ރެއާލް އިން ސެވިއްޔާ ބަލި ކުރި މެޗު ޚާއްސަވީ އެމްބާޕޭ އަށް

ސްޕެނިޝް ލީގުގައި ސެވިއްޔާއާ ދެކޮޅަށް ކުޅުނު މެޗުން މޮޅުވެ، ރެއާލް މެޑްރިޑް އިން އެއް ވަނައި ގައި އޮތް އެންމެ ފަހުގެ ޗެމްޕިއަން ބާސެލޯނާއާ ދެމެދު އޮތް ފަރަގު ކުޑަ ކޮށްފި އެވެ. 

ރެއާލްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ރެއާލް އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 38 ވަނަ މިނެޓުގައި ރެއާލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އިންގްލެންޑުގެ ޖޫޑް ބެލިންހަމް އެވެ. އެ ލަނޑު ޖަހަން ބެލިންހަމް އަށް ފުރުސަތު ތަނަވަސްކޮށްދިނީ ރޮޑްރީގޯ އެވެ. މިފަހަކަށް އައިސް ރޮޑްރީގޯ އަންނަނީ ރަނގަޅު ކުޅުމެއް ދައްކަމުންނެވެ.

މެޗުގެ ފުރަތަމަ ހާފުގެ ފަހު ވަގުތުގައި ސެވިއްޔާގެ ކޯޗު މަތިއަސް އަލްމެއިޑާ އަށް ވަނީ ދެ ވަނަ ރީނދޫ ކާޑާ އެކު ރަތް ކާޑު ދައްކައިފަ އެވެ. އޭގެ ފަހުން ދެ ވަނަ ހާފުގައި ސެވިއްޔާ އަށް އެންމެ ބޮޑު ގެއްލުމެއް ދެއްކީ އެ ޓީމުގެ މާސެލޯ އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ. 

އޭގެ ފަހުން މެޗުގެ ފަހު ދިހަ މިނެޓުގެ ތެރޭގައި ސެވިއްޔާގެ އޭރިޔާ ތެރެއިން ރެއާލްގެ ރޮޑްރީގޯ އަށް ކުރި ފައުލަކާ ގުޅިގެން އެ ޓީމަށް ވަނީ ޕެނަލްޓީއެއް ލިބިފަ އެވެ. އެ ޕެނަލްޓީ ކާމިޔާބުކޮށް މެޗުގައި ރެއާލްގެ ދެ ވަނަ ލަނޑު ޖެހީ ފްރާންސްގެ ކެޕްޓަން ކީލިއަން އެމްބާޕޭ އެވެ. އެ ލަަނޑާ އެކު އެމްބާޕޭ ވަނީ، ރެއާލްގެ ލެޖެންޑް ކްރިސްޓިއާނޯ ރޮނާލްޑޯގެ ރެކޯޑަކާ އަރާ ހަމަ ކޮށްފަ އެވެ.

އެއީ ކަލަންޑަރު އަހަރެއްގައި ރެއާލް އަށް އެންމެ ގިނަ ލަނޑު ޖަހައިދިން ކުޅުންތެރިޔާގެ ރެކޯޑެވެ. އެ ރެކޯޑު މީގެ ކުރިން ރޮނާލްޑޯ އަތުގައި އޮތްއިރު، ރޮނާލްޑޯ ވަނީ ކަލަންޑަރު އަހަރެއްގެ ތެރޭގައި ރެއާލް އަށް 59 ލަނޑު ޖަހައިދީފަ އެވެ. ރެއާލްގައި މޮޅު ކުޅުމެއް ދައްކަމުން އަންނަ އެމްބާޕޭ މި ވަނީ 59 ލަނޑު ޖަހައި އެ އަދަދާ އަރާ ހަމަކޮށްފަ އެވެ. 

މޮޅާއެކު ރެއާލް އޮތީ ލީގު ތާވަލްގެ ދެ ވަނައިގަ އެވެ. އެއީ މިހާތަނަށް ލީގުގައި ކުޅެފައިވާ 18 މެޗުން 42 ޕޮޮއިންޓާ އެކު އެވެ. އެއް ވަނައިގައި އޮތް ބާސެލޯނާ އާއި ރެއާލްއާ ދެމެދު މިހާރު އޮތީ އެއް ޕޮއިންޓުގެ ފަރަގެކެވެ. ނަމަވެސް، ބާސެލޯނާ ވަނީ ރެއާލް އަށް ވުރެ އެއް މެޗު މަދުން ކުޅެފައި ކަމަށްވާއިރު، މެޗުގެ އަދަދު ހަމަކޮށް ލީޑު ފުޅާ ކުރުމުގެ ފުރުސަތު ބާސެލޯނާ އަށް އޮންނާނެ އެވެ.

މެޗަށް ފަހު ވާހަކަ ދައްކަމުން ރެއާލްގެ ކޯޗު ޒަބީ އަލޮންސޯ ބުނެފައި ވަނީ، ސެވިއްޔާ އަތުން މޮޅުވުމުން ހިތްހަމަ ޖެހޭ ކަމަށެވެ. އޭނާ ބުނީ އުނދަގޫ ޙާލަތްތަކެއް ކުރިމަތިވި ކަމަށާއި، ނަމަވެސް ރެއާލް އިން ބޭނުންވީ މެޗުން ތިން ޕޮއިންޓު ހޯދަން ކަމަށެވެ. އެކަން ހާސިލުވުމުން ހިތްހަމަ ޖެހިފައި ހުރި ކަމަށް އަލޮންސޯ ބުންޏެވެ. 

މީގެ އިތުރުން އަލޮންސޯ ބުނީ އެމްބާޕޭ އަކީ ހުނަރުވެރި ކުޅުންތެރިޔެއް ކަމަށާއި، އޭނާ އަކީ ކަންކަން ހާސިލު ކުރެވޭނެ ކުޅުންތެރިޔެއް ކަަމަށެވެ. އެމްބާޕޭ ހޯދާފައިވާ ކާމިޔާބަށް މަރުޙަބާ ކިޔަމުން އަލޮންސޯ ބުނީ، ކުރިއަށް އޮތް އަހަރު އިތުރު ކަންތައް ތަކެއް ފެންނާނެ ކަމަށް އުންމީދު ކުރެވޭ ކަމަށެވެ.