އެމެރިކާ އިން ގްރީންލޭންޑް ހިފުމަށް އެއްވެސް މަސައްކަތެއް ކޮށްފި ނަމަ ނޭޓޯ ނިމުމަކަށް އަންނާނެ: ޑެންމާކުގެ ބޮޑު ވަޒީރު

އެމެރިކާ އިން ގްރީންލޭންޑް ހިފުމަށް އެއްވެސް މަސައްކަތެއް ކޮށްފި ނަމަ، ނޯތު އެޓްލާންޓިކް ޓްރީޓީ އޮގަނައިޒޭޝަން (ނޭޓޯ) ގެ އަސްކަރީ އިއްތިހާދު ނިމުމަކަށް އަންނާނެ ކަމުގެ އިންޒާރު ޑެންމާކުގެ ބޮޑުވަޒީރު މެޓެ ފްރެޑްރިކްސަން ދެއްވައިފިއެވެ.

މި އިންޒާރު އައިސްފައި ވަނީ އެމެރިކާ އިން ވެނެޒުއޭލާ އަށް ދިން އަސްކަރީ ހަމަލާ އާ އެ ގައުމުގެ ލީޑަރު ހައްޔަރުކުރުމާ ގުޅިގެން ދުނިޔޭގެ މަސްރަހު ނުތަނަވަސްވެފައިވާ ދަނޑިވަޅެއްގަ އެވެ.

ބޮޑުވަޒީރު ފްރެޑްރިކްސަން މި މޭރުމުން ވާހަކަދެއްކެވީ، އާކްޓިކް ސަރަހައްދުގައި އޮންނަ ގްރީންލޭންޑް އެމެރިކާގެ ސީދާ ބާރުގެ ދަށަށް ގެންދިއުމަށް ރައީސް ޑޮނަލްޑް ޓްރަމްޕް ދެއްކެވި ވާހަކަފުޅުތަކާ ގުޅިގެންނެވެ.

އާދިއްތަ ދުވަހު ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، ކުރިއަށް އޮތް 20 ދުވަހުގެ ތެރޭގައި ގްރީންލޭންޑާ ބެހޭގޮތުން ވާހަކަދައްކަވާނެ ކަމަށެވެ. ގްރީންލޭންޑަކީ އެމެރިކާގެ އިޚްތިޞާޞްގެ ދަށުގައި އޮންނަން ޖެހޭ ތަނެއް ކަމަށް ޓްރަމްޕް ވަކާލާތު ކުރައްވާއިރު، މި އިންޒާރު އައިސްފައި ވަނީ ވެނެޒުއޭލާގެ ލީޑަރު ނިކޮލަސް މަދޫރޯއާއި އޭނާގެ އަނބިކަނބަލުން އެމެރިކާ ސިފައިން ހައްޔަރުކުރިތާ އެއްދުވަސް ފަހުންނެވެ.

މި އަސްކަރީ ހަރަކާތްތަކުގެ ސަބަބުން ޑެންމާކާއި ގްރީންލޭންޑަށް ވަނީ ކަންބޮޑުވުންތަކެއް ކުރިމަތިވެފަ އެވެ. ގްރީންލޭންޑަކީ ޑެންމާކުގެ ރަސްކަމުގެ ދަށުން އަމިއްލަ އެތެރޭގެ އިދާރީ ހިންގުން އޮންނަ، އަދި ނޭޓޯގެ ބައެއްގެ ގޮތުގައި ބެލެވޭ ސަރަހައްދެކެވެ.

"ނޭޓޯގެ މެންބަރު ގައުމަކަށް އެމެރިކާ އިން އަސްކަރީ ގޮތުން ހަމަލާދޭން ނިންމައިފިނަމަ، ހުރިހާ ކަމެއް ނިމުމަކަށް އަންނާނެ،" ފްރެޑްރިކްސަން ވިދާޅުވިއެވެ.

ޑެންމާކުގެ ޓީވީ2 އަށް ދެއްވި ބަސްދީގަތުމެއް ގައި އޭނާ އިތުރަށް ވިދާޅުވީ، އޭގެ މާނަ އަކީ ނޭޓޯގެ އިއްތިހާދާއި، ދެވަނަ ބޮޑު ހަނގުރާމައަށް ފަހު ގާއިމު ކުރެވުނު ސަލާމަތީ ރައްކާތެރިކަން މުޅިން ނެތިގެންދިޔުން ކަމަށެވެ.

