ސޮމާލީލޭންޑް ގައި ހަރަކާތްތެރިވާ އިޒްރޭލުގެ ކޮންމެ ފަރާތަކަށް ހަމަލާ ދޭނެ ކަމަށް ބުނެ ޙޫޘީ ޖަމާޢަތުން އިންޒާރު ދީފި

ސޮމާލީލޭންޑް ގައި ހަރަކާތްތެރިވާ އިޒްރޭލުގެ ކޮންމެ ފަރާތަކަށް ހަމަލާ ދޭނެ ކަމަށް ބުނެ ޔަމަނުގެ ޙޫޘީ ޖަމާޢަތުން އިންޒާރު ދީފި އެވެ.

ޔަމަނުގެ ޙޫޘީ ޖަމާޢަތުގެ ލީޑަރު އިންޒާރު ދެމުން ބުނެފައި ވަނީ, އިޒްރޭލުގެ އެއްވެސް ފަރާތެއް ސޯމާލީލޭންޑް ގައި ހަރަކާތްތެރިވާ ނަމަ، އެއީ "އަސްކަރީ އަމާޒެއް" ކަމުގައި ބަލާނެ ކަމަށެވެ. މިކަން ހާމަކޮށްފައި ވަނީ އާދިއްތަ ދުވަހު ނެރުނު ބަޔާނެއްގައެވެ. މިއީ ސޮމާލީލޭންޑް ސޯމާލިޔާ އިން ވަކިވެގަތުމަށް އިޒްރޭލުން ދޭ ތާއީދަށް ދެވުނު ވަރުގަދަ ރައްދެއްގެ ގޮތުގައި ބެލެވެ އެވެ.

ޙޫޘީ ޖަމާޢަތުގެ ވެރިޔާ ޢަބްދުލްމަލިކް އަލް-ޙޫޘީ، ޙޫޘީ މީޑިއާ އޮންލައިން ގައި ޝާއިޢުކޮށްފައިވާ ބަޔާނެއްގައި ވިދާޅުވެފައި ވަނީ، "ސޮމާލީލޭންޑް ގައި އިޒްރޭލުގެ އެއްވެސް ހަރަކާތެއް ހިންގުމަކީ އެ ޖަމާއަތުގެ ސިފައިންނަށް ހަމަލާ ދެވޭނެ އަސްކަރީ ޓާގެޓެއްގެ ގޮތުގައި ބަލާނަމެވެ. ސަބަބަކީ އެކަމަކީ ސޯމާލިއާ އާއި ޔަމަނަށް ދެވޭ ޙަމަލާއެއްގެ އިތުރުން ސަރަޙައްދުގެ ސަލާމަތަށް ނުރައްކަލަކަށް ވެސް ވާތީއެވެ."

ހުކުރު ދުވަހު އިޒްރޭލުން ވަނީ ސޮމާލީލޭންޑް ރަސްމީކޮށް ބަލައިގަތްކަން އިއުލާނުކޮށްފަ އެވެ. މިއީ 1991 ވަނަ އަހަރު ސޯމާލިއާ އިން ވަކިވެ މިނިވަން ދައުލަތެއްގެ ގޮތުގައި އަމިއްލަ އަށް އިއުލާނު ކުރި ސޮމާލީލޭންޑަށް ލިބުނު ފުރަތަމަ ރަސްމީ ބަލައިގަތުމެވެ.

ޙޫޘީންގެ ވެރިޔާ ބުނެފައި ވަނީ، މިކަމުގެ ސަބަބުން ނުރައްކާތެރި ނަތީޖާތަކެއް ކުރިމަތިވެދާނެ ކަމަށެވެ. އަދި މި ބަލައިގަތުމަކީ "ސޯމާލިއާ އާއި، އެފްރިކާގެ ސަރަޙައްދުތަކަށް، އަދި ޔަމަނާއި، ރެޑްސީ އާއި، ރެޑްސީގެ އައްސޭރީގައިވާ ގައުމުތަކަށް އަމާޒުކޮށް ދެވޭ ޢަދާވާތްތެރި ޙަމަލާ އެއް" ކަމުގައެވެ.

ދިގު މުއްދަތެއްގައި ބައިނަލްއަޤްވާމީ ގޮތުން ބަލައިގަތުން ހޯދުަމަށް މަސައްކަތް ކުރަމުން އަންނަ ސޮމާލީލޭންޑަކީ، އަދަން ކަނޑުގައި ވިޔަފާރީގެ ގޮތުން މުހިންމު ސަރަޙައްދެއްގައި އޮންނަ ތަނެކެވެ. އެތަނުގައި އަމިއްލަ ފައިސާ، ޕާސްޕޯޓް އަދި ސިފައިން ވެސް ތިބެ އެވެ.