މިޑް ޓާމް އިންތިޚާބުގައި ރިޕަބްލިކަނުން ބަލިވެއްޖެ ނަމަ، އަހަރެން އަޒުލު ކުރާނެ: ޓްރަމްޕް

މިއަހަރުގެ ފަހު ކޮޅު އެމެރިކާގައި އޮންނަ މިޑް ޓާމް އިންތިޚާބުގައި ވެރިކަން ކުރާ ރިޕަބްލިކަން ޕާޓީ ބަލިވެއްޖެ ނަމަ، ވެރިކަމުން އޭނާ އަޒުލު ކުރާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އަންގާރަ ދުވަހު ޓްރަމްޕް މިހެން ވިދާޅުވެފައިވާއިރު، އޭނާގެ ރިޔާސީ ފުރަތަމަ ދައުރުގެ ތެރޭގައި ވެސް ވަނީ މަޤާމުން އަޒުލު ކޮށްފާނެ ކަމުގެ ނުތަނަވަސްކަމާ ކުރިމަތިލާން ޖެހިފަ އެވެ. މިއަހަރުގެ ފަހު ކޮޅު މިޑް ޓާމް އިންތިޚާބު އޮންނައިރު، ޓްރަމްޕް ވެރިކަން ކުރަމުން އަންނަ ގޮތުން ރިޕަބްލިކަން ޕާޓީގެ މަޤުބޫލުކަން ދަށްވަމުން އަންނަ ކަމަށް ރިޕޯޓު ތަކުގައި ވަނީ ބުނެފަ އެވެ. 

ޓްރަމްޕް ވިދާޅުވެފައި ވަނީ ރިޕަބްލިކަން ޕާޓީގެ މެމްބަރުން އެކުގައި ގުޅިގެން މަސައްކަތް ނުކޮށްފި ނަމަ، އިދިކޮޅު ޑިމޮކްރަޓިކް ޕާޓީ އިން އޭނާ އަޒުލު ކުރުމުގެ އެތައް ސަބަބު ތަކެއް ހޯދާނެ ކަމަށެވެ. ޓްރަމްޕްގެ މި ވާހަކަތައް އެކި ފަރާތްތަކުން ސިފަ ކޮށްފައި ވަނީ އެކި ގޮތަށެވެ. އެގޮތުން އާންމުކޮށް ގަދަ ބަސް ވިދާޅުވުމާއި، ޤާނޫނަށް ވުރެ މަތިން ކަންކަން ކުރައްވަން ޓްރަމްޕް ވާހަކަ ދައްކަވާއިރު، އަޒުލު ކުރުމުގެ ބިރު އޮތް ވާހަކަ ޓްރަމްޕް ދެއްކެވީ ވަރަށް ބޮޑު ސީރިއަސް ކަމެއްގައި ކަމަށް ފާހަގަ ކޮށްފައިވެ އެވެ، 

މީގެ އިތުރުން ޓްރަމްޕް ވިދާޅުވެފައި ވަނީ ރިޕަބްލިކަން ޕާޓީ އިން މިޑް ޓާމް އިންތިޚާބު ކާމިޔާބު ކުރުމަކީ ކޮންމެހެން ވެސް ކުރަން ޖެހޭ ކަމެއް ކަމަށެވެ. އެހެން ނޫނީ، މަގާމުން އަޒުލު ކުރުމުގެ މައްސަލައާ ކުރިމަތިލާން ޖެހިވަޑައިގަންނަވާނެ ކަމަށް ޓްރަމްޕް ވިދާޅުވެފައިވެ އެވެ. އެމެރިކާގެ މަޝްރަހު ދިރާސާ ކުރާ ފަރާތްތަކުން ލަފާ ކޮށްފައިވާ ގޮތުގައި، މިޑް ޓާމް އިންތިޚާބު ކާމިޔާބު ކުރުމަށް ރިޕަބްލިކަން ޕާޓީ އަށް އެތައް ގޮން ޖެހުން ތަކެއް ދިމާވާނެ އެވެ. އެކަމުގެ ބިރު އޮތްއިރު، ޓްރަމްޕްގެ މި ވާހަކަ ތަކުން އޭނާ އަށް އޮތް ތާއީދު ދަށްވަމުން އަންނަކަން ފާހަގަވާ ކަމަށް ވެސް މާހިރުން ފާހަގަ ކޮށްފައިވެ އެވެ. 

އެމެރިކާގެ ރިޔާސީ ދެ ވަނަ ދައުރަށް ޓްރަމްޕް ހުވާ ކުރެއްވީ 2025 ވަނަ އަހަރުގެ ޖަނަވަރީ މަހުގެ ތެރޭގަ އެވެ. އޭގެ ފަހުން އެ އަހަރުގެ ފަހު ކޮޅު އޮތް އިންތިޚާބުގައި ރިޕަބްލިކަން ޕާޓީގެ މައްޗަށް ކުރި ހޯދާފައި ވަނީ އިދިކޮޅު ޑިމޮކްރަޓިކް ޕާޓީ އިންނެވެ. ޓްރަމްޕްގެ އިމިގްރޭޝަންގެ ސިޔާސަތު ތަކާއި، ބޭރުގެ ސިޔާސަތު އަދި އިޤްތިސާދީ ކަންކަމުގައި ގެން ގުޅުއްވާ ސިޔާސަތުގެ ސަބަބުން، ގިނަ ބައެއްގެ ނުރުހުން ވަނީ އޭނާ އަށް އަމާޒުވެފަ އެވެ. 

އަންގާރަ ދުވަހު ކެނެޑީ ސެންޓަރުގައި ހައުސް ރިޕަބްލިކަންސް އަށް ބޭއްވި ދެ ދުވަހު ސިޔާސީ ފޯރަމްގައި ޓްރަމްޕް ވަނީ ބައިވެރިވެ ވަޑައިގެން ވާހަކަ ދައްކަވައިފަ އެވެ. ޓްރަމްޕް ވިދާޅުވެފައި ވަނީ އޭނާގެ ސަރުކާރުގެ އެޖެންޑާ، އެމެރިކާގެ ރައްޔިތުންނާ ނުގުޅޭ ކަމަށް ދައްކަނީ އެހެން ބައެއް ކަމަށެވެ. އަދި ސަރުކާރުން ކުރަމުން އަންނަ ކަންކަން ރިޕޯޓު ކުރާ ގޮތާ މެދު ވެސް ޓްރަމްޕް ވަނީ ފާޑު ވިދާޅުވެފަ އެވެ.

އެހެންކަމުން ކެމްޕެއިންގެ ތެރޭގައި ރިޕަބްލިކަން ޕާޓީ އިން އެކަން ކަމަށް ސަމާލުކަން ދިނުމަށް ޓްރަމްޕް ވަނީ އެދިވަޑައިގެންފަ އެވެ.