ގްރީންލޭންޑްގެ ބާރު ހޯދުމަށް އަސްކަރީ ބާރުގެ ބޭނުން ކުރުމަކީ ޓްރަމްޕް ދެކޮޅު ހައްދަވާފައިވާ ކަމެއް ނޫނެވެ. އަދި މިދިޔަ މަހު، ގްރީންލޭންޑް އެމެރިކާގެ ބައެއްގެ ގޮތުގައި ހެދުމަށް ތާއީދުކުރައްވާ ލޫސިއާނާގެ ގަވަރުނަރު ޖެފް ލޭންޑްރީ ވަނީ އެ ރަށަށް ކަނޑައަޅާފައިވާ ހާއްސަ މަންދޫބަކަށް އައްޔަންކުރައްވާފައެވެ.

މީގެ އިތުރުން، ޓްރަމްޕްގެ ޑެޕިއުޓީ ޗީފް އޮފް ސްޓާފް ސްޓެފަން މިލާގެ އަނބިކަނބަލުން ކޭޓީ މިލާ ވަނީ، އެމެރިކާގެ ދިދައިގެ ކުލަތަކުން ފަރުމާކޮށްފައިވާ ގްރީންލޭންޑްގެ މަންޒަރެއް "ވަރަށް އަވަހަށް" (SOON) މި ލަފުޒާއެކު އެކްސްގައި ހިއްސާކޮށްފަ އެވެ.

ގްރީންލޭންޑްގެ ބޮޑުވަޒީރު ޖެންސް ފްރެޑްރިކް ނީލްސަން ވަނީ އެ ޕޯސްޓަކީ އިހުތިރާމް ކުޑަ އަމަލެއްގެ ގޮތުގައި ސިފަކުރައްވާފައެވެ.

ނީލްސަން ވިދާޅުވީ، ގައުމުތަކާއި ރައްޔިތުންގެ މެދުގައި އޮންނަ ގުޅުން ބިނާވެފައި އޮންނަން ވާނީ ބައިނަލްއަގުވާމީ ގާނޫނުތަކާއި މިއަދު އޮތް ހާލަތަށް އިހުތިރާމް ކުރުމުގެ މައްޗަށް ކަމަށެވެ. ނަމަވެސް، ކަންބޮޑުވާން ޖެހޭ އެއްވެސް ސަބަބެއް ނެތް ކަމަށާއި، ގްރީންލޭންޑަކީ ވިއްކާލަން އޮތް ތަނެއް ނޫން ކަމަށް އޭނާ ވިދާޅުވިއެވެ.

ޔޫރަޕާއި އުތުރު އެމެރިކާ އާ ދެމެދު ގްރީންލޭންޑް އޮންނަ މަގާމަކީ އެމެރިކާގެ ބެލިސްޓިކް މިސައިލް ޑިފެންސް ސިސްޓަމަށް ވަރަށް މުހިންމު ތަނެކެވެ. އަދި އެތަނުގައި ހުރި މައުދަނުގެ މުއްސަނދި ކަމަކީ ޗައިނާ އަށް ބަރޯސާވާ މިންވަރު ކުޑަކުރުމަށް އެމެރިކާ ބޭނުންވާ ސަބަބެކެވެ.

ޓްރަމްޕް ވިދާޅުވާ ގޮތުގައި ގްރީންލޭންޑްގެ ވަށައިގެން ރަޝިޔާ އާއި ޗައިނާގެ އުޅަނދުފަހަރު ދަނީ ހަރަކާތްތެރިވަމުންނެވެ. އެހެންކަމުން ގައުމީ ސަލާމަތަށްޓަކައި އެމެރިކާ އަށް ގްރީންލޭންޑް ބޭނުންވާ ކަމަށާއި، ޑެންމާކަށް އެ ސަރަހައްދު ރައްކާތެރިކޮށް ނުބެލެހެއްޓޭނެ ކަމަށް އޭނާ ތުހުމަތު ކުރެއްވިއެވެ.

މި ހުރިހާ ވާހަކަތަކަކާ ގުޅިގެން ގްރީންލޭންޑްގެ ބޮޑުވަޒީރު ނީލްސަން ވަނީ ރައްޔިތުންނަށް ޔަގީންކަން ދެއްވައި، ކަންބޮޑުނުވުމަށް އެދިވަޑައިގެންފަ އެވެ. އޭނާ ވިދާޅުވީ އެމެރިކާ އަށް ބޭނުންހާ ގޮތަކަށް ގްރީންލޭންޑް ހިފޭނެ ހާލަތެއް ނެތް ކަމަށާއި، ޑެންމާކުން ބޭނުންވަނީ ރަނގަޅު އެއްބާރުލުމެއްގެ ތެރެއިން ކަންކަން ކުރިއަށް ގެންދިއުމަށް ކަމަށެވެ.