ޔުކްރެއިން އިން، ޔޫރަޕިއަން ޔޫނިއަން (އީޔޫ)އާ ގުޅުމަށް ރަޝިޔާ އިން ދެކޮޅު ނުހަދާ ކަމަށް، އެ ޤައުމުގެ ރައީސް ވުލަޑިމިއަރ ޕުޓިން ވިދާޅުވެއްޖެ އެވެ.

ޗައިނާގައި ބޭއްވުނު ބައްދަލުވުމުގައި ސްލޮވޭކިއާގެ ބޮޑު ވަޒީރު ރޮބަޓް ފިކޯއާ ބައްދަލު ކުރައްވައި ވާހަކަ ދައްކަވަމުން ޕުޓިން ވިދާޅުވެފައި ވަނީ، ރަޝިޔާ އިން ޔޫރަޕަށް ހަމަލާ ދޭން ރާވާ ކަމަށް ބުނެ ދެކެވޭ ވާހަކަ އަކީ ހަގީގަތާ ޚިލާފު ވާހަކަތަކެއް ކަމަށެވެ.

ޕުޓިން ވިދާޅުވީ ކުރީގެ ސޯވިއެޓް ސަރަހައްދު ތަކެއް އެއްކޮލުމަށް ދެކޮޅު ހަދަމުން އަންނަނީ ހަަމައެކަނި ހުޅަނގުގެ ޤައުމުތަކާއި، ނޭޓޯ އިން ކަމަށެވެ. އަދި އޭނާ ވިދާޅުވީ ރަޝިޔާގެ ހަމައެކަނި މަޤުސަދަކީ އެ ޤައުމުގެ އަމިއްލަ މަސްލަޙަތު ހިމާޔާތް ކުރުން ކަމަށެވެ.

އެގޮތުން، ޔުކްރެއިން އިން ޔޫރަޕިއަން ޔޫނިއަން (އީޔޫ)އާ ގުޅުމާ މެދު އެއްވެސް އިރެއްގައި ރަޝިޔާ އިން ދެކޮޅު ހަދާފައި ނުވާނެ ކަމުގައި އޭނާ ވިދާޅުވި އެވެ. އެކަން ފާހަގަ ކުރައްވައި އޭނާ ވިދާޅުވީ، ރަޝިޔާ އިން ހަމަލާ ތަކެއް ދޭން އުޅޭ ކަމަށް ބުނެ ފަތުރާ ވާހަކަ އަކީ، އެ ޤައުމާ ދެކޮޅަށް ފަތުރަމުން ގެންދާ ދޮގު ވާހަކަ ތަކެއް ކަމަށެވެ.

ޔުކްރެއިން އިން، އީޔޫއާ ގުޅުމާ މެދު ރަޝިޔާ އިން ދެކޮޅު ނުހަދާ ކަމަށް ޕުޓިން ވިދާޅުވެފައިވާއިރު، ޔުކްރެއިން އިން ނޭޓޯއާ ގުޅުމާ އެ ޤައުމުން ވަނީ މީގެ ކުރިން ވެސް ދެކޮޅު ހަދައިފަ އެވެ.

މީގެ އިތުރުން ޗައިނާގައި ކުރިއަށް ދިޔަ ސަމިޓުގައި ބައިވެރިވެ ވަޑައިގެން ޕުޓިން ވަނީ، ޔުކްރެއިން ހަނގުރާމަ ދިފާއު ކުރައްވައި ވާހަކަ ދައްކަވައިފަ އެވެ. އޭނާ ވިދާޅުވީ، އެއީ ރަޝިޔާ އިން ޔުކްރެއިން އަށް ދިން ހަމަލާއަކާ ގުޅިގެން ފެށުނު ހަނގުރާމައެއް ނޫން ކަމަށެވެ.

އިތުރަށް ޕުޓިން ވިދާޅުވެފައި ވަނީ، އެ ހަނގުރާމައިގެ ފުރިހަމަ ޒިންމާ ނަގަން ޖެހޭނީ ހުޅަނގުގެ ޤައުމު ތަކުން ކަމަަށެވެ. އޭނާ އެހެން ވިދާޅުވެފައިވާއިރު، ރަޝިޔާ-ޔުކްރެއިން ހަނގުރާމައިގެ މައްސަލައިގައި ހުޅަނގުގެ ޤައުމުތަކުގެ ތާއީދު އޮތީ ޔުކްރެއިން އަށެވެ.