެދު އޭނާ ވަރަށް ބޮޑަށް ހިތްހަމަ ޖެހޭ ކަމަށެވެ. އެވަަަޓަން އަށް ބަލާއިރު، އެ ޓީމަކީ ބަލި ކުރުމަށް އުނދަގޫ ޓީމެއް ކަމަށް އާޓެޓާ ފާހަގަ ކުރި އެވެ. އޭނާ ބުނީ އެވަޓަން އަކީ ވަރަށް ރޭވެންތެރިކަމާ އެކު ކުޅޭ ޓީމެއް ކަމަށާއި، އެ ޓީމުގެ ފަރާތުން އެތައް އުނދަގޫ ތަކެއް ކުރިމަތި ވާނެ ކަމަށެވެ.

ނަމަވެސް، މެޗުގައި އާސެނަލް އިން އެކަން ކަމަަަށް ފުރުސަތު ދީފައި ނުވާ ކަމަށާއި، ކޮންމެ ކުޅުންތެރިޔަކު ވެސް ފެނުނީ މެޗަށް ފުރިހަމަ އަށް ތައްޔާރު ވެގެން ތިބި މަންޒަރު ކަމަށް އޭނާ ބުންޏެވެ. އެކަން ފާހަގަކޮށް އާޓެޓާ ބުނީ މެޗުގެ ދެ ވަނަ ހާފުގައި އާސެނަލް އިން އިތުރަށް ކުޅުން ރަނގަޅު ކުރި ކަމަށެވެ. 

އެގޮތުން މެޗުގެ ދެ ވަނަ ހާފުގައި އާސެނަލް އަށް ވަނީ، އިތުރު ދެ ލަނޑު ޖަހާނެ ވަރަށް ރަނގަޅު ފުރުސަތު ލިބިފައި ކަމަށް އާޓެޓާ ބުންޏެވެ. އެހެން ނަމަވެސް، އެ ފުރުސަތުގެ ބޭނުން އާސެނަލް އަށް ނުހިފުނީ ކަމަށް އާޓެޓާ ފާހަގަ ކުރި އެވެ. އާޓެޓާ ބުނީ މެޗުގެ ފަހު ވަގުތުގައި ގިނަ ފަހަރު އުނދަގޫ ތަކެއް ތަހަންމަލު ކުރަން ޖެހުނު ނަމަވެސް، އެ މެޗުގައި އެކަން ދިމާ ނުވާ ކަމަށެވެ. 

ލީގު ތާވަލްގެ އެއް ވަނައިގައި އާސެނަލް އޮތް އޮތުމަށް އިޝާރާތް ކުރަމުން އާޓެޓާ ބުނީ، އެ ޓީމު އޮތީ ރަނގަޅު މިސްރާބުގައި ކަމަށެވެ. އޭނާ ބުނީ އެއް ފެންވަރެއްގައި ދެމި އޮވެ، އެއް ވަނައިގައި ހިފެހެއްޓުމަކީ ޕްރިމިއާ ލީގުގައި ވަރަށް އުނދަގޫ ކަމެއް ކަމަށެވެ. ނަމަވެސް، އާސެނަލް އިން ދައްކަައިދެނީ އެ ޓީމުގައި އެ ފެންވަރު ހުރިކަން ކަމަށް އާޓެޓާ ބުންޏެވެ.