ސައުދީގެ އިސްތިގުލާލު ހިމާޔަތް ކުރާނަން، އެމިރޭޓްސް އިން ޔަމަނުގެ އެސްޓީސީ އަށް ދޭ އަސްކަރީ އަދި މާލީ އެހީތައް ހުއްޓާލަން ޖެހޭ: ސައުދީ ކެބިނެޓް

ޔަމަނުގެ ސަދަން ޓްރާންސިޝަނަލް ކައުންސިލް (އެސް.ޓީ.ސީ) އަށް ޔުނައިޓެޑް އެރަބް އެމިރޭޓްސް (ޔޫއޭއީ) އިން ދެމުންދާ އަސްކަރީ އަދި މާލީ އެހީތެރިކަން ހުއްޓާލާނެ ކަމަށް އުންމީދުކުރާ ކަމަށް ސައުދީ އަރަބިއްޔާގެ ވަޒީރުންގެ މަޖިލީހުން އަންގާރަ ދުވަހު ބުނެފިއެވެ.

ރަސްގެފާނު ސަލްމާން ބިން އަބްދުލްއަޒީޒް ރިޔާސަތު ބެލެހެއްޓެވި ވަޒީރުންގެ މަޖިލީހުގެ ބައްދަލުވުމުގައި ބަޔާންކޮށްފައި ވަނީ، ސައުދީ އަރަބިއްޔާގެ ގައުމީ ސަލާމަތަށް ނުރައްކާވާ ފަދަ ކޮންމެ ކަމަކާ ދެކޮޅަށް އަޅަންޖެހޭ ފިޔަވަޅުތައް އެޅުމުގައި އެ ގައުމުން ފަސްނުޖެހޭނެ ކަމަށެވެ.

ޔަމަނުގެ ރިޔާސީ ލީޑަޝިޕް ކައުންސިލަށާއި އެ ގައުމުގެ ސަރުކާރަށް ފުރިހަމަ އަށް ތާއީދުކުރާކަން ސައުދީން އަލުން ކަށަވަރުކޮށްދީފައިވާއިރު، ޔަމަނުގެ ހަމަޖެހުމާއި މިނިވަންކަން ދެމެހެއްޓުމަށް އެ ގައުމުން އަބަދުވެސް މަސައްކަތް ކުރާނެ ކަމުގެ ޔަގީންކަން ވަނީ ދީފައެވެ.

މީގެއިތުރުން، މަސްރަހު ފިނިކުރުމަށް ކުރަމުންދާ މަސައްކަތްތަކުގެ ބަދަލުގައި، އެއްވެސް އުސޫލެއް ނެތް ގޮތުގައި ހަމަނުޖެހުން އިތުރުކުރަމުންދާތީ ސައުދީ ވަޒީރުންގެ މަޖިލީހުން ވަނީ ހިތްހަމަނުޖެހުން ފާޅުކޮށްފައެވެ. އަދި މިއީ ޔޫއޭއީން ސައުދީއަށް ވެފައިވާ ވައުދުތަކާ ހިލާފު ކަމެއްގެ ގޮތުގައިވެސް ފާހަގަކުރިއެވެ.

ގަލްފް ކޯޕަރޭޝަން ކައުންސިލް (ޖީ.ސީ.ސީ) ގެ ގައުމުތަކުގެ މެދުގައި އޮންނަ ގާތް ގުޅުމާއި ބުއްދި އިސްކުރުމަށް ސައުދީން ވަނީ ގޮވާލާފައެވެ. އަދި 24 ގަޑިއިރު ތެރޭގައި ޔޫއޭއީގެ ސިފައިން ޔަމަނުން ބޭލުމަށާއި، އެސް.ޓީ.ސީ ނުވަތަ ޔަމަނުގެ އެހެން އެއްވެސް ޖަމާއަތަކަށް ދޭ އެހީތެރިކަން ހުއްޓާލުމަށް ޔަމަނުން އެދުނު އެދުމަށް ޔޫއޭއީން އިޖާބަދޭނެ ކަމަށް އުންމީދުކުރާ ކަމަށްވެސް ވަޒީރުންގެ މަޖިލީހުން ބުންޏެވެ.

މީގެކުރިން އަންގާރަ ދުވަހު ޔޫއޭއީން ވަނީ ޔަމަނުގައި ތިބި އެ ގައުމުގެ އަސްކަރީ ފައުޖުތައް ބޭލުމަށް ނިންމާފައިވާކަން އިއުލާނުކޮށްފައެވެ. އަދި މިއީ އެ ގައުމުން އަމިއްލަ އަށް އިސްނަގައިގެން ނިންމި ނިންމުމެއް ކަމަށްވެސް ވަނީ ބުނެފައެވެ